由O Camp組爸組媽變左做真正既夫妻: Chapter 79

幾日之後，香港大學嘅校園。

係大學街，Music Club就擺咗一個Singing Contest既報名Booth。呢一個就係等於港大所有學生嘅歌唱比賽，當然呢個咁出名嘅比賽一定會有好多學弟學妹一展歌喉。啦！

呢個時候，岩岩係Faculty上完lecture既我，準備去Main Campus會合Claudia。

「B啊，係邊啊？」Claudia問。

「我啱啱放學啊你呢？」



「我都係呀，而家同班女仔係大學街。你過嚟搵我啦！」

「好啊！」

唔知道Claudia同班女仔做咩呢？認真真係有啲期待⋯⋯行行吓又見到Steven同另外三位八公。

「點啊你班友仔鬼上身啊？」我問。

「勇哥掛住搵阿嫂呢？」Wyllis問。



「你知就好啦！各位大佬高抬貴手唔該！」

「快啲去搵返個班女人啦！」Steven話。

我哋於是就快快走去大學街，見到成班女仔喺度圍晒爐咁傾偈。當班男仔見到自己嘅女朋友之後就會自動歸位，我都唔會例外啦！就即刻返去Claudia身邊。

呢一個Moment，好耐都冇出現過！點解？因為平時我哋嘅返學時間都好唔同，就算係都只不過係大學街到Hi-bye，就算約都係喺出邊約。而今次我哋五男五女都係晒度，簡直係一個零的突破！

「B！做咩大家都喺度嘅？」我問Claudia。



「咁啱見到咋嘛！你睇吓個poster！」

我望一望，原來係Singing Contest。唔通個傻妹想我一展歌喉？不過我自問唱歌其實都唔算好聽，好驚如果係全校同學面前唱歌會好大壓力，到時就唔會發揮水準，不斷俾人恥笑。

「做咩啊你想報歌唱比賽啊？」我問Claudia。

「嗯......」Claudia掂咗頭。

「加油啊支持你！」我微笑咁同佢講。

「勇哥！Claudia話要你陪佢去啊！你係男人嘅就快啲去啦！」其他人異口同聲地講。

「B你快啲報啦，兩個人報會平啲㗎！你咪當陪我唱歌囉！」Claudia嗲住我咁講。

我諗咗一諗⋯⋯反正由Year 1到而家都未試過參加過歌唱比賽，而家都已經到咗大學嘅最後一年，如果呢一次唔報嘅話⋯⋯我驚呢一世都會後悔。但最主要原因當然係要陪住我最愛嘅Claudia啦。唔知如果到時係咁多同學仔面前拖住女朋友隻手合唱嘅感覺會係點呢？講真都有啲期待。



「好，我就捨命陪君子！一齊報啦！你做乜我就做乜！」

「Yeah！都係B你最抵錫！」Claudia講完就kiss左我，搞到其他人好葡萄。

講完之後我哋兩個就手拖手，一齊走入去Booth度填報名表。我哋呢對恩愛嘅情侶，自然就會成為同學眼中嘅焦點。

其實呢啲歌唱比賽，循例都係會收取少量嘅現金，而呢一次亦都唔例外。我地交咗報名費之後，就手拖手離開。你問我哋去邊？當然係返去搵嗰班八婆八公啦。