【甜/真人真事】我是他的常餐情人: 五十六

第56章
只要係佢旁邊，我每一次諗好嘅劇本都會被我嘅膽怯擊碎，數唔到有幾多次我想好好抱一抱同佢講再見，但見到佢又俾無數嘅藉口自己，不如等下個月忙完project啦，可能佢會有耐性啲對我，不如等過咗生日先做決定啦都未大一歲，不如等21日啦，我就會養成習慣唔理佢，我俾好多好多理由自己留底，但見到嘅就只係佢越來越理所當然地消費我嘅好意。
我走過同佢行過嘅路，回憶最曖昧亦最唔骯髒嘅時候。係公司附近，佢當我小朋友咁同我去買奶茶，同我講唔鐘意飲呢啲嘢但公司附近間鋪嘅白桃烏龍好好飲，明明就唔太熟但格硬要我用佢枝飲管試。
行過海邊大家不發一言地望住海但一齊相處嘅時間好平靜好舒服，炎夏嘅海風其實一啲都唔寫意，額角會沁出汗水心跳會加速，但兩個人之間要進未進嘅關係令人流連忘返，然後太陽沉沒夜色蔓延，霓虹逐漸亮起嗰下，佢話俾佢抱一下，嗰一下以後就一發不可收拾。
朋友同我講，其實就算係情侶分手都用唔著好似離婚咁需要協議，分手、斬纜其實都係一方放手，另一個被迫接受，經過咁多其實要處理嘅唔單單係我同Issac扭曲嘅關係，而更應該係解決翻源頭——我係Tony身上得唔到足夠嘅關注，自由度過高先會滋生嘅不受約束。

「食飯嘛？」我問Tony,
「ok.」一如往常地簡單，但同往時既結尾應該不一樣了。