《我在女校教書的日子》: 2.

 
「麥Sir，可唔可以問你一個問題？」
 
 
「可唔可以帶我返屋企？」
 
 
這個問題出於林千雪口中，實在令人驚心動魄，看著林千雪苦苦哀求的樣子，我實在不忍心，我愣了一愣後，回答千雪。
 





「你係咪同屋企人嘈交？」
 
 
「如果有咩問題，我可以偷偷地借錢俾你租酒店住。」當然，作為一個老師，本於良心，是不會將良家婦女帶回家。
 
 
「唔係。」千雪擰頭否認。
 
 
「咁係咩事啊，你方唔方便同我講？」




 
 
「我無屋企人，無屋企返。」
 
「咁…Miss Yu知唔知？」千雪擰頭。
 
 
「咁嘉柔呢？」
 
 




「佢都唔知。」嘉柔和千雪據說是情同姊妹，竟然連此事也不知。
 
 
「我唔想麻煩到嘉嘉。」千雪真是體貼，雖然無父無母，但仍有如此家教。
 
 
「哦…但係你都唔可以無端端就去人屋企。唔係，我意思係，你可以問我點幫你，但係唔好直接同人講去人地屋企訓架嘛，知唔知？」
 
 
「嗯。」
 
 
「一係咁，今晚我就租一間酒店比你訓，我再幫你諗辦法啦。」
 
 




「多謝你，麥Sir。」
 
 
「但係呢件事，可唔可以唔好同人講？」
 
 
「梗係可以啦。」我當然不會將我幫女學生租酒店一事宣揚出去，我可不想成為全校最快被辭退的老師。
 
 
微風輕輕吹過，泛黃的街燈照射著我倆，親密的身影碰肩同行，只可惜，我們不是情侶。
 
 
「係呢，可唔可以問下，點解你會無屋住？你幾時開始係咁㗎。」看著千雪一路上都是低著頭，不知是害羞，還是傷心。
 
 




「琴晚，我比繼父趕走左。」
 
 
「咁，點解你會搵我幫手？」我沒有詳細問關於繼父的事情，以免勾起不愉快的記憶。
 
 
「因為，我唔識你。」
 
 
「嗯？」這個答案，讓我有點愕然，但認真思考起來，其實也沒錯。
 
 
「我係聖馬蘭無咩朋友…」
 
 




「做咩唔搵Miss Yu幫手既？」
 
 
「好似係呢到。」千雪似乎有意避開我的問題。
 
說畢，我們就到了酒店側門，始終，我們是師生，她，還穿上校服，幸好我有外套給她遮擋。
 
「你入去啦，我幫你搞好晒架啦，有咩事打比我啦。」
 
 
「嗯，多謝你。」看著千雪的背影漸漸遠去，我也安心許多。
 
 
就這樣，我跟千雪，好像展開了一段微妙的關係。
 




 
「咳咳。」當我轉身，我卻見到了一個最不願意見到的人，也不知道，為什麼老師總是喜歡用「咳咳」來作句子的開頭。
 
 
「咁啱啊，麥Sir。」不知道為什麼梁Sir說話的語氣總是帶點諷刺的氣息。
 
 
「啱先你同邊個黎酒店啊。」
 
 
「無啊，我送我個表妹黎住，佢係外國返黎，咁廢事住係我到啦。」
 
 
「乜你表妹都係讀聖馬蘭學校架咩？」糟糕了，給梁Sir看到校服，只希望他沒有看到是千雪，他是校內出名的劊子手，是校長的宰相，一旦知道我給千雪租酒店，他肯定將事情無限放大，甚至把我聯想為強姦犯，他也是有這個膽量。
 
 
「啊…係呀。」
 
 
「我仲有簿未改，走先。」我趕快找個藉口離開現場。
 
 
「麥Sir。今年，我希望見到中國文學攞5或以上既比率高過80%。」
 
 
「係既係既，我會盡力鞭策佢地。」
 
 
梁Sir給我一個奸詐的微笑便登上他的寶馬座駕馳騁石屎路。
 
 
「叮！」電話傳來一個訊息。
 
 
「千雪：今日真係麻煩晒你啊，我會儘快搵到工，然後還返啲錢比你架啦。」
 
「唔急啊，你有錢先還比我啦。」本來還想打上「嘻嘻」，但這樣好像有點變態，還是罷了。
 
 
「早啲訓啦你，聽日仲要返學。」
 
 
「知道，Goodnight。」
 
 
在這趟巴士途程上，我不斷想著，我和千雪這件事什麼時候才會完結，始終不能夠每天給她租酒店住，一旦比人發現，誤會了，我便身敗名裂了，不行，我要想個辦法。
 
 
一日之計在於晨，喝上一杯咖啡便踏上這煉獄之旅。
 
 
說真的，我享受教書，但討厭辦公室政治，尤其是這種名校，對於我這種凡人，明爭暗鬥實在不適於我。
 
 
從昨天晚上到現在，我終究在想千雪睡得怎樣，她能好好休息嗎，她需要輔導嗎，我不斷提醒自己只是個老師，雖然心裏擔憂，但卻好像無能為力。
 
 
「喂，墨子Sir！」一把活潑精神的聲音把我帶回現實。
 
 
「早晨喎林嘉柔。」
 
 
「叫我嘉嘉啦，一係叫我柔柔。」
 
 
「我係你老師，鍾意叫你咩就咩，OK？」
 
 
「麥梓賢，你個衰人。」她又扮了個鬼臉，便跑上課室，只剩下一陣青春的風。
 
 
除了教高中中國文學，我還要教初中體育，只是因為我曾經在大學選修課修讀過體育便順手牽羊，叫我教體育；但教體育實在無聊得很，看著他們在操場奔跑，打球，揮灑著熱血的汗水，一個一個無知，天真的學生慢慢步入鯨魚的世界。
 
看著他們，就如看到自己中學時的樣子，還記得自己熱愛足球的程度可以連午飯都不吃，一整個小時就奉獻給足球，真傻，真美好…
 
「夕陽，你曾陪我飛行，風霜，你曾阻我前行；
直到今天，我成為了他們的夕陽，驅走他們腳前的風霜。」
 
 
這是我在教授體育課無聊時寫下的詩，想起當時的良師，感激他們，不論或晴或雨，他們都盡心把我教育成人…
 

「叮叮叮叮…」呼，終於能夠上文學課。
 
 
當我踏進課室時，我卻很自然地望向了千雪的位置，哈，真奇怪，為什麼我會這樣做呢。
 
 
但更奇怪的是，這天，她卻沒有上學，是什麼原因呢？是病倒了？是不高興？還是怎樣？
 
 
「麥Sir，你發咩怐愗啊。」嘉柔又把我帶回來。
 
 
「無呀，我諗緊上次教到邊。」
 
 
「林嘉柔，你講下上次講到邊，今日千雪無返，佢救你唔到啦。」我擺著一個得逞的樣子。
 
 
「咪夜行船囉，當我傻架咩，哈。」
 
 
「我係咪好醒目呢，快啲讚我啦。」
 
 
「係啦係啦。」
 
 
「今日我地就教…」
 
 
這一堂四十分鐘的課，好像上了四十個小時，一有空閒便想起千雪，我不會是喜歡上她吧，不不不，我已經有喜歡的人了，我喜歡的人雖然不在香港，但她總會回來的。
 
 
放學時，我便跑出門口，想也沒想便坐的士到酒店，其實我也不知道什麼驅使我如此緊張，也許只是出於老師的責任而已。
 
 
「麥Sir，跑咁快做咩啊，搵雪雪呀？」本來我不想理她，但她最後一句說話讓我停下了腳步。
 
 
「你話咩話。」
 
 
「今日你嗌阿雪做千雪，但係嗌我就係林嘉柔，你都幾偏心，你講，你係咪鍾意左佢！」她突然踮起腳哄到我耳邊，此時無意聞到了嘉柔的氣味，弄得我雙耳通紅。
 
 
「喂，呢到學校門口黎，你冷靜啲。」我立即拉嘉柔到旁邊，幸好當時沒人經過看見。
 
 
「咁你做咩咁趕啊。」
 
 
「屋企人唔舒服啊，要返屋企照顧佢，得未？」我也未曾想過自己會向自己的學生說謊。
 
 
「哦，好啦，你走啦，我批准你離開，嘻嘻。」
 
 
我沒有回頭便登上的士離開，想不到，在我看不到的視覺，嘉柔卻低下頭，彷彿帶點憂傷。
 
 
「叮噹。」


「叮噹。」
 
 
我按了三四次，她始終沒有回應。
 
 
我唯有打電話給千雪。
 
 
「鈴鈴鈴…」電話在裡面，看來她沒有出去呀。
 
 
「喂…麥Sir…」千雪的聲音十分虛弱，看似是病了，而且病得很嚴重。
 
 
「我係門口啊，你放唔方便比我入黎啊？」
 
 
「好…你等等…」千雪緩緩走到門前，把門拉開，我才看到這一天我最期待的人，原來，這天，我期待著看到你。