【甜/真人真事】我是他的常餐情人: 五十九

第59章

普普通通嘅飯，平平淡淡嘅對話，又好似往常咁食完一餐飯，或者我係一個天生唔適合有婚姻嘅人，無數對情侶結婚之後都其實係柴米油鹽，互相陪伴又沉悶，係一張飯桌但又各自玩電話。而其他人應該可以將呢種高度重複嘅生活延續下去，可能係細個被愛情小說熏陶太多吧，總覺得真正嘅愛情唔應該係咁。

「不如我哋行下海邊？」行出食店，佢略略行得快過我兩個身位，以前我總係鐘意撟住佢行，又或者將佢隻手捉過嚟抱我條腰或者摸我個頭，但我無任何衝動做呢啲嘢，只係輕輕地講咗呢句。

「嗯。」佢或者都隱隱知道啲咩，無話佢攰亦無急住翻屋企打機，當然亦無好似以前咁拖我手行去海邊。
雨已經落完，海邊嘅微風依然帶著絲絲涼意，我隨手將頭髮扎成馬尾，突然諗起佢以前話鐘意女仔扎起頭髮，後來又突然變成鐘意睇女仔短髮，而我咁多年依然都係長髪，或許就係呢啲一個個喜好嘅變化先令兩個人越行越遠。

「你近排好似好攰咁..」佢主動開口。



「的確係…project有啲多。」仲要係公司陪住唔應該理會嘅人，虛渡年華自取其辱。

「但係呢排好少聽你講。」明明就係你話可唔可以唔好成日對住你放負，我先越講越少。

「係呢唔知幾時，好似身邊發生咩大事我都唔知點樣同你講起..」我講完望向另一個方向，海風將髮尾吹起又受困於橡筋嘅束縛，好似點樣都難以舒展開去。

「我都覺得，同你講好似同任何一個朋友講個反應係一樣。」或者兩個人一齊得耐根本就同朋友無分別。

「你都唔見得有耐性聽我講，唔係咩?」我諗起每次傾電話佢都係一邊打機一邊hea應我。



我不厭其煩地一個個數對方嘅不是，最後發現講咁多都係冇咗愛情嘅包裝同潤滑，先顯得一切都不勝其煩。

「係，我認我係對你淡咗。」佢好誠實咁講。

「咁或者我哋都應該好好諗下大家係咪可以無咗對方都可以。」我望住佢對眼深吸一口氣講咗出嚟。

原來幾年嘅感情，收尾可以用幾句說話就決定結果，所謂冷靜都不過係俾大家從對方生活消失嘅預習。
佢點點頭，我同佢講佢走先啦，我想係海邊行下。