【甜/真人真事】我是他的常餐情人: 七十

第70章
我自欺欺人地自製曖昧假象同Keith一齊坐車返屋企，途中講起佢屋企有養哥基，成日都好活潑要陪佢玩，用咗佢唔少時間，究竟係咪所有男仔都習慣係曖昧期樹立人畜無害嘅形象，好似佢咁最後自己狠狠打破？

「咁咪冇時間溝女？」我少少壞心腸咁問，我覺得赤裸坦誠啲比較好，所以就好似個姐姐咁同佢閑聊，唔問都知，以佢嘅性格外形都唔會太缺異性緣。

「其實我好宅架，係屋企唔係同狗玩就係打機。」佢R下頭怕怕醜醜咁講。咦喂，呢個咁自然嘅答覆又反而係意料之外。

「俾你睇下佢啲相啊~」佢好熱情咁打開佢啲狗狗相俾我睇，我一下下咁掃佢個電話，自自然然咁挨近佢，髮絲垂落佢手臂，我低下頭繼續掃佢部機，係一堆狗狗相裡面突然出現咗張得上身嘅肌肉相，我向佢望咗下。

「咦，小朋友有操開啵？」我繼續調戲佢，我知道Keith讀書有打開校隊平時又有打拳咁，平時著衫睇唔出佢咁有睇頭，係有肌肉嘅線條仲隱隱見到腹肌。



「咁你鐘唔鐘意先？」佢將我隻手放上佢手臂，令到我好似撟佢咁，我以為佢想flirt我，但望入佢眼神又好似有點過於認真。

「你指個人定個身形？」我好冷靜咁講，原來我有時候係唔識怕醜嘅，除咗對住佢。

「咁鐘意邊樣多啲？」um我收回前言，佢依然都係好識玩。我突然諗到，點解佢電話會突然有張咁嘅相，又係影俾邊個睇？

「你又調戲姐姐。」我打咗佢一下，見完佢就同另外一個人調情嘅我，突然間令我有點自我厭惡，佢出現之後就好快可以同一個人打鬧，但我相信我又會好快無咗興趣。

我同阿熙講咁樣好似幾好，咁我心入面未清空就會無咁容易對其他人上心，佢問我係咪死都要留住佢係度，我話唔係，係佢唔走，我想盡辦法清醒，佢依然係我嘅惡夢。