【甜/真人真事】我是他的常餐情人: 六十五

第65章

古舊嘅思想會覺得，一段關係有愛就好似花得到養分，會滋養兩個人，我諗我同Tony之間係乾枯到根都萎靡咗嘅盆栽，大家都以為放係溫室會慢慢長好，但原來只係溫水煮蛙，大家嘅心意都係不知不覺之間被時間煮成粉末。

「我唔係咁嘅意思，你成日都係公司見咁多唔同嘅人，所以..」佢就算係MSG都可以吞吞吐吐。

「你咪成日話想plan結婚嘅，到底係想結婚定想同我結婚？」我的而且確有過第二個，某程度上亦應該慶幸，如果無佢或者我會一直咁拖落去，而唔係突然想切斷所有嘢留翻個空間俾自己思考。

「我無諗過會有另一個選擇。」但你講唔出因為係我，所以先想要一直行落去。



「但唔係我都可以？」其實我唔應該去追尋一個答案，畢竟唔係所有野都係數學有得解釋，又或者係有答案亦唔代表啲咩。

「我唔明你想表達咩。」

「可能我太唔知足啦。」我唯有包攬上身，反正提出嗰個通常係衰人。

雖然 提分手的人 往往想再努力看看，有些人分得不愉快 才捨得轉身離開。

「唔明你，不過我都只能尊重你決定。」講完之後佢就off咗。



我以為我用一整個月去冷靜，會習慣佢以後就從生活消失。
估唔到到咗真正為幾年感情畫上句點嘅呢一刻，我會好似無端端俾人飛嘅悲劇女主咁係度喊。

我哋從來無試過咁樣冷戰，鬧交唔會過第二日，原來一講分手就真係再見。

我行入浴缸放任水將我沒過，淚水滑落浴缸只會有輕輕波動然後就會不復存在，就當一切如常吧。