【甜/真人真事】我是他的常餐情人: 二十八

第28章 佢當你係玩物
Sara拉住我，望一望從後追上嘅Isaac，加上雙眼通紅嘅我，不嬲細心嘅佢大概都估到發生咩事。

「你等我入去攞一攞返啲嘢我一陣同你搵個地方坐低。」Sara沖左入去攞嘢途中仲要睥一睥Isaac，佢本身要追上我但係礙於Sara喺度都唔好同我糾纏，就急急腳行返去佢個位嗰邊。

經過Sara咁樣嚇一嚇，我情緒反而冷靜落嚟，望住部𨋢鏡面倒映出嚟嘅自己，望上去都冇乜大礙姐咁一陣間應該可以瞞天過海啩？Sara出到嚟拉住我行去公司附近嘅一間Cafe，

「其實我呢排都覺得你有啲唔妥，你願意講就講啦。」佢一嚟就劈頭講咗呢句。

「其實冇乜嘢啱啱只不過係project上面有啲拗撬…同埋我近來壓力有啲大。」我仲諗住扮冇嘢發生。



「其實上次我見到你同Isaac一齊喺15樓出嚟。」佢今次睇嚟唔會咁輕易俾我瞞天過海。

「其實我知道Isaac平時特別錫你同埋肯教你嘢，你對佢應該唔只係崇拜咁簡單掛。」

「其實只不過係我單方面鍾意佢，佢對我一啲興趣都冇。」我迫於無奈咁講咗一句。

「咁係你哋之前成日出去飲嘢，酒後亂性咗？」Sara唯一諗起可以出事嘅位就係我哋經常OT之後出去飲嘢。

「其實唔需要飲酒，係我本身就冇道德觀，我對佢有興趣所以開咗綠燈俾佢。」我好無奈咁講。既然佢都撞見過咁我只能夠將我哋嘅關係簡單話俾佢聽，其實就係SP並無其他。



「但係其實你身邊明明有得揀，就算Keith都好歹係單身，都會好過同佢一齊。」因為佢係我嘅朋友，所以佢唔能夠相信我嘅性格點解能夠接受一段咁嘅關係，佢知道我身邊不嬲都唔缺男仔，我想講係我鐘意佢在先，但就算以愛為名唔通出軌呢件事又會容易啲入耳咩？

「佢係公司咁對你根本就唔顧你感受，你都識講你哋相處嘅節奏完全由佢掌控，佢又唔介意你同第二個男仔耍花槍，其實你自己心知肚明你只不過係佢嘅玩物，你仲要同佢糾纏落去咩？」