【甜/真人真事】我是他的常餐情人: 六十一

第61章

我望住突然比平日要熱鬧嘅WhatsApp，唔甘心玩具突然失蹤嘅Issac、追問我結果嘅阿熙、林林總總嘅group msg，連Anthony都有個MSG問我幾時再去食飯，就係無咗應該出現嘅人，係咪佢都一直等緊我開口，先三言兩語就按下咗我地關係嘅暫停鍵？

接下嚟嘅日子Issac變成咗我，佢不斷係msg度叫我好似以前咁陪佢去行山啦去游水啦，我覺得有點好笑又感慨原來佢無了解過我要啲咩，我一直都唔諗住破壞佢原有嘅關係，唔知道應該話自己懂得偷食禮儀定保留咗僅有嘅良知，我要嘅只不過係一段當寂寞時可以掛著溫柔外衣嘅餐次，可以係共處時溫馨，亦有好似以前曖昧時朋友式嘅相處，你將今日嘅一切放係我講再見之前，其實我就唔會決定走。然後佢遲來嘅覺悟就係要接受佢嘅玩具變成周旋係男人之間嘅女人。

至於Tony，果日分別後就無再同我聯絡，我覺得咁嘅狀態有啲若有所失，又為著突然偷來嘅自由身而放任，Keith只從上次落場做setting我特登等佢食飯之後，就keep住同我有MSG，偶爾試探式嘅曖昧我都唔點破，佢其實就好似個無咩機心嘅小朋友咁，佢對你有好感就會搵下你想同你講下嘢，亦唔一定要同你好快可以變成另外一種關係。
Anthony就比較進攻型，會得閒約下食飯，又同你試圖傾下心事咁，當然佢同Issac咁多年戰友關係加上再都無見到我同佢一齊OT，都唔多唔少會估到發生過啲嘢，呢兩個人離奇地填滿咗Issac同Tony係我生活中退場嘅空閒，某程度上我明白咗Issac多少少，原來單方面接受人地嘅好意真係幾舒服。但我一直都無辦法說服自己呢啲來得快去得快嘅好感係喜歡，更加唔敢放開手去感受。

我知道咁樣嘅諗法都幾矯情，自己覺得要抽離，但又為著Tony嘅冷淡不甘。前段時間對Issac不斷索求，但對住佢嘅窮追又得到變成上把嘅快感，身體上清淨咗，但依然好似花蝴蝶咁被更多嘅甜言蜜語浸泡。


Sara一路陪住我，我知道同佢道德觀未必相符，但佢同我講開心就夠，咁樣叫唔叫快樂呢？但我想要嘅嘢由此至終都未被滿足過。