由O Camp組爸組媽變左做真正既夫妻: Chapter 54
「嘩屌，你買多錢買落啊？」我問Michael。
「唔係好貴姐，15蚊。」
「同我、Steven嗰部差唔多！做咩唔玩GTR啊？」
「GTR貴咁多，RX-7輕身啲，同埋慳油啲。但係好難整。你部掃把佬呢？」
「同你差唔多啦！不過我堂阿叔間車房專整JDM跑車，下次介紹比你識。」
「係咪你屋企附近嗰間咩車房啊？聽啲朋友講你堂阿叔間野信譽好好！下次搵佢針針先！」
「好！你話Aaron介紹，實平啲比你！」
我地兩個一路傾，正當我地傾到興起既時候，Claudia就叫：「野食到啦！」
「黎啦！」我地兩個就即刻返去食野。
話時話呢間車仔麵都幾好食，價錢又經濟，平過公司附近好多，有下次。不過由於太大份既關係，我就同Claudia Share一碗，而Michael同Toby就Share一碗。而我地四個圍爐傾返以前中學會做啲咩，Michael嗰條仆街仲講我中學啲On9野比Claudia聽，結果當然比Claudia不斷恥笑啦，遲啲先同佢慢慢計數。
食完之後，原來已經12點幾。於是我就車返Michael同Toby返中大。同佢地道別左之後，爹地Wtsapp我佢地已經返左太古城，當然有冇下場要問返我個靚靚女朋友啦！
「B啊，仲有冇地方去啊！？」我問Claudia。
「咁夜架啦！不如我地⋯⋯返去啦！」
「好！起程！」
既然爹地媽咪都返左去，我就唔入返大圍，直接行大老山隧道出返九龍，咁夜我都咁無謂飛咁快啦，去到一出到觀塘繞道就有架白色CL7係我隔離線，然後佢收油等埋我平排，見到佢改左黑鈴。唔使睇車牌已知係邊個啦！
「喂B啊架Accord做咩啊？你識架？」Claudia問。
「係Donald架車啊！」
「咁岩既？喂佢車住Stephy喎！」Claudia當堂打左個突。
我同Claudia互相望住對方，大家就打左個眼色，然後Donald就踩油走左去。
「去唔去啊B？」我問Claudia。
「追住佢，不過要小心安全！」
「Yes Madam！坐穩啦！」我講完就即刻踩油門跟住佢去，上演左一場EJ20大戰K20A既比賽。雖然我部掃把佬出廠規格係勁過CL7，不過之前見到Donald架車都重改左好多野，所以我追住佢都幾辛苦。由呢到去到九龍灣係雙線，九龍灣到藍田就係變三線，全部都係行車天橋。所以要快過Donald其實唔難。落到MegaBox，我依然都係吊住架CL7尾。一過左呢到就即刻變三線。話時話沙皮狗改到架掃把佬好勁，啲轉數好易上到去，就算踩到8000轉都好有力。基本上可以同架CL7平排，原本佢都多我少少車位既。去到觀塘碼頭，佢就比架N307城巴閘一即，我就趁機過佢頭。不過之後大家都收慢個速度，去到藍田巴士站就停埋一邊。
「喂勇哥，唔錯喎！手車幾辣。」Donald同我講。
「你都勁啊！跟得你多！」我回應佢。
「勇哥你同Claudia去邊架？」Stephy問我同Claudia。
「岩岩返大圍食飯啊！你地呢？」我問返Donald。
「我同Stephy去拍拖拖囉！而家返將軍澳。」
「你地兩個同居啊？」Claudia問Stephy。
「係啊！你地都得架，樓上樓下！」Stephy同我、Claudia講。佢一講完，我地兩個臉都紅埋。
「冇你地咁好氣啦！返學再講啦！」我同Donald講。
「好啦！拜啦勇哥勇嫂。」Donald同Stephy向我地道別。
「拜啦！」講完Say Goodbye後Donald佢地就去左將軍澳方向，而我就過海返太古城。
一返到屋企個停車場，已經見到爹地架Estima泊左返屋企，然後我都泊好車。
「嘩，Donald同Stephy拍緊拖咩？」Claudia問我。
「係啊，佢地自細就青梅竹馬，由幼稚園到大學都一齊讀書架，聽講佢地打算一畢業就即刻結婚。」
「咁Romantic？」Claudia變得好驚訝。
「你想嫁比我？」我用好奸既語氣同Claudia講。
「你就想！Lift到啦！」
我地一入到lift，有個男人話等埋，原來係世伯。見到佢同我一樣既裝束，我諗佢都係岩岩收工。我同Claudia當然要同佢打招呼啦，話晒佢都係我未來岳父黎架嘛。
「嘩你地兩個去邊咁開心啊？」世伯問。
「返左阿勇既舊屋食飯啊！見到佢爺爺嫲嫲！」Claudia橋住我隻手同我講。
「哈哈！公公婆婆由英國返左黎啊！頭先車左佢去你細姨屋企訓，叫你聽日去食飯喎！阿勇你都黎啦！！雅晴個公公婆婆想見下你啊！」世伯對我地兩個講。
「既然世伯叫到！咁我恭敬不如從命啦！！」為左唔想Claudia難做，我二話不說就即刻應承世伯既要求。
「Good！唔好放飛機啊！」世伯拍我膊頭咁講。
「放心啦爹地，我一定會有辦法叫到佢去既！」Claudia同世伯講，而世伯就忍唔住係到笑。
「好啦！」
呢個時候Lift到，我就將Claudia交返比佢爹地，雖然佢係我女朋友，但係話晒佢都係人地個女黎。所以都唔好阻住人地兩父女傾偈啦！同Claudia、世伯道別左之後，我就返左自己屋企。