【甜/真人真事】我是他的常餐情人: 七十五

第75章
到底前度可唔可以做翻朋友？
我地對於對方都係特別嘅存在，只要佢出聲好多嘢都會好自然咁發生，又例如某一日飲完嘢我上去佢度再發生啲咩大家都唔會覺得順其自然，我地係一對永遠會肖想對方肉體嘅密友。

好多時我都分唔清，啊熙係習慣對女仔好溫柔所以連同我講嘢都咁flirty，定好多都係由心而發。

「唉」「唉」我地兩個緊靠住同時歎咗啖氣，佢好自然咁用手指梳理我嘅頭髮，與其肉體交纏我更鐘意擁抱嘅感覺，係呼息間可以感受對方嘅味道同心跳，果種靈魂瞬間貼近嘅感覺。所以我覺得搞完嘢應該相擁，而唔係倒頭大睡。更加唔係好似Issac咁自顧自做自己嘢，我仲係好介意佢無好好擔任佢嘅角色，或者佢溫柔我會更加沉溺，但至少我仲可以俾理由自己同佢相伴。

我將嘴唇貼近啊熙頸部嘅動脈旁，果度係可以直接感受佢脈搏跳動嘅地方，我閉上眼感受唇下過速嘅跳動，玩火地用鼻尖掃過佢，啊熙嘅身上有淡淡嘅鬚後水味道加上啱啱燃點完嘅煙味，雅緻而危險，佢將恤衫領口嘅扣解開，好似要令燥熱嘅感覺揮發少少走，而我係一個熟知佢身體嘅人，我知道假如我將嘴唇下移到佢喉核就會變成赤裸裸嘅勾引。



佢輕撫我頭髮嘅手流連到我嘅頸邊，佢都好清楚要點樣先可以撩到我，而我同佢都明白酒精一直都係世人犯錯嘅藉口，如果我地都選擇將錯就錯，咁佢同我嘅關係係咪就會變成同其他人一模一樣唔再特別呢？