【甜/真人真事】我是他的常餐情人: 五十五

第55章

我走去床度拎起電話，通知欄空白一片，呢刻我都講唔清楚我到底係度期待咩。係背叛過後走到走投無路總會有個人係原地等待，定係其實我係Tony心目中都只不過係一個好似到咗歲數就要配備嘅配飾係唔係我都無所謂？

放低電話，行入洗手間吹乾頭，佈滿蒸汽嘅磨砂玻璃隱隱約約透出Issac嘅身影，只係一門之隔我都無勇氣推開再整濕個頭。只係隔著一度門，佢亦無再問我要唔要同佢一齊沖身，或者我地都清楚知道，我地中間根本就唔係打開門就可以相伴嘅關係。

我上床，近乎病態地將電話擺去更加遠嘅枱上面，擺底嗰刻iPhone毫不知趣地自動著起明明係空無一物嘅mon，機器永遠會唔顧人感受逼你面對現實。往往我哋以為嘅後著從來都唔係最佳選擇，只係無奈接受下嘅唯一選項。

我上床熄咗我嗰邊嘅燈，用兩個枕頭夾住自己，下身蔓延開嘅疲倦同酸軟、恰到好處嘅冷氣溫度、吹完頭透著餘溫嘅頭髮，揉捏成倦意。



或許係整個星期都埋首工作透支太多體力，到我醒嘅時候經已係接近朝早7點。覆蓋係頭上面嘅枕頭一早已經被佢拎走，仿佛唔想驚擾我一樣，佢係背對住我訓嘅，如果唔係易醒嘅我可能會中途扎醒再失眠到天光，我輕手輕腳落床梳洗，行出嚟收拾下行裝，佢聽到細碎嘅響動有小小想醒，我都行過去捧住佢塊面錫咗一啖，吸一口毒，以後即使心癮起都要忍手唔去觸碰。

「我走啦，你繼續訓。」

「嗯我地一齊訓多陣我揸車送你？」

「唔洗啦仲好早，你繼續訓，byebye」

再見啦Issac。