【甜/真人真事】我是他的常餐情人: 四十八

第四十八章
「食少少嘢先？」佢見我行出嚟好自然咁問，

「嗯..休息下先。」我無咩表情地坐低，睇住佢自動自覺咁擺佈啲嘢食，再細心地拆開筷子削走上面嘅木刺，以前我同佢關係未變調之前都係咁。

「其實你嬲咩？」講完公司啲無聊嘢佢無啦啦抬起頭望住我問，

「無啊只係睇清楚咗啲嘢，例如我地關係嘅盡頭係咩，你對我又係點。」我有點睇透左地講，

「我唔明其實，我哋夾咪得。」男仔諗嘢可能唔會好似女仔咁分唔清感情同愛，我唔係要成為佢邊個，而係我覺得我咁落去，佢對我嘅冷待有幾多肉體嘅快樂都cover唔到。



「其實呢我沉咗你船。」我鼓起勇氣講，但係無勇氣望佢表情嘅變化。

「呃..咁我都無當你係普通同事」佢尷尬地R住頭講，

「我知道啊，咪極其量我地嘅關係就去到FWB，我講得有無錯？」我深深吸一口氣講。

「其實我真係唔知，我靜係覺得同你相處幾舒服。」佢突然拋出一句渣男名句，我有啲哭笑不得。

「咁當初點解要同我變得咁close？其實我一直都覺得係你覺得我易食，我又聽你話可以俾你玩咁多嘢。」



「我真係無諗咁多，純粹覺得成日OT我哋又好好傾，你個你又幾得意，又有時候想take care下你。」

「或者你對我有好感，但係都未去到你想獨佔我係咪？」我心入面想問嘅係：未去到想我做你女朋友係咪？

「咁你都有男朋友啦唔係咩？我見到你同第二個一齊有就算會唔舒服都好，我地註定唔會係大家嘅唯一。」所以從遊戲一開始，大家都預見到結局。