由O Camp組爸組媽變左做真正既夫妻: Chapter 57

我同Claudia分別就問爹哋媽咪同世伯伯母打牌打成點。大家都話好難打，完全分唔到勝負。

過咗一陣，由於今晚我要同Claudia屋企人食飯。所以呢場親家鵲局就暫時停止。世伯伯母仲同爹哋媽咪講笑話暫時要借我一陣，當然爹哋媽咪話一場親家唔使借來借去，叫我唔好失禮人，着得好睇啲，仲叫我不如揸架凌志RX200T去，攞架掃把佬比佢用。

當我地準備好晒啲嘢，離開屋企嗰陣，四位家長依然雞啄唔斷咁樣係咁傾偈，有時覺得佢哋可能已經認定咗我同Claudia係夫妻關係，從此之後大家係一家人。

而今晚食飯嗰間餐廳係鯉魚門，再加上我哋要去何文田接Claudia公公、婆婆，子謙子瑜佢地。所以我哋就分開兩架車去，世伯伯母就揸咗㗎Prado去，Claudia就坐我架RX200T去。

「我地今日揸呢架？」Claudia問。

「係啊，想你坐得舒服啲。」我話。

「好Yeah，有新車坐！」Claudia話。

一上車，架車既座椅坐得好舒服，個Design充滿一種跑味。同RA-R好唔同。但因為呢架車係行CVT波箱，同埋啲制又唔同，所以要搞好耐先著到車。而呢架車唯一唔好既就係司機位同副駕位完全地隔開，搞到我冇得拖住Claudia手仔揸車，摸下佢大髀。不過冇所謂啦，反正呢架車都係爹地媽咪揸得多，我而家唯一可以既就係錫住黎揸啦！

著好車，完全感受唔到引擎既雜聲，表現得很平靜。開頭以為呢啲咁既SUV真係好大食好難揸，但揸左一陣之後，架車真係好慳油，睇位又一流，果然係一架好好既Family Car。

大家都知道如果去何文田嘅話，行紅隧一定會係最快。由於世伯伯母想我哋同時出發，我同Claudia就提議比佢哋行先，而我哋就跟住佢後邊。

「B啊，你爹哋都好鍾意越野車喎！」

「都幾㗎，佢成日好鍾意同幾個玩車朋友一齊爬山，以前細個好鍾意跟佢同媽咪去元朗、沙頭角嗰度玩車。不過無論佢幾鍾意玩車都好，佢都會將我同媽咪放喺第一位。」

「咪同我爹哋媽咪一樣，我爹哋都係愛車如命，以前仲試過同沙皮狗一齊去澳門、日本到賽車。只係因為後來有咗我哋兩個之後就慢慢放棄左，但自從我考到車牌之後佢就成日同我一齊遊車河，仲周不時喺大埔公路到飛車。」

「睇嚟我哋個家族都好鍾意車喎！」

「不過女仔揸棍波車我都係第一次見！嗰個人就係B你！」

「所以我同你講，莫得罪女人！以為我哋啲女人好蝦。」

「最多我以後俾你....蝦一世囉！」

「專心啲揸車啦你！」

話咁快我哋就到咗，見到Claudia公公婆婆、細姨一家都喺到。而Claudia公公仲着住唐裝、婆婆一身珠光寶氣。真係好似真情裏面既歸拿督、拿督夫人。

「公公、婆婆你哋好呀！」我哋四個異口同聲咁講。

「雅晴呢個男仔肯定係你男朋友呢？」公公見到我就問Claudia，喺度笑笑口咁講。

「係呀！呢個係我男朋友阿勇啊！呢個係我公公婆婆！」

我就自我介紹，公公婆婆就好熱情咁同我講嘢，談笑風生，睇嚟佢哋好似好鍾意我咁樣。而子瑜同子謙就係咁扯住我同Claudia，黐住我哋唔放。

因為我哋都有成十個人嘅關係，所以世伯叫我車Claudia、子謙、子瑜。其他人就跟世伯車，去到鯉魚門嗰邊再等。

由於時間唔急，所以我就決定行亞皆老街、經太子道東落觀塘，然後再去到鯉魚門。反正去到嗰邊都係要等。

「子瑜、子謙，我哋又見面啦！」我用保姆嘅語氣同佢哋講。

「係呀，Aaron哥哥你同雅晴表姐拍緊拖啊？」子謙問。

「你哋咁快就知道啦？」我問。

「姨媽講晒俾我哋聽呀！」子謙子瑜異口同聲地講。

我聽完之後，覺得子瑜子謙好早熟，講真我去到佢哋嗰個年紀嗰陣我都唔知乜嘢叫男女朋友。而每次問親爹哋媽咪嗰陣又話大個咗之後先再話俾我聽。

去到九龍城警署同西九龍警察總部個紅綠燈位，見到有㗎黃色嘅三菱Toppo好吸引，呢部咪就係劉德華拍瘦身男女揸過部朋友號？而個司機開咗車窗hi我，原來係Oscar，佢仲車住Alice。

瘦身男女既Cover：

「搞咩啊車住一家大細？」Oscar問。

「去食飯囉！估唔到你買呢啲咁嘅車喎！」我同Oscar講。

「你架Lexus都唔差啦！Alice鐘意啊嘛！」Oscar話。

「勇哥我都知你同Claudia一早拍拖㗎啦！」Alice就係笑住咁講。

「咩喎！」Claudia嬌嬌的的咁回應Alice。

「係呀佢哋話組爸組媽食飯啊，問你地幾時OK？」Oscar問。

「總之Claudia得我就得㗎啦！」

「咁好啦，返大學再講啦！拜拜！」呢個時候交通燈已經轉為綠燈，而Oscar同我就揸車走人。

轉到出太子道交匯處，呢到以前舊啟德機場。對於每一個係香港土生土長既人相信係一個難忘既回憶，細個爹地成日都會黎帶我黎呢到或者觀塘碼頭去睇飛機。至於九龍城因為鄰近機場既緣故，所以啲樓唔可以起太高。而啟德機場係一九九八年搬左去赤鱲角之後，呢到變得較為冷清，隨著港英旗既落下，一去不返了。