由O Camp組爸組媽變左做真正既夫妻: Chapter 78

一見到，原來係一架紅色有改裝既豐田MR-S。我心諗呢架車一定係佢屋企人嘅，見到佢落晒包圍，改晒鈴，好似落場咁樣。唔怪得啲人成日都話紅色嘅跑車總會係神秘嘅。

不過MR-S呢一款嬌小玲瓏嘅跑車，真係好啱女仔揸。我諗如果Miki同Claudia揸嘅話一定會好適合。但係Claudia已經有架Fit啦，唔通叫佢放棄架家庭車咩？

「Miki你架車新買㗎？」我問。

「唔係呀我男朋友㗎！佢屋企多咗部車出嚟，咪借架MR-S出嚟玩吓啦！本來想揸佢㗎GTR架，不過我覺得太大部。」Miki話。

「Miki我覺得呢架車幾啱你啊，你揸GTR死咗啦！」Claudia就對住Miki講。



我冇反駁Claudia，因為我覺得佢講嘅嘢好有道理，講真唔好話Miki啦，連我都未必揸得掂GTR。雖然GTR馬力同我架掃把佬一模一樣都係280匹，不過排氣量同車重可以差好遠，而且好容易轉向不足，如果上大帽山、新娘潭嗰啲彎多路窄嘅地方就一定推頭，技術唔好嘅話就會發生意外。相反就好似掃把佬、EVO、Civic Type R嗰啲車就會靈活得多，而且只不過係2000cc，比較適合喺香港揸。

「你睇小我呀？」Miki反駁。

「驚你會炒車姐！」Claudia話。

「不過見你揸掃把佬啊！」Miki對住Claudia講。

「你唔係做狗仔隊咁勁㗎嘛？」我問。



「咩啊我今日真係見到㗎，係太子道東近新蒲崗嗰邊，車牌號碼一定冇錯。話時話喎我識咗你咁多年你都未車過我！」Miki話。

「最多我下次車你囉！你係我個組女嚟㗎嘛！媽咪唔會抌低你㗎！」Claudia話。

「唔准反口㗎！」Miki話。

我哋三個人你一言我一語，又喺度傾左成個鐘頭。真係估唔到Miki都會跟我哋一樣揸棍波車，睇嚟應該係受咗佢男朋友嘅影響，如果下次我哋四個人可以一齊出嚟車聚就好啦。

講到咁上下，因為聽日我哋都要返工返學，所以就齊齊坐電梯返上去屋企。當然Miki同Claudia糖黐豆咁樣，自然要叫我返屋企先，唔使送佢上去。



返到去，爹哋媽咪同妹妹都瞓晒覺，而我就即刻走去沖涼刷牙，洗埋啲衫就返入間房到瞓覺。