由O Camp組爸組媽變左做真正既夫妻: Chapter 47

我地就由屋企出發，都係沿住東區走廊，但唔入東隧，落返柴灣轉入大潭道直行到尾。去到水庫對開，有架黑色既SLK係後面緊貼住我。仲係咁閃我高燈，識揸車既朋友仔都知道大潭道近水庫嗰個位特別窄啦！於是我就收油慢慢咁行，點知嗰架車加速仲要扒我頭。見到個車牌好特別，寫住「NO MONEY」，我心諗個車主一定好厭世，想做啲野吸引到人地注意。


「B啊！架車好特別啊！寫住NO MONEY啊！」Claudia同我講。

「嗰啲人想搏出位啊嘛！香港好多有錢人係會成日同自己過唔去啦！」我答返佢。

「你唔同佢鬥快既？」Claudia問。

「車住女朋友當然要安全駕駛架啦！而且佢架車肯定有改裝，冇可能追到佢啊！你知唔知過左埋水庫就會有快相同Road Block架啦！」



「比你揸本小姐架車冇錯既！」

不過既然嗰架SLK想死既，我都唔會阻止佢既。於是我就由佢過我頭，我就係佢後面食下花生，睇下佢搞咩花樣。

果然比我估中左，一過左水庫個出口就有Road Block，而架SLK就比警察截停左。而個阿Sir就叫我地繼續行。

「嘩B架車你買左幾耐啊？」我問。

「考左牌就即刻買啦！不過架車我一直都好少揸，自從見到B你揸架掃把佬之後就想揸返車！」



「我有冇咁大影響力啊？」我問。

「有啊！不過你手車咁好既，快得黎又會揸得好安全好定。」

「以前咁日日揸車法，日子有功囉！揸多啲就得架啦！慢唔緊要最緊要安全！！」

「係既係既！」

講返架Claudia架GC8，雖然佢副引擎咩都冇改，但係基本上好好力，上斜都唔怕腳軟，唯一唔好既就係車廂會嘈少少。如果以代步車黎講真係好慳油好好力，基本上只係定期換返啲消耗品同換油都夠晒用。



去到赤柱，我地兩個就泊好車，然後行左去The Boathouse到食飯。呢間係赤柱好出名既黃色小屋，裡面有間西餐廳。入到去，我同Claudia揀左個露台位，可以欣賞下赤柱海景，等我地可以放鬆下。

我同Claudia見今日既Set都唔錯，就決定整個Set Dinner黎食。

「嘩你識黎呢到既？」Claudia問。

「呢間餐廳係赤柱好出名架！」

「我以為你熟晒架步添！你成日黎架？」

「揸車就試過，食野就第一次！」

「我架車試完啦喎！有咩Comment啊？」Claudia問。



「以代步車黎講都算幾好架，但係唔好改裝。代步算啦！！」

「我都冇諗住飛車，要飛就揸你架RA-R啦！我呢架用黎遊下車河算啦！」Claudia笑住咁講。

呢個時候，我地叫既野食已經到左。而我同Claudia都放低各自既iPhone，只係品嘗眼前中既佳餚。見到Claudia食野個樣好有氣質，我諗一定係遺傳左佢父母既優良基因。



「做咩偷望人地喎？」Claudia嗲住咁問。

「你食野個樣，好可愛！」

「口花花！不過聽日我地大家都要返工，唔可以飲酒！」Claudia講。

「飲酒會傷身架！」 



「哈哈，咁都比你發現左！不過同B你試少少冇所謂既！快啲食野先，醫肚緊要！」

我地食完呢個情侶晚餐之後，見好似食多左，Claudia提議不如去赤柱海濱到散下步，女朋友話點就點啦。去到海濱，我就拖住Claudia隻手慢慢行，而佢都好識做小鳥依人挨住我。結果我地愈行愈遠，就走到去海灘，我地兩個都坐低望下個海。話時話有時望下個海，吹下海風，再同心愛既人談情說愛，咩煩惱都會冇晒。

「B啊？」

「咩啊？」

「點解你地男仔咁鐘意車既？」

「好多野架，有時車除左代步之餘，有時又可以比自己有屬於自己既空間去放空下，又可以同朋友交流下。好處多多架！」

「如果⋯⋯車同我，兩個只能活一個呢？」



「當然你重要好多啦！車冇左可以買過架，如果冇你係我身邊，我就只有一個軀殼，咩都冇啦！所以同你相處既日子，我會好好珍惜！你想我賣左架車啊？」

「咁我又冇咁野蠻，有時揸車都係一種樂趣既。只要你唔好玩車玩到傾家蕩產，重視架車多過我既話，我就唔會干涉既！不過⋯⋯」

「咩啊？」

「不過⋯⋯你有時要比我揸你架RA-R啊！知道未？我要做女車手！」

「Yes Madam！」