【甜/真人真事】我是他的常餐情人: 十八

第十八章 近乎放縱既信任

「喂衰妹走咗未啊，Keith 話一齊食飯喎你一唔一齊？」我即刻拎出電話打俾Sara.,
「不了，今日真心攰，返屋企食跟住早啲瞓。」Sara已經上咗車準備返歸。
「你男神唔一齊食咩？」Sara係公司唯一一個知道我好崇拜男神嘅人，不過我哋嘅關係收得好埋其他人都唔會聯想到，所以我間唔中提起Isaac ，Sara都係覺得純粹係對隔離Team大神嘅崇拜。

「唔知佢啊好似仲未搞掂啲嘢，如果Martin都唔得閒，就變咗我同Keith兩支公食唉。」我行埋一邊講，Sara都知知地keith同我嘅嘢。

「其實Keith哥都唔差姐，enjoy啦你」Sara好鬼煩成日想將我推俾keith.
我都冇佢咁好氣，行返去佢哋嗰邊見到得翻Keith同Isaac，我望住 Isaac，見到佢好尷尬咁摸一摸太陽穴，


「我仲有啲手尾未搞完，一係你地食住先我再聯絡你地？」我又明白嘅，係工作同我兩者之間我又點會係你選擇嘅一方呢？

Keith即刻好開心咁打開個OpenRice睇吓附近有咩好食，其實公司附近都食到熟曬，
「其實搭一兩個站都唔怕，反正我哋返屋企都順路。」我特登講到好似好雀躍要同佢食飯咁，眼尾稍一稍Isaac，佢嘅拳頭握緊又放開。

其實當年我同佢咪又係普通同事咁樣OT完一齊食飯，都只不過係同事之間嘅正常相處姐。撇除Keith對我有興趣呢件事，有少少鬼仔性格嘅佢其實都係一個幾好傾嘅人，我哋年齡相近，政治理念都好夾可能學Sara話齋佢先係一個合適嘅人選。

係行去食嘢嘅途中我拎電話出嚟WhatsApp俾Tony，同同事一齊食飯，近期好似經常忘記咗佢嘅存在，好似一般嘅老夫老妻咁或者大概知你身處邊度就唔會再有過多嘅過問，你一種近乎放縱嘅信任造就左我出軌嘅空間，可怕嘅係由始至終我一啲內疚都冇，我同佢俾大家嘅空間連花心思去隱瞞嘅需要都無。

我哋行去公司附近比較隱蔽一間台灣人主理嘅台菜， 有適合女仔嘅小食亦都可以叫啤酒，睇嚟Keith對於同女仔食飯真係駕輕就熟。