由O Camp組爸組媽變左做真正既夫妻: Chapter 92

「你咁Stupid架？又唔抄我牌。」Claudia問。

「當時毒丁丁，點知你會唔會串串貢架？」我話。

「而家你就知我係溫柔體貼既女仔呢？」Claudia係到自誇自己。

「而家知唔遲架，我地而家，將來係埋一齊就得啦！女朋友。」我話。

「你話架男朋友，唔準反口啊！」Claudia話。



「係既係既！」我話。

去到彌敦道與亞皆老街個街口，呢一個街口相信呢一區既學生返學放學既必經之路，而我放學如果唔使練波同田徑既話，就會約Winnie去旺角到行街街，或者會一齊去自修室溫下習。講起旺角，應該係上次同Claudia拍拖後，第一次約會嗰陣，而今次我地兩個仲扮返中學生。

既然今日去過DGS，咁而家就輪到我帶返Claudia去DBS，等佢見識下中學時代既我啦。

我同Claudia沿住亞皆老街直行，去到旺角火車站前少少就上斜路。記得以前住大圍嗰陣，就係坐東鐵去到旺角東就落車，然後就即刻衝上奪命斜返學。 我諗我啲體能應該就係咁樣練返黎。

「B，我地去邊啊？」Claudia問。



「而家返我學校囉！」我話。

「屌你！快啲帶我去啦！」Claudia話。

「咁行啦我地！」我話。

見到DBS既校園，呢到可以話係完全冇變到。校園既一草一木，殖民地時期既校園建築，同我讀書既時候一模一樣。

講返點解我會入到DBS？咪靠我爹地幫我搭通天地線囉。而我爹地因為係DBS舊生既關係，所以我可以比其他人幸運得多，可以入到男拔。但幸運之餘，也需要自身既努力，係小學既時候，我無論係學業定運動方面都好突出。連當時既校長都話我係佢理想中既學生，對我讚不絕口。



記得岩岩升Form 1嗰陣，我以為名校出黎既一定係書呆子，功課學業壓力一定會好繁重，啲同學一定會係串串共。我心諗唔知幾時先可以捱到畢業呢？但事實上，係我諗多左，與事實係完全相反。

入左DBS後，學校大力支持我地係學業同運動方面既發展，可以將我地日常既返學，練習同比賽時間平均分配。但你問我係咪Keep住年年考第一？當然唔係啦！入到黎呢到之後，成績自然會被其他同學比下去，落後十幾個Position。但好彩由細到大我屋企人都唔會強迫我考第一，只求順順利利升班畢業，讀書開開心心，入到U就算啦！

好多人話求學係求分數，我就覺得除左求分數之外，仲有好多野需要我地要去學。就係因為呢啲野，令到我中學生捱變得多姿多彩。所以如果我將來有小朋友既話，我唔會強迫佢每年都要考第一，只求佢讀書開開心心就算了。如果我地肯放手，等佢地自由發揮唔係更好咩！

係中學裡面，我最開心既就係識到Steven同Michael呢兩條濕鳩，記得我地三個邊打波同跑步就會邊講粗口，又係到講下啲近期最新AV女優同Game。當然，除左佢地之外，仲要多謝好多同學仔，係呢到我唔多講啦！

係校門裡面，除左有好多著住DBS校服或者校隊隊服既學弟之外，前面仲有一個好熟悉既身影，佢保養得宜，身穿西裝，好似一個成功人士。冇錯啦，呢個就係我地個校長Kevin Sir啦！佢就係我既啟蒙教練，亦都係我既好朋友！就算我畢左業後都不時返去搵佢打下波，傾下計。

當佢見到我，就好熱情咁樣同我打招呼。當然啦，佢見到我著返校服，又帶住著住女拔校服既Claudia，即刻笑得好奸。

「校長早晨！」我向Kevin Sir打招呼。

「早晨啊，梁智勇同學。你髮型唔合規格喎！」Kevin Sir又係串我染髮。



「放心我陣間染返！」我話。

「講笑咋！做咩咁好興致返黎探我啊？仲帶埋女朋友黎添！」Kevin Sir話。

「係啊，不過怕唔怕阻住你地啊？我地今日只係想重回少男少女時代啊！」我話。

「當然好啦！叫埋你女朋友一齊黎，等佢做一日男校女生啦！」Kevin Sir話。

我就向Claudia同Kevin Sir互相介紹，等Claudia見識一下男拔仔既生活。而呢個時候有好多男拔學弟對Claudia呢個女拔師姐係到眼望望，係到過黎跟隊，但佢見到我地兩個係到手拖手之後，恨不得殺了我。