由O Camp組爸組媽變左做真正既夫妻: Chapter 72

「B啊，其實要行邊到快啊？」Claudia問。

「你出左太古城，上東區走廊入東隧，然後入觀塘繞道或者觀塘道轉落太子道東就到架啦！」

「姐係我地尋日去既反方向？」

「係啊！兩條路都得，不過觀塘繞道冇咁塞，觀塘道就會塞車。」

「咁行觀繞啦！」



「好！」

由於Claudia第一次揸我部掃把佬，難免未必會適應得到。始終掃把佬同Fit好多野都唔同（雖然兩架車都係棍波，但馬力同操控方面既差距會好大），所以一開始出路口會少少Chok。但一上到東廊之後，佢就變左一個專業既女車手，摸熟左掃把佬既操控。留意返我講既「女車手」唔係會瘋狂駕駛，係馬路到左穿右插，亂咁Cut線、小路唔讓大路嗰啲馬路炸彈；而Claudia能夠做到人車合一之餘，又會揸得快而穩陣，只係一直Keep住安全車速，當左掃把佬已經好似Fit一樣。話時話如果用灣岸黎比既話，我係明雄哥哥，而Claudia就係零奈姐姐，其實以女仔黎講，佢既駕駛技術絕對超晒班，甚至可以拍得住我同另外四位。但我知道Claudia只不過一直想跟我後面，享受每份每秒既駕駛樂趣，並冇打算攞架Fit黎挑我機。

所以，古語有云：「寧得罪小人、莫得罪女人！」就係咁既意思。大家有幸有另一半既話，千祈唔好輕視佢地。因為佢地係某些方面會比我地男仔優勝好多倍。

「B啊？你架車好好揸啊！好快啊！夠力之餘過彎又好穩！」Claudia笑盈盈地對我講。

「你鐘意就好啦！」



「不過你冇學灣岸嗰啲改到700幾800匹咩？」Claudia問。個傻妹原來都識啲野架喎。

「邊有咁勁啊？你估打機咩！同埋呢到係香港黎架！所以唔使改咁大，同埋呢架車我日後打算做Family Car，車我地既小朋友返學。」

「嘻嘻！係咪隧道唔比過線啊？」

「行返自己條線得架啦！反正兩條行車線都咁多車，唔會快得幾多！」

「係既係既。」



一出到觀繞，就見到有架黃色既S15係到Hi我地。屌，又想我地機！



「B啊，後面有人HI我地啊！」

「唔使理佢啦！各行各就得架啦！唔好受人地影響。」

Claudia就聽左我講，讓路比架S15行先。見到嗰兩條友又係啲MK仔黎，佢地一定係到諗女仔點會揸掃把佬呢啲車⋯⋯繼而嚇到傻左。不過佢地都好有招呼向我地遞一遞手唔該我地，睇黎佢地真係好趕時間，無謂阻住人地啦 ！好快架S15就絕塵而去。

過左一陣，Claudia就轉左落太子道東直行，好快就到左九龍城。呢個時候就收到Oscar既Wtsapp，叫我地泊係九龍城廣場。

「B啊，我地泊邊啊？」

「入九龍城廣場既停車場啦！」



「好既。」

Claudia就揸架車入去，後面有架白色既豐田Altezza Hi我地，原來係Johnny同Joey。


上到頂樓，就見到Wyllis架FD2、Steven架Evo 8、Donald架CL7泊左係到。而Oscar架三菱Toppo就泊左另一邊。於是我地就泊係佢地三個既隔離。當然啦，Johnny同Joey見到Claudia揸車就覺得好奇怪，而我就不斷係到笑。

「做咩係Claudia揸車既？」Johnny問。

「乜香港法例有講明女仔唔比揸車咩？」Claudia反問返佢。

「咪係！」我再加多句。

「不過Claudia識揸棍波好勁啊！」Joey攬住Claudia講。



「Joey你學下野啦！叫Johnny哥比你揸啦！」我同Joey講。

「好啊！」

「講咁多野，行啦 ！」

我地四個一行人就去左食飯既火鍋店到。