【甜/真人真事】我是他的常餐情人: 六十七

第67章
由於呢排大家都要OT嘅關係，我同Keith嘅邊爐之約由閑日拖拖下變咗星期六。收工後食飯點都會自然過特登係假期走出嚟，會有種份外曖昧嘅感覺。

其實我唔知道享受人地明目張膽嘅好意算係好定唔好，呢種可以外放嘅感情比起之前截然不同，唔知嗰個人又睇咗幾多係眼內呢？

同一個好似小朋友咁嘅男仔一齊唔需要考慮咁多未來嘅嘢，而呢個世界個個都係咁做唔去諗接受咗先算？但我又會覺得我個心咁樣嘅狀態無辦法回應佢，就好似消費佢咁。

我唔知幾時養成咗陋習，喜愛一個人重溫過去走過嘅路，星期六留係屋企無野做我就走去海邊亂咁行。有時候收工唔算夜，我都會習慣性咁行去海邊，有黏膩嘅夏天走到微涼，再到而家需要緊緊攏實衣領，身邊陪我睇海嘅人都換過一次又一次，又一次次都走散。

「Den姐，係咪等咗好耐啊..」遠遠地見到一個高大嘅身影跑向我方向，大大隻隻咁又帶住散發傻氣嘅笑容，其實都幾可愛嘅。



「唔會啦我早咗姐..」我望一望電話其實大家都早到咗，

「你間嘢我睇咗地圖啦..行果邊~」佢好自然咁拉住我手臂咁行。

行到中途佢突然對住我伸出隻手問我凍唔凍，我又好自然咁搭上佢隻手，佢捉一捉緊又怕怕醜醜咁鬆開咗，同年嘅男仔就好似一個弟弟咁，佢會令你忽然翻去幾年前仲讀緊書咁樣，唔諗未來開心就好。

開開心心地食完一餐，Keith仲同我爭埋單，我payme翻佢，只係同事咋，分清楚好啲，畢竟上過床嘅人都可以形同陌路。

「做咩要同我分得咁清。」落緊樓嘅時候，部lift得我哋兩個，佢拉一拉我個人接近佢，我一下失平衡靠落佢心口，佢嘅身上有輕微而不討厭嘅煙味，我諗起佢啱啱同我熟果時，佢問佢食煙我會唔會唔鐘意佢，傻豬，真係鐘意你都唔會嫌棄你呢啲小事啦。