【甜/真人真事】我是他的常餐情人: 六十六

第65章
「Dan姐是咪帶我去食好西~」收到Keith MSG先發現仲未覆佢食咩。

Keith嘅邀約，其實對於我係可有可無，荒唐過後我對新關係已經開始越來越卻步，因為男仔嚟講，明明話只係想要你一個都好，最後無論我點掙扎都會擅自離開，本來男女關係就係最兒戲嘅嘢，但人總係往往以最認真嘅態度對待。

如果抱住及時行樂嘅心態，你需要嘅，我都唔介意同你共享嗰一下花火。我無所謂到不時反問自己到底我係食錯咩藥，先會將一段段嘅關係全部fuck up。

點解同男朋友明明相安無事會被新嘅人吸引？
又到底我唔扮到咁無所謂、咁呼之則來，Issac有無可能認真地對待我？



「嗯~帶你去間朋友帶過我去嘅邊爐~」去佢同我去過嘅地方，用新回憶將你掩蓋，係自欺欺人定主動就醫？

「你真係好好養，好多女仔要人揀嘢食仲嫌三嫌四。」我send個餐廳info俾佢。但其實幫佢揀咪又係出於我私心，哈。

「哈哈唔係架我好麻煩。」你哋總會係未得到我嘅時候最想要我，然後我會不由自主地抓緊其實唔知道係咪真正在意嘅嘢，然後越在意就會越來越討人厭。

「咁你以後都煩我咪得。」咁識講嘢，如果係以前嘅我，一定覺得你好正。

「我book 7點食好唔好？」對於過度嘅熱情，我只能掉頭逃走。



你試試讓他不易得到整個你

你話係咪啊，Issac？