【甜/真人真事】我是他的常餐情人: 五十七

第57章
我係港島嘅末端漫無目的地遊蕩，由同佢行過嘅斜坡慢慢行上半山，步上橫街隱秘嘅石板梯級，闖入山上遺世而立嘅獨立畫廊，攀到開始冒汗慢慢落翻去平路。人行山終會行到頂點而不得不落山回到自己所在嘅地方，無論路途係幾星嘅難度有幾多風景也好，都只不過係山嘅過客，佢亦唔會因為你有努力而挽留，因為經過佢嘅人多的是。
天色開始暗，夏末嘅微風伴隨住細雨打落我身，平時三點一線唔多會露天嘅我根本唔會帶遮，唯有疾步跑向電車，同上一次唔一樣嘅係，無一個人可以同我共享電車行走時打開窗嘅愜意，有嘅只係風打落頭髮嘅濕涼，落雨係個好理由，可以拉高窗，否則無佢體溫嘅熨帖我會有點凍有點若有所失。

「喂近排無咩聲氣嘅你？」叮！阿熙嘅msg打斷咗我懶係傷春悲秋嘅思緒。
「我決定以後唔同Issac糾纏了。」我update佢。
「咁乖，終於肯同男朋友結婚？」見到佢打緊字，又變翻online，再offline，幾分鐘後覆咗我呢句。

係，無錯，我一直都唔肯同Tony plan結婚嘅嘢，唔知道係未夠大個，定係佢始終無令到我有結婚嘅慾望，一紙婚書，係甜蜜嘅佔有亦係約束，我唔想被佔有、更不會被佢約束。



「可能同佢冷靜下，諗下仲要唔要係一齊。」我深吸一口氣，預先同佢講咗今晚準備講嘅說話。
「咁，我電話24小時等你打嚟。」