由O Camp組爸組媽變左做真正既夫妻: Chapter 55
返到去之後，爹地係到攬住媽咪睇緊電視⋯⋯見到佢地結左婚廿幾年，依然恩愛如昔，樣貌十年如一日。到底佢地呢廿幾年係有咩秘訣去相處呢？又或者⋯⋯咩野驅使佢地可以終身付託對方呢。睇黎搵日真係請教下佢地先。
為免打擾佢地，我即刻走入去換衫沖涼。然後再向Claudia報到。
「B，我返到去啦！」
「Good！幫我多謝你爺爺嫲嫲啦！佢地真係好好架 ！」
「估唔到今日見我屋企兩老，聽日就見你屋企兩老！」
「放心啦！我公公婆婆好好人架！爹地之前攞左我同你既合照比佢地睇啊！佢地好Like你啊！」
「係咩？咁聽日有咩安排啊？」
「聽日我要陪爹地媽咪食中午飯啊！要做下孝順女架嘛！你啊都要做下孝順仔架！聽日五點半停車場等啦！」
「Yes Madam！」
「好啦！我訓先啦！」
Claudia就Off左，爹哋就入咗嚟，見到佢笑得好奸，心諗一定唔會有好事發生。
「爹地！」
「仔頭先同雅晴去邊啊？」
「去咗科學園同中大，同埋大埔！」
「咁開心！嗰度係你地膽嚟㗎喎！」
「同埋Claudia個傻妹........幫我解開左我最驚嘅心結！」
「係咪Winnie既心結呢？」爹地問。
「係呀，原來佢哋兩個以前已經識㗎啦！係中學同學！」
「咁搞笑？香港好細㗎咋，人與人之間嘅關係可以話遠在天邊近在眼前！雅晴係咪都係讀女拔架？」
「你又知嘅？」
「咁就要多謝我嘅乖囡啦！你親愛嘅妹妹呀！」
「哈哈哈。」我開懷大笑。
「好啦唔阻你啦，聽日不如去飲茶啦！」
「當然啦，一齊享受吓家庭樂啊！早唞啦Daddy！」
「good night！」
爹哋就返咗入房，而我都係時候睡魔急Call，就即刻刷牙瞓覺。
過咗第二日，我就好早起身去跑步，跑完步返屋企之後換好衫，等埋爹哋媽咪、妹妹就一齊享受吓家庭樂。Claudia真係講得啱，雖然我哋兩個係一對熱戀嘅情侶，但係始終屋企人嘅支持真係好重要，就係因為佢哋嘅支持，先會成就我哋呢一對金童玉女。
「爹哋媽咪行得未啊？」
「行得啦，阿仔有咩好推介呀？」媽咪問。
「冇啊！不如試吓太古城中心嗰間酒樓呀！」我就提議。
「好啊，反正搬咗黎呢度咁耐都未試過樓下嘅餐廳，好就試吓啦！」爹哋話。
「阿哥，我OK啦！」妹妹就換好衫，跟住我哋四個就落咗去。
我哋四個就行過去太古城間翰騰閣到飲茶，真係估唔到星期六都會咁多人排隊。講緊喺呢度住咗咁耐，真係好少會嚟呢到食中午飯，唯一一次就係同Claudia食M記。唔知個傻妹同佢父母食飯食成點呢？
「喂阿哥你做咩唔訂定枱啊？」妹妹問。
「冇辦法啦！佢嗰間野公眾假期冇得訂枱㗎！」
「你睇吓你哥哥幾懶啊，千祈唔好學佢啊！」爹哋同妹妹妹。
「貪方便咋嘛，呢度方便好多喎。一落樓下就有嘢食啦！」
「你仲好意思講，陣間哥哥埋單。我知你成兩萬蚊一個月既！」爹地話。
咁樣比屋企人屈一屈法，我呢個孝子就盡下孝心啦，請返屋企人食飯係理所當然嘅事嘅，因為如果冇父母嘅辛苦，我同妹妹就唔會健康嘅成長。
就當我同妹妹傾到興起嗰陣，離遠見到一個好熟悉嘅身影，我再望真啲原來係Claudia同世伯伯母，估唔到咁岩遇着剛剛，佢哋竟然都會嚟呢度飲茶。
死啦究竟見唔見佢好呢？如果得返Claudia一個當然冇問題啦！但最驚如果雙方家長見面唔知佢哋嘅反應會係點？如果大家啱傾嘅就當然親上加親啦，如果大家唔啱傾嘅我同Claudia呢段感情一定會經歷重重嘅波折。
突然間，Claudia靜雞雞喺後面攬住我，搞到我小鹿亂撞。弊，睇嚟肯定見硬雙方家長啦。
「B，咁啱嘅？」我Kiss返佢。
「係呀！做乜你會喺度嘅？」Claudia問。
「同我屋企人飲茶囉，你講得啱要做孝子！」
「錫老婆會發達㗎！你唔知咩？」
「傻豬！」
「不過我驚雙方家長見面嘅話，唔知佢哋個反應會點！」我問Claudia嘅意見。
「唔知呢！喂你睇吓！」Claudia拍我嘅膊頭，指向嗰邊，出現嘅係令我意想不到嘅場面。
見到爹地媽咪同世伯伯母喺到傾偈，就好似好耐冇見一個老朋友咁樣，一見如故，睇佢哋個樣傾得好開心。不過妹妹就慘囉，四個大人講嘢嗰陣得返佢一個小朋友唔知做咩。
「原來你媽咪同我媽咪係識個喎！」
「佢哋叫我哋過嚟啊！行啦B！」
我哋兩個隻手拖手行過去四位老人家嗰到.......佢哋個樣當然好驚訝啦。
「原來智勇係你哋個仔！」伯母對媽咪講。
「原來雅晴係你地個女！」媽咪對伯母講。
「係呀，真係估唔到你個女會同我個仔拍拖！暉哥睇嚟呢門親家做定呀！」爹哋對世伯講。
「阿勇好仔嚟㗎，真係同倫哥你好似！哈哈哈！」世伯開懷大笑。
然後我哋就走過去酒樓知客嗰到，點知個知客話得返一張大枱，問我地兩個一唔一齊坐。見到啲老人家咁開心，於是我同Claudia異口同聲咁講：「好啊好啊！我哋係一家人嚟㗎嘛！」之後我再加把口啊：「係咪啊老婆！」講完之後Claudia哭笑不得。
結果，經過我哋兩個提議，嗰四位老人家都欣然同意我哋嘅決定。而一餐好簡單嘅中午飯就變咗雙方家長飯局。睇黎我同Claudia嘅擔心係多餘嘅。
唔講唔知，原來爹哋媽咪同世伯伯母以前已經相識，而爹地同世伯、媽咪同伯母都係中學同學黎。今次係相隔左30年先再見番，佢哋都係講返以前中學時代嘅浪漫史，爹地同世伯就不斷講下車經同樓經，而我同Claudia、妹妹雞啄唔斷咁樣傾偈，始終嗰個係我妹妹黎。
呢一餐飯我哋都食得好開心，見到佢哋四個咁開心，我地三個不禁地露出微笑。連最驚嘅家長問題都過咗，睇來我同Claudia呢段童話愛情可以畫上一個完美嘅句號。只於呢張單，當然作為人哋個仔同未來女婿嘅我去俾錢啦！
「多謝你啊B！要你洗咁大筆錢。」Claudia笑住咁同我講。
「冇所謂啦，最緊要四位老人家開心啫。」
「所以都話你最抵錫！」
「應承過你，我會好好努力咁樣要賺錢養你一世！」
「阿哥你要養埋我個喎。」妹妹又插嘴。
「當然啦，不過將來有個好老公養你！」
「聽住先啦！阿哥都錫晒你！」妹妹好似小朋友咁Kiss我下。
「Angela你放心啦，如果你哥哥唔養你嘅話我養你。你係我妹妹嚟㗎嘛！我哋要企埋同一陣線！」
「Yeah！」妹妹就同Claudia擊掌。晴晴1號同晴晴2號嘅關係配合得好好。
林雅晴，你要注定做我老婆㗎啦！無論點樣都好，我都只會愛你一個。