由O Camp組爸組媽變左做真正既夫妻: Chapter 49

Claudia走左之後，得返我同爹地係到。

「死仔你呢個女仔娶得過喎！」爹地突然間拍我膊頭。

「咩啊？」我黑人問號。

「點啊！係咪想揸返電單車啊？」

「有啲既⋯⋯」我好唔確定咁講。



「還是因為仲未放得低嘉穎啊？」

「當然唔係啦！雖然架NSR係因為Winnie而會去買既。但係⋯⋯令到我鐘意揸返電單車既⋯⋯係Claudia。所以架NSR同掃把佬我唔會賣！係我地三個人之間既回憶。」

「咁咪好囉！原來雅晴係你心目中咁重要既！作為你爹地，見到你好清楚知道自己做咩，真係好安慰。」聽完爹地講呢句，我真係覺得佢好肉麻。

「老老實實你落黎搞邊科啊？」我問爹地。

「落黎執野啊！架車要還返比你姑媽啊！」



「你賣比佢？」

「唔好傻啦！架車本身係佢架！我只係幫佢照顧住架車咋！點知一照顧就照顧左佢二十年啦！仔啊！你要好好孝順你姑媽啊！想唔想聽下點解我同你姑媽之間關係會咁好啊！」

「點解啊？」

我就好似小朋友咁，聽爹地講佢以前既事。原來爹地受爺爺影響從小就好鐘意電單車，佢岩岩入HKU嗰陣，瞞住爺爺、嫲嫲同姑媽買左一架二手既本田MC11電單車（即係我部MC28既祖先），呢架車以當年黎講絕對唔平，爹地都係因為想方便啲所以先會買電單車代步。點知唔夠一個月就比姑媽發現左，而姑媽都好識做，幫佢保守呢個秘密。奈何紙包唔住火，有一次爹地揸住架電單車車住媽咪遊車河比爺爺、嫲嫲發現左，佢地兩位老人家就係到大發雷霆啦！不過兩位老人家只係口硬心軟，後來爹地同左媽咪拍拖後，爺爺同嫲嫲因為好鐘意呢位好媳婦，所以就唔再反對爹地揸電單車。

爹地架MC11電單車：



再後來，爹地媽咪因為有左我，就即刻奉子成婚。同時佢地兩個為左我，放棄左佢地最愛既電單車，只係一直揸住部100仔過住幸福既生活，一到星期六日就車我同妹妹四圍去，享愛家庭樂。至於架Benz，就係姑媽當年為左慶祝佢考到高級公務員而買既新車，但係過左冇幾耐，佢就被政府調左去駐英國辦事處，一做就做左二十年。由於我姑媽唔捨得賣架Benz，我爹地就提議將架車轉讓比佢，等姑媽放假返黎香港可以用返架車。而我爹地都遵守承諾，呢二十年將架Benz保養得好好，一直都冇將佢賣走。由此可見，爹地同姑媽既感情一定好好，就好似我同妹妹咁，好重視與對方既關係。

「好啦！搞掂啦！」爹地就放好晒物品。亦即係代表架Benz終於可以功成身退，回到主人身邊。


「咁你幾時交車比姑媽啊？」我問爹地。

「過幾日先啦！」

「咁個位？？？」

「當然放架新車啦！唔通比你架NSR放晒咩？不過你攞唔攞返黎都得，反正舊屋都有車房！」

「你會咁好死？」我同爹地講笑咁講。



「咪當係慶祝你同雅晴拍拖囉！好好珍惜雅晴啊。人地係好女仔架！」

「知道啦！爹地！不過你睇岩左新車啦？」

「都算既，睇岩左架凌志RX200。沙皮狗話叫我聽日去埋睇車！」

「買二手車啊？」我問爹地。

「新車未出牌架，之前沙皮狗個Friend係日本到Bid返黎，不過而家放左佢到，睇完再講。返去啦我地！」

我同爹地就返左上去，然後就沖涼訓。