【甜/真人真事】我是他的常餐情人: 四十九

第四十九章
「你真係要講落去？我寧願你話你無鐘意過我，唔係我又會誤會。」

「我都唔知。」佢別過頭，而我再次無用地浮起一絲希望。
或者有定無鐘意都唔係重點，有啲行為係你心裡面真係有對方既話就唔會捨得做出嚟，我一向都知道，愛可以好草率，可以嚟得快走得快，明明咁謹慎嘅我點解都會墮入呢種困局，我唔明白。

我就好似一個自以為好難玩嘅遊戲，偏偏遇到一個打機天才，人地輕而易舉地打爆機，而我好快就成為同其他戰利品無分別嘅存在。

阿熙講得好啱，其實女仔真係可以係愛情入面好無腦，少少嘅關心同把戲都會令佢頭暈轉向，作為玩家嘅男仔其實一切都睇在眼內。



我清楚知道，我對Issac只不過係最方便嘅玩物，但點解到佢猶豫有無鐘意過我，嗰一秒嘅遲疑都會令我竊喜？

如果一切可以重新嚟過，我變得唔係咁容易得到，又會唔會令你有多少少珍惜我，至少場遊戲唔會咁容易通關，至少係打爆機之前你都會心心念念想要翻屋企開機玩。