由O Camp組爸組媽變左做真正既夫妻: Chapter 73

到左火鍋店，Oscar佢地幾個已經坐晒係到。

「梁生、梁太！你地終於肯出黎啦！」大家係到講。

「使唔使搞我地啊？」我黑人問號。

「B啊你唔使理佢地既！坐啦我地！」我講完就拉張櫈比Claudia坐。

「錫晒你啊B！」Claudia就Kiss左我。



「嘩！好閃啊！」大家係到話。

講完之後，Steven同Kary就提議不如叫野食先，有咩呢就麻煩返各自既香閨再講。大家一邊食飯，一邊係到笑住咁講返O Camp既開心事。記得一開始我要做O Camp組爸嗰陣有啲唔情願，又係到驚我個Partner好難相處得來，但我而家要好好多謝Oscar佢比左我做今次O Camp既組爸，更加多謝嗰四條仆街將我個名加埋上去組爸個list到。就係呢一次既O Camp，比我遇上左Claudia，更加因為咁對佢意亂情迷，不知不覺間鐘意左佢。真係好感激大學有呢班好基友、好兄弟姊妹，你地對小弟既感情，我會好好放在心上。

「不如大家飲杯先呢？」Wyllis提議。

「好啊 ！飲杯！」大家都舉起手中既可樂，一齊乾杯（唔飲酒既原因係因為我地全部人都要揸車）。

「呢一杯係為咩而乾架？」Donald問。



「就祝我地出世既BB身體健康、快高長大、盡得父母既遺傳，飲杯！」我向大家講。

「個BB唔關我事架！」突然間Claudia話。

「咁即係點啊！？」Stephy黑人問號。

「係，雖然Aaron同Claudia而家冇姐，但今晚之後就一定有架！」Oscar就補多句，與我志同道合，於是我地兩個就乾杯。

我望一望Claudia，面都紅埋，佢呢個可愛既臉朧。令我對佢充滿愛意，情難自制。



「你知咩叫適可而止架可？」Claudia扯住我耳仔罵我。

「冇所謂啦，你係我女人，嗰啲係我老友！Hey醉醉地咪好囉 ！」

「係啊等我醉左，你就可以食我啊嘛！發你個春秋大夢啦 ！食野！」被Claudia罵完，佢就舀啲野我食。

其他人見到我同Claudia咁Sweet，就互不相讓，同各自既另一半係到甜言蜜語。見到佢地都係真心鐘意對方，作為兄弟既我感到欣慰，所以我都要好好地對Claudia啦！

呢個時候，有個人Wtsapp我，原來係Winnie既家姐。

「Aaron啊！」家姐問。

「咩啊家姐？」我問返家姐。

「你陣間得唔得閒啊？！」



「咩事？」

「你陣間方便車我地三個出機場啊？因為我地今晚要坐夜機返英國啊！」

當我諗緊去唔去嗰陣，Claudia見到我同家姐既對話，就管家婆上身咁問我邊個，當然我講既管家婆上身係嗲住我嗰種。我就細聲係Claudia耳邊解釋返成件事，而Claudia就叫我帶埋佢去，順便想從家姐既口中了解我同Winnie既過去。我都話你最抵錫架啦！

我地食完飯後，大家就齊齊去返九龍城廣場到攞車走人。由於我地大家都住唔同區，再加上聽日係星期一，所以大家都冇下場啦！

「B啊！我地去邊接人啊？」Claudia問。

「觀塘啊，你訓一陣啦！」

「唔得！我訓左邊個幫你睇路啊？」



「都係老婆最抵錫！」

「專心揸車！」

去觀塘，基本上都係行太子道東接觀塘道，唔會入去舊機隧同新清咁傻仔架。加上夜晚唔會太多車既關係，用左10分鐘就到左觀塘啦。而Winnie既舊屋就係功樂道，所以就轉入康寧道再上去。最後到左碧麗苑，我就停左車。