【甜/真人真事】我是他的常餐情人: 五十八

第58章

話咗俾阿熙聽之後好似今晚無論發生咩事都有個人會包底咁，莫名有啲安心感。

「我出門啦，你都好換衫出門。」

無錯，Tony以為此時此刻我應該係屋企，訓到中午再慢悠悠地準備出門，然後好似等多一刻都唔願意咁，會三番四次提我準時出門，隔1,2個字就會問我去到邊，以至於我都慣性係搭車嘅時候放空，唔望電話。

我去佢屋企大概半個鐘內，食飯約喺中間點，其實基本上唔需要太多時間等待對方。以前同公司收工幾夜都好佢更加會等埋我送我翻屋企，去到而家半刻嘅等待都嫌費時，到底係等待情人呢件事唔再甜蜜，定係時光將甜蜜磨蝕飴盡？



熱戀期出門去到目的地嘅過程都要忍唔住短信無數個來回，就算有幾瑣碎嘅嘢都要同對方分享嘅嗰兩個人，就好似俾時間嘅巨獸吞噬從來無存在過咁。

「我到，仲有幾耐。」

「我拎定飛，你睇下食咩先。」隨住佢說話下面傳嚟餐廳嘅openrice link。

你話過討厭我同你嘅相處一式一樣，唔思變唔諗未來，咁樣食飯唔通就唔係好似早已經設定好程序嘅程式咩？

落車小跑去食飯嘅地方，咁啱下兩張就到我哋。心裡面有啲慶幸，如果佢入去坐低先，少不免又要黑面一陣。我跑到佢面前，佢下意識抬起手睇咗下錶。



「望下食咩。」佢指住面前嘅Menu，又自顧自低頭睇電話。

好想問一句，喂，喺你面前嗰個人，到底對你仲係咪特別嘅存在？