由O Camp組爸組媽變左做真正既夫妻: Chapter 62

過咗5分鐘後，Claudia屋企嘅門鐘響起，於是我同Claudia走出去開門比妹妹。見到佢換咗校隊嘅運動套裝（佢好鍾意將學校嘅運動隊服當做瞓覺衫着），再加返對拖鞋。我諗佢應該已經沖咗涼，而佢就手拎住個銀包同電話。

「Angela，你嚟咗啦？」

「係呀！叔叔姨姨你哋好！」

「Hello Angela，你當呢度係屋企就得㗎啦！」世伯伯母異口同聲地講，然後Claudia同伯母就帶咗妹妹入房傾啲女仔野，而我同世伯就坐係廳度講吓啲男人野。

呢個時候，世伯就喺廚房度攞咗兩罐嘉士伯啤酒。睇嚟佢真係好悶，睇嚟下次叫埋Daddy一齊出嚟，三個男人講吓廢話，都係一件唔錯嘅事。



講起啤酒，每次都係同Daddy、或者Steven佢哋一齊飲，一邊飲就會一邊盡訴心中情。不過我每次都會適可而止，去到某個點就會自動停止。唯一飲到成隻醉貓就係Winnie過咗身之後嗰幾日，基本上每晚都飲到瞓係街到，希望好似李白咁樣但願長醉不用醒。可惜冇用，就算飲到幾醉都好，都會有清醒嘅一日。

「勇，飲番杯啊！」世伯話。

「世伯你唔係想灌醉我呀嘛？」我問世伯。

「放心啦，我唔會咁嘅！不過同你daddy飲就難講啦！」

「咁我恭敬不如從命啦！」



「好！」

我哋兩個男人一人飲一罐啤酒，不過我哋都係一邊吹水一邊慢慢飲，如果俾Claudia見到我好似隻醉貓一定會鏟倒我飛起。而妹妹呢......佢就會同爹哋媽咪告狀，話哥哥飲醉酒。

「Angela同雅晴個傻女真係好似啊！」

「係呀大家都係叫阿晴！」

「不過呢個傻妹由細到大都冇兄弟姊妹，所以佢見到Angela就好開心！將佢當做自己嘅妹妹！」



「唔緊要啦，最緊要佢地開心、你哋開心咁就得㗎啦！」

「所以話你幾識為人着想就係咁解，雅晴同你一齊真係冇錯，最緊要就係你地兩個發生乜嘢事都好，都唔好計較邊個啱邊個錯，大家平心靜氣，冷靜咁樣傾一傾。世伯而家教你，好好咁樣對我個囡！」

「知道啦世伯。」

「不過阿勇啊你以前係咪讀DBS架？」

「係呀，我爹哋都係，不過我都係小學畢業之後先轉過去。」

「哈哈我都係呀，我同你爹哋以前係中學同學嚟㗎，而雅晴個媽咪就係讀女拔！你係咪田徑隊啊？」

「籃球隊加田徑隊，做咩咁問嘅？」

「以前雅晴呢個傻妹係田徑隊，佢成日同我地講DBS籃球隊個隊長好靚仔，仲話大個咗之後一定要做佢嘅女朋友。可惜佢知道嗰個男仔有咗女朋友，於是將呢個秘密收埋係心底，後來同左第二個男仔一齊，最後就同左你拍拖啦！」



當世伯講咗籃球隊隊長，我已經知道嗰個人其實係我自己，原來呢個傻妹一早已經鍾意咗我。可惜當時我已經同Winnie拍緊拖，當佢知道左之後就將呢件事收埋係心裏面，就同左第二個男仔喺埋一齊。而上天都好眷顧Claudia呢個幸運少女，安排左我哋兩個係大學O Camp重遇返，並有幸成為一對情侶。

林雅晴，原來你就係我留住的小幸運！

原來你是 我最想留住的幸運
原來我們 和愛情曾經靠得那麼近
那為我對抗世界的決定 那陪我淋的雨
一幕幕都是你 一塵不染的真心

「世伯啊，其實Claudia講嗰個男仔......就係我。」

「嘩都估到啦，你又高大又靚仔，成個運動員個格咁樣。」世伯對我講嗰啲讚美嘅說話。

「你太過獎啦！」



「不過你當時唔知呢個女仔係雅晴咩？」

「唔知㗎，當時無論係籃球隊還是田徑隊，見到係女拔田徑嘅女仔好靚，不過當時我又怕怕醜醜，唔係好識同女仔溝通，所以最後我都放棄左呢個權利。過咗冇幾耐我就同左我以前個女朋友一齊。」

「原來係咁，咁你以前個女朋友啲嘢我個女知唔知㗎？」

「知，我同Claudia講左。兩個人喺埋一齊最緊要坦誠相對呀嘛！而且佢哋兩個以前係中學同學黎！」

「咁巧合？但無論點都好啦你同雅晴呢段感情要好好珍惜啊！我同伯母呢已經當左你係半邊仔啦，你試吓對我個女唔好，我一定唔放過你！」

「知道啦世伯！」

「飲杯啦！」



我同世伯就乾咗杯。