由O Camp組爸組媽變左做真正既夫妻: Chapter 91

唔經唔覺，架巴士已經到左過左九龍，好快趣就到左DGS既巴士站。講返對上次黎呢到，應該係揸住架掃把佬接妹妹放學，今次就黎個三人行啦。

落左車，我同Claudia就送妹妹返DGS，呢間學校差唔多算係全港第一既女校黎，好多同學都出身於名門望族，非富則貴之高尚家庭。一般係呢到畢業既女仔，將來都會係社會名流，或者係專業人材。另外，DGS既女仔除左讀書叻之外，佢地係體育方面都出類拔萃，唔會比人覺得呢到既女仔係「書呆子」或「高分低能」，可以話係「讀得又玩得」。由於我地DBS同DGS都係由聖公會創辦， 又係全港比較有名既Band 1學校，所以我地既同學都會經常有接觸。我都係呢個原因先會識到Winnie，同埋重遇Claudia。

去到校園門口，有好多著住校服既女拔妹正在進入校園，呢個時候琪琪見到我地三個係到行街，就走過黎同我地打招呼。佢仲同妹妹係到手拖手返學。當然，琪琪見到我同Claudia著住校服約會，個反應有啲奇怪。

「勇哥，做咩同Claudia姐姐一齊著校服既？ 」琪琪問。

「拍拖拖囉！」我話。



「我地要重回少男少女時代啊嘛！」Claudia話。

「琪琪，我地入去啦！陣間Miss Ko話啦！」 妹妹就拖住琪琪行。 

我地望住前方，有一個行政套裝打扮，年約30幾歲既女人企左係門口，係到檢查同學仔既儀容，記低有冇同學遲到，我諗呢個Miss應該係訓導主任或者老師黎。而呢個Miss見到我同Claudia就望埋黎，態度仲要180度大轉變，好似陳方安生咁變得笑容可鞠。而Angela同琪琪就向Miss Ko打招呼後就入左學校。

「Hello，Miss Ko！我係Claudia Lam 林雅晴啊！」Claudia好有禮貌咁同嗰個Miss打招呼。

「Claudia，好耐冇見啦。做咩著住校服返黎既？ 」 Miss Ko話。



「見今日放假，就帶埋男朋友一齊返黎囉！順便送佢妹妹Angela返學啦！ 」Claudia話。

「哇你男朋友好靚仔啊！你係Angela Leung既哥哥啊？」Miss Ko問我。

「我係Angela既哥哥啊，Miss Ko你好！ 」我向Miss Ko打招呼。

「幾好啊，Angela有你既遺傳啊，跑步打波都咁叻。好啦我夠鐘入去啦，Claudia下次再約啦！」 Miss Ko話。

Miss Ko就入左去，由於而家係上課時間，加上我同Claudia因為唔係學生身份，所以唔入得去校園內。但Miss Ko都算好人，可以容許我同Claudia係校園門口到影下相，留返個記念。咁我地都明既，始終有學生係到，如果突然間多左個男拔仔，同埋多個染左頭髮既女拔師姐係到，一定會借啲意會炒作。而Miss Ko臨走前，堅持要同Claudia影相。我呢個男朋友就一定乖乖配合。



見到Claudia著住校服look既樣，簡直同日本既寫真女優完全冇分別，甚至仲靚過佢地，要有樣就有樣，有前有後，有笑容就有笑容。加上佢熱愛運動，我諗佢以前係學校一定好受歡迎，讀書又叻，運動又叻，性格又溫柔體貼，咁完美既女朋友可以去邊到搵啊？

Claudia係佢母校打完卡後，我地諗緊下一站既行程，記得以前讀書嗰陣，留連得最多係自修室，學校籃球場同田徑場，如果唔使補課同練習，就會同Winnie一齊出旺角行下街。邊會咁有錢去尖沙咀啲名店行下Shopping啊？

「B啊，你幾年班開始賽D1架？」Claudia問我。

「講起就耐啦，我中一到中六都有玩？你呢？」我話。

「Same as you！咁我地以前咪成日見到？」Claudia打趣地問。

「講個秘密你知啦！我記得Form 3嗰年賽D1。有個好靚既女拔妹跑步好快，破左當年學界既女子個人項目紀錄。搞到我地全場男同學都眼望望，點知中途休息嗰陣，我見到嗰個女仔唔夠錢買野飲，我咪買多枝野飲比嗰個女拔妹囉。嗱，唔好嬲啊！」我話。

「係咪Winnie黎架？嘻嘻。我記得佢跑步都唔差架。」Claudia係到笑。

「唔係啊，當時我都未識Winnie，之後我仲請埋佢飲，叫佢唔使還添。」我話。



「寶礦力啊嘛，嘻嘻！」Claudia笑住咁講。

「你又知既？唔通你係？？」我未講完，Claudia已經Stop左我。

「嗯，嗰個女仔咪係本小姐我囉！Stupid！」Claudia打左我個頭一下。

我呢個時候，就拖住Claudia隻手，係彌敦道街頭上漫步。大家望住對方係到甜笑。估唔到Claudia同我一早已經見過，但因為當時又冇Wtsapp，冇Facebook同IG，唔通學以前黎明咁樣比個Call機號碼或者電話號碼去追佢咩？

但唔緊要啦，尋尋覓覓，最終我同Claudia能夠係埋一齊，已經好足夠架啦！係咪啊哈姆太郎？