《遊夢玩家》［夢想］［網遊］［電競］（全程廣東話）: 第三章 何方神聖？

時間過咗一粒鐘，新Server有人打出無限暴擊嘅消息滾得越來越大，無論係喺高登定係其他App嘅遊戲討論區都討論緊，到底係咩人打出咗無限暴擊，當然亦都有人一開頭就已經講咗答案。

「話說今日係遊夢網吧見到平時個店員今日係新Server嗰度打咗無限暴擊。」

「係唔係真㗎？」

「你話會唔會係三大精算師搵咗其他拍檔呀啦！」

「有機有機！始終仲有一個精算師羅素佢仲未有partner。」





「但唔排除係現任高手開其他帳嚟玩嘅咋喎，始終比公司困住左都唔係一件好事⋯⋯」

業界嘅黑暗睇嚟淨係度慢慢浮現緊，的確曾經試過有職業選手玩其他帳號結果俾人發現，但歸根究底選手之所以會咁樣做都係因為呢一場遊戲已經唔係佢哋想像中好似當年咁輕鬆，咁好玩，而係已經變咗一個商業嘅一樣產品。

係另一邊，創神遊戲公司嘅趙薇亞本身喺度通宵研究新版本嘅數據，已經攰到冇得再攰嘅佢本身並無打算打開網頁繼續再搵新嘅數據，打算就咁樣喺公司嗰度訓，但無意間係佢諗住瞓之前彈左一陣遊戲新聞。「無限暴擊係新Server出現？對方究竟何方神聖？」咁嘅字眼彈左係畫面上面，本身呢位女仔並唔太在意，始終佢只不過係一位Builder，一個比金錢困住左野Builder。

雖然佢十分之渴望自己可以有用武之地，甚至希望打出無限暴擊，但呢啲只不過係幻想係冇可能實現嘅事，佢只不過係因為佢嘅價值被公司發現，只不過係因為咁啱得咁橋佢做到。

「你瞓陣先啦，唔好理呢啲啦！呢啲唔係你應該理嘅事。」身為佢男朋友嘅 Creator-創神隊長周永祺完全唔希望佢插手有關任何開發部以外嘅事情。





於是身為聯盟設計師嘅佢，已經對遊戲並冇再多嘅幻想只係認為製造出嚟嘅嘢只要帶到金錢利益俾公司就得。

另外一邊哈帝斯俱樂部，一位十分年輕嘅細路正拒絕緊公司嘅工作，佢希望可以花啲時間去睇一下啱啱新聞上面嘅短片，睇吓對方有啲咩習慣可言，從而判斷佢下一步嘅動作，對於佢來講最刺激嘅莫過於預判敵人嘅動作。

「我求下你啦俾我睇吓啦⋯⋯」細路始終係細路，想得到嘅嘢始終希望得到，有陣時心事並冇顧全大局。

「你可唔可以唔好再咁無理取鬧啊！大把客人等住你出場呀！」面對着咁無理嘅要求，佢嘅經理人都忍唔住，只好停低喺半路鬧咗佢一餐。

「但係⋯⋯」細路打算以長期利益去說服佢嘅經理人，但係結果並唔係好得。





「冇乜嘢但係啊！一係去一係違約！」年紀輕輕嘅佢又點可以比到一大筆違約金，於是佢都只係可以妥協。

一個16歲職業聯賽最年輕嘅細路仔，完全敵不過公司嘅打壓，只能一直接受看似顧全大局嘅要求。

最後呢位聯盟預言家蘇奇華只好被迫去做陪玩嘅工作。

「喂？家姐⋯⋯」搭緊公司專車嘅孔榮丘，正打算就琴晚嘅新聞問吓被稱為聯盟教練嘅佢家姐孔榮妮。

「請喺必一聲之後留低口訊⋯⋯」點知佢都係唔聽佢電話，於是孔榮丘只好錄低口訊留低咗最近係遊戲發生嘅呢一件事：「最近出現咗新嘅無限暴擊玩家，我始終希望我哋可以攞出嚟一齊研究一下，一籌好似之前咁樣研究點樣對付佢同破解無限暴擊，我求下你呀聽我電話。」

最後佢發出左口訊，依然係專车上面留意緊有關最新遊戲嘅新聞，但其實令到佢在意嘅唔單單只係最新嘅呢一位玩家，更多嘅係佢嘅徒弟聯盟指揮官雷恆兵喺第九屆職業聯賽裏邊落敗嘅原因。

「孔先生！到咗公司啦！」如今落車嘅孔榮丘望住公司門牌上面「天際」兩隻字已經鼓吾起當年嘅嗰一份熱情同期待，只好默默咁樣返番公司裏邊商討策略。

「叛徒⋯⋯」另一邊佢家姐已經收到左訊息默默望住個天，完全搞唔明呢個細佬諗住搞乜嘢。





「Boss！歡迎返嚟，你今日嘅行程大致上都係帶領隊伍進行每日訓練，下晝會叫你出一出去開琴日果場決賽嘅記者會。」上午時分秘書喺度同Federation-聯邦嘅隊長王安解釋今日嘅行程。

「咁冇咩特別姐，等陣幫我沖杯咖啡入嚟！」王安亦都吩咐秘書沖杯咖啡入嚟佢哋嘅訓練室。

「隊長早晨！」齊整嘅請安，令到清晨更加之有活力，只不過如果呢啲都係係權威嘅壓迫底下所出現嘅一個現象呢？

「繼續訓練，邊個叫你地停㗎！」王安完全處於權勢嘅最高峰，命令住佢嘅隊員不停訓練佢哋嘅技術同協調性。始終經過琴日一場敗仗之後，佢明白下年一定要贏返嚟，為此佢都有些少壓力。

「隊長啊，根據報道琴晚又多一位可以使用無限暴擊嘅人。」隊伍裏面一個後生仔講咗出嚟，王安係佢嘅判斷下認為十成九都係呃人嘅啫，於是狠狠咁樣講咗一句：「又唔見你都可以練到咁勁，繼續練習！」

但如果論壓力依家坐喺王朝娛樂公司嘅陳霆洪所感受嘅壓力絕對比王安仲要多，佢冇辦法唔以吸煙嚟麻醉自己，佢嘅軍師秦偉信見佢咁大壓力只好用琴晚果場比賽嚟安慰佢。

「使乜咁緊張啊，琴晚咪贏咗囉！我哋今晚成Team人食餐好㗎啦一齊！」秦偉信拍着陳霆洪嘅膊頭叫佢唔使擔心，但係其實佢擔心嘅並唔係因為琴晚果場比賽，佢更加驚嘅係有人會捲土重來。





「諗返起當年羅素，我，你仲有佢，一齊打篇天下無敵手，我驚嘅並唔係其他人而係得佢咋⋯⋯」 陳霆洪講出左心聲，其實佢就只係驚某個人捲土重來。

「聽講佢去咗網吧做小店員咋嘛，有時候玩下遊戲show下啲操作都正常啦！冇咁易嘅，要出返嚟⋯⋯」秦偉信望見陳霆洪越嚟越苦惱個樣都係決定唔勸佢啦，留咗一句話：「今晚我哋去蘭桂坊嗰度飲呀要嚟就嚟啦⋯⋯」

最後凝望住黃昏露出半點憂愁，到底自己係為咗咩要繼續玩一款遊戲，佢唔知道，甚至佢哋都唔知道⋯⋯