由O Camp組爸組媽變左做真正既夫妻: Chapter 48
我地係沙灘傾下傾下，忽然諗起以前小朋友嗰陣同妹妹一齊係沙灘到玩沙，畫公仔。不過次次我都係畫我係多啦A夢，而妹妹就畫多啦美。不過當啲海浪黎到，就會將我地兩個嘔心嚦血既傑作完全淹沒，而妹妹就會係到喊，搞到我成日都要安慰佢。不過而家妹妹應該都唔會理我呢個哥哥架啦！見今日同Claudia黎到沙灘，就重溫一下童年啦！
「B！」我就同Claudia講。
「做咩啊？」
「你合埋眼先！」
「你想⋯⋯係呢到將我？」
「當然唔係啦！總之唔會係呢到食你既！」
「好！咁要等幾耐啊？」
「一陣啦！」
我講完Claudia就合埋眼，然後去左攞樹枝畫啲野。我邊畫邊望住Claudia，佢個樣真係好可愛，好治癒，就好似童話故事裡面既公主。見到佢咁可愛，我都莞爾一笑。畫完之後，我就叫Claudia擘開雙眼。
「搞咩黎啊B？」Claudia充滿疑惑咁問。
「你望下面先！」
Claudia聽完我講就望落地下，見到我畫既沙畫：「梁智勇 🧡 林雅晴」，下面仲寫住：「This present life love you forever!」。我見到佢今次笑到好Sweet，就知我呢個Suprise真心打動到佢。
「嘻嘻，B你鐘唔鐘意啊？」
「淨係畫唔算數。我要你⋯⋯親口同我講！比十秒時間你⋯⋯10⋯⋯9⋯⋯8⋯⋯」Claudia同我講。
「我鐘意你啊！」
「聽唔到！大聲啲！」
「我～鐘～意～你～啊！」呢次我好大聲咁同Claudia講。
「你鐘意邊個啊？」Claudia問。
「我～鐘～意～林～雅～晴～啊～！」我講完就Kiss左Claudia既嘴唇，獻上深深一吻。呢個Kiss代表住D咩？代表住我對Claudia既承諾，以及我對佢既愛永遠都唔會變，唯獨你是不可取替。
如果今天將失去 眼前的一切 剩低清風兩袖也不計
唯獨你一個是不可給取替 是我生命裡的一切 Wooh
如早知今生跟你 有幸可相愛 在當初應更努力為未來
其實我知道 是可一不可再 下半生准我留住你 一直相愛
我地Kiss下Kiss下，Kiss到連附近既建築物開始熄燈⋯⋯
「B啊！我地返去啦！」Claudia同我講。
「好啊！」
「不過我揸車，OK？你要指導下我啊！」
「當然啦！我係你既魔鬼教練！」
「唔係男朋友咩？」
「一樣姐！」
講完我地兩個就返去攞返架車，今次就換左Claudia做司機，我做乘客。等佢較好倒後鏡同座位就出發。
「你準備好未啊？」
「準備好啦！」
「認真你驚唔驚啊？」
「有咩好驚啊？只要同B你一齊，就算而家有危險都唔驚啦！」
「好！冇保險賠架！出發啦！」
「記得入一波，慢慢鬆離合器，再放手掣！最後慢慢比油！」我師傅上身同Claudia講。Claudia聽完就按照我既指示去做，成個過程一Take過，冇Retake，好順利就出左停車場。
「B啊？我地行返原路定係咩？」
「你鐘意啦！你係司機你話事！我已經將成個人比左你啦！」
「咁行返頭先嗰條路啦 ！」
「好！」
我地就沿住大潭道出返去，而呢個時間應該冇咩車，而今日係星期一，啲飛車黨應該唔會出黎架啦。但由於大潭道都係彎多路窄，所以我叮囑Claudia盡量要慢啲，因為始終嗰條路點都會啲馬路炸彈、綠Van、14號同314號巴士會行嗰到。最令我值得驚喜既係呢個傻妹揸車真係好鎮定、安全，完全唔會好似其他女仔咁揸車會騰晒雞。佢駕駛技術雖然未及得上我咁快、狠、準，但以日常代步黎講，絕對超晒班！至少我可以將條命放心交比佢，睇黎我對佢既擔心係多餘既！
返到屋企之後，Claudia就揸返架車入停車場。
「B啊！不如我落車先啦！」
「你想睇我泊成點？」
「聰明，咁都估到！」
「唔係既話點做你女朋友啊？落車先啦！」
我就落左車，睇下Claudia點泊。而佢泊車技術就好似我，三兩下就搞掂。而且部Fit同車位既框線係左右平衡成一直線。如果佢識泊S位就Very Good啦！我呢個男朋友當然要比個like佢啦！
「泊成點啊？」
「幾好啊！唔錯唔錯！」
「Yeah！！下次可以車你去游車河，我要揸你架RA-R！」
「好！不過點解你手車咁純熟既？比我想像中好好多啊。」
「你而家先知咩？不過都係爹地同你既功勞囉！我坐你架掃把佬嗰陣會留意下你揸車會做咩動作，然後再叫爹地教我。」
「果然觀察入微啊！」
Claudia講完就熄左匙，鎖返好架車。而同時爹地就岩岩落停車場。
「爹地！」
「世伯！」
「仔、雅晴你地拍拖拖呢？」爹地笑得好奸。
「係啊爹地！我地兩個岩岩去左赤柱，行左大潭道。係Claudia車我啊！」
「係咩？雅晴你真係好叻女啊！呢架GC8係你架？」爹地指住架GC8問Claudia。
「我屋企架！不過見Aaron咁鐘意車，咪叫佢做我既魔鬼教練囉！」
「叻女啊雅晴，女仔之家揸棍波車，仲要揸GC8！下次叫Aaron借架RA-R你揸啦！」
「好啊好啊！」Claudia講完就暗地打我一下。
「放心我既咪姐係你既！」我同Claudia講。
「嘻嘻！」
「世伯，B，我返上去先啦！早抖啦B！」Claudia比左個Goodbye Kiss我，然後佢就返上去。