【甜/真人真事】我是他的常餐情人: 二十九

第29章 你應該知點做
Sara陪我一齊行去地鐵站，作為朋友嘅佢除咗陪我一齊痛鬧Isaac以外佢都唔能夠改變到啲乜嘢，有時我喺度諗到我去到佢嘅歲數我係咪都會變得同佢一樣可以將性同愛、及時行樂同公私分明都分得咁開。

返到屋企附近好彩附近間藥房仲有開，我行入去問佢要左一粒事後丸。返到屋企屋企人已經入咗房我返到去一下達左落張床到，忽然間覺得好疲倦。

「好似呢排都好難見到你。」呢個時候Tony send咗一個咁樣嘅message俾我。
「做嘢忙吖嘛，我先啱啱返到屋企咋。」
「咁傾唔傾一陣電話？」其實已經夠煩㗎啦佢仲要係呢個時候嚟搵我。

我掉低左部電話走去沖涼，呢個時候我根本冇心情理佢，我哋兩個一齊咗咁耐，工作上遇到啲咩問題我永遠都好難同佢分享。我哋年紀都唔細，但係好似想行去下一步亦都遙遙無期。


所以當Isaac出現嘅時候呢個肯教我，佢呢個聽我心事嘅人好快就吸引到我，再加上佢之前刻意營造出嚟嘅溫柔同曖昧，有比較之下雖然年紀差唔多，但係Isaac有佢自己專長嘅嘢，係公司都備受重視，更加唔好講佢咁既年紀就已經買咗樓。
我從來都冇期望過我同Isaac有乜嘢進一步嘅發展，我無意係佢女朋友身邊搶走佢，只不過係想佢可以俾返些少耐性同埋以前有嘅溫柔俾我，或者呢個係我要彌補我係男朋友身上得唔到嘅嘢，我只不過係想有個人可以分享我嘅工作、分享我嘅喜樂，係人生嘅方向上面亦都可以比到一啲有用嘅意見比我，我鐘意嘅或者係一個理想中嘅男朋友，而最接近嘅就係Issac。

「都有啲夜啦你早啲沖涼瞓覺啦。」沖完涼出嚟定下神食咗粒藥，我再覆Tony嘅message。此時此刻嘅我離佢好遠好遠，喺我身上面發生咗翻天覆地嘅變化，佢似乎都感受唔到一絲一毫。我以前有問過佢有冇擔心過我公司會有人接近我，佢話以我嘅性格唔似會做咁嘅嘢，或者佢真係仲未完全了解我啩。

「sara係咪知道左啲咩？你應該知道要點樣去處理？」Isaac都send咗一個message過嚟，係公司原本就好易俾人撞到，係佢自己按捺不住然後又將呢個責任歸咎於我，其實Sara講得冇錯佢的確係一個唔值得嘅人。