《我在女校教書的日子》: 4.
「好，我地就去東京。」
「我地？」
「去咩東京呀，你講清楚啲好喎麥Sir，我報警拉你架，你個變態。」
「你報囉，報完都無用架啦，不過遲啲你就知咩事，哈。」
「哼，神神祕祕咁。」
帶著一絲興奮，卻失落的心情回到家中；東京，這個地方，不是我們約定過同遊的地方嗎？
「叮～」
「Miss Yu：麥Sir，校長有無同你講我地要帶遊學團啊。」傳訊息來的，原來是Miss Yu。
「我：有呀，不過詳細未知係點喎。」
「Miss Yu：你介唔介意我打比你啊？校長個秘書啱啱send左啲detail比我。」
「我：好啊。」
「喂，你做緊咩呀。」想不到，Miss Yu在電話裡的聲音是如此溫柔。
「無啊，諗緊點幫文學班同學提高返啲分數。」
「哦，加油呀，文學呢科本身就難；好彩同學仔又唔係蠢，係懶左少少啫，我相信你可以教好佢地架麥Sir。」Miss Yu的鼓勵實在使人振奮，但想起嘉柔那傢伙便…
「你有無諗過幫佢地補課啊？」
「補課？」據我所知，在聖馬蘭中學需要補課的同學，成績只有差到每科不及格的才需要補課，連嘉柔也未及補課的資格。
「係呀，星期六日咪搵佢地補課，做下練習咁囉。」星期六日？不是不行，但實在不想唯一的空閒時間也放在學生身上…
「都得既…」
「你再諗吓啦麥Sir。」
「嗯，好啦。」
「係呀，秘書同我講呢，今次遊學團想我地自己揀地方，行程等等，錢就學校出喎。」竟然？學校以前的遊學團也是學校負責所有事情，隨團老師亦只是負責照顧學生而已。
「你有無話諗住去邊啊麥Sir。」我隨即想起嘉柔說過的東京。
「Um…東京？」
「好啊，我都諗過東京架，不過唔知麥Sir你肯唔肯咋。」
「點會唔肯啊。」
「我以為麥Sir你成日去旅行，東京都去唔少，所以唔會揀東京。」
「你肯去就好了，我地一齊去肯定會好開心！」我們？
「Er…我意思係話同學生一齊去肯定好開心，好難忘。」
「係呀，我都好期待。」
「係呢，你諗住揀咩學生去…」
我們一直談，一直談，談到去哪裡有好吃的刺身，隱世的壽司店，還有很有日本風的居酒屋等等，實在無所不談，但我們真的有這麼多自由時間嗎？
「好啦好啦，我地都傾到好夜啦，我地遲啲再傾？」
「好啦，我地快啲傾完，快啲搵當地機構聯絡，跟住就可以公布比同學聽。」聽著Miss Yu的聲音亦能聽出她喜悅期待的心情。
「好，Goodnight啦。」
「Goodnight。」
東京之旅，開始有一點期待。
「各位同學，今日文學堂會出去考察，考察完記住寫返篇文。」我們有序地登上旅遊巴，前往目的地。
「麥Sir，今日我地去邊啊。」經歷過幾次的考察，她們對要作文的怨言也少了許多。
「去機場。」
「機場？咁遠。」嘉柔抱怨到。
「係麥Sir我好鍾意既地方，當中睇到既人離離合合，百感交雜，等陣到左你地慢慢觀察啦；所以，今日既題目，係離合。」
「麥Sir，你成日去旅行架？」嘉柔走到我座位旁邊，偷偷地問我。
「無呀，做咩。」
「哦…咁你又知機場點既。」
「你真傻定假傻，咁平時都可以去機場架嘛，係個到我都攞到好多寫作靈感。」
「你平時除左寫野仲識做啲咩架，你古代人黎架？」其實，我對其他事物也沒什麼興趣，除了文學，寫作還有彈吉他，其他事與我有千萬深淵距離之隔。
「Um…平時彈下吉他咁囉。」
「哇，你識彈吉他架，實溝死女啦。」真是天真，如果彈吉他能夠容易結實女生，我，便不會維持單身漢這個稱號直到現在。
「彈吉他你就鍾意人架啦咩。」
「咁識樂器點都會加啲分既，得閒彈下比我聽啊麥Sir。」嘉柔裝著可愛哀求的樣子。
「唔，得，喎。」
「你咁殘忍架，哼，唔同你講野，我搵返千雪，都係雪雪最好。」說畢她便回到千雪旁，而千雪則帶著耳機，靜靜地看著窗外的風景。
「咁多位同學起身啦，我地到機場啦，而家時間三點五十五分，五點五十五分係到等返大家。」
「你想去邊到行呀雪雪。」嘉柔挽著千雪的手臂走過。
「對唔住啊嘉柔，今次我想自己行下。」在旁偷聽到這句的我感到有點愕然。
「好啦，唔緊要啦，我同敏敏佢地行。」
我瞥著千雪的背影，慢隨著她，她的背影好像散發著一絲的不悅。
千雪對這裡彷彿很熟悉，不用十分鐘便走到機場的觀景台。
「咦，麥Sir？」
「你又識黎呢到既。」
「係呀，之前成日自己一個黎。」
千雪接著說。
「覺得，望住啲飛機升降，望住個天空好舒服。」
「我都覺。」我依在欄桿上，看著飛機的升降，羨慕著整天可以在天上翱翔的人，他們，能夠享受人生唯一自由飛翔的時間。
「你，呢排忙唔忙啊？」我問千雪。
「還好啦，教小朋友嗰邊都越黎越上手。」
「而家住劏房，好彩租金都唔係好貴。」千雪亦望向天空，而我偷偷望著千雪的側臉，如此近的千雪，有點動人。
「如果，我星期六日幫你地補課，你地想唔想？」說罷，千雪便看過來，我也立即將視線轉到飛機跑道上，希望千雪沒有察覺我偷看她。
「可以啊，我都覺得自己成績差左，想把握時間追返啲成績。」千雪果然是天資聰穎的學生，勤奮學習，真希望嘉柔有她一半。
「係到傾咩傾得咁開心啊。」一把熟悉的聲音突然插入我們的對話。
「林嘉柔，你又識上黎呢到既；你諗好點寫你篇文未呀，唔好再亂寫啲野比我啊，你上次去山頂同我寫食左咩好野，係咪想我罰你寫多篇。」
「咩喎，你啲題目咁難，點寫喎。」
「所以，我諗住幫你地補課，可能下個禮拜就開始，我啱啱都同左千雪講。」
「你淨係同千雪講，你偏心啦你，要佢都唔要我地啦，嗚嗚。」
「我地唔好理呢個衰人，我地走。」千雪彷彿有話未說的樣子，但嘉柔和千雪便漸漸從我眼簾底消散。
我再次望向跑道，看見一架土豪金的私人飛機起飛，便想起千雪，她究竟是否因為背景沒有她們一樣富貴，不是貴族人家，而遭受排斥；還是，千雪只是單純的不喜歡與別人交流。
畫面再次轉到學校...
「喂，林嘉柔，你做咩同呢個死窮鬼一齊玩啊，成陣酸臭味。」一個穿著聖馬蘭初中校服的女生說。
「喂呀，唔好咁講野啦，識唔識得尊重人啊。」林嘉柔為林千雪反駁。
「你傻左呀，你識左佢幾耐啊，為左佢鬧我？」
「佢又係人，你都係人，你只不過有錢啲啫，唔應該咁樣貶低人地生存價值。」
「佢？佢地底泥咋，佢入到黎聖馬蘭都係因為佢阿媽…」
「你講夠未。」林千雪說。
「我未喎，我係要繼續講啊，你呢啲咁既人啊，又無錢，又無地位，留係聖馬蘭都係影衰我地咋。」
「我地走啦，唔好理佢地。」林嘉柔牽著林千雪離開現場。
「嗯。」林千雪此時雙眼已經通紅，只不過，用僅餘的尊嚴，把眼淚藏在心底。