由O Camp組爸組媽變左做真正既夫妻: Chapter 30

過咗幾日，就係9月1號。你一日相信對全世界嘅中小學生來講係一個如夢初醒嘅日子。而今年嘅大學開學同中小學係同一日。即係半工讀啦！

「阿哥起身啦起身啦起身啊！」

「俾我瞓多一陣啦！」

「你再訓嘅話我叫姐姐落嚟㗎啦！今日係開學禮啊！你快啲車我去地鐵站呀！」

「你坐110或者坐地鐵囉！」



「你懶就懶啦！」

有冇搞錯啊又搵Claudia做擋箭牌，但係我一聽到Claudia就會覺得好驚，所以我都係死估估咁樣起身刷牙洗面。

我都係換返白恤衫，黑西褲同皮鞋返學，而妹妹就換好晒佢嘅女拔萃校服，孭住個書包。唔知點解見到佢就好似見返當年嘅自己，而家既妹妹已經變得亭亭玉立，唔再係當年同哥哥一齊坐火車返學嘅小妹妹。

由於今日收工之後就要返大學上堂，當我喺度諗究竟坐地鐵定係揸車嗰陣。Claudia就Wtsapp左我。

「衰人你起身未啊？」



「起咗啦！你呢！」

「我都起咗啦！你今晚使唔使返學啊？」

「要喎，你都係呀？」

「係呀係呀！不如今晚放咗學我哋一齊食飯啊！想遊車河！」

「好啊！」



聽完Claudia話今晚游車河，即係要我揸車啦。

「阿哥你揸車定坐地鐵啊？」

「揸車啦！不過要自己坐地鐵或者110啊！屋企樓下咪有巴士站同地鐵站囉！」

「知啦！」

我一落去停車場，Claudia就已經係到。佢今日就白色無袖短裙再加件白色外套，下邊着住白色高踭鞋同拎住個手袋，嗚啊！不過唔知點解今日見到佢面色唔係幾好。



「早晨呀衰人！」

「早晨呀傻妹！」



「你今日好靚喎！」

「多謝你呀！」Claudia笑盈盈咁講。

我哋兩個就上咗車，由於Claudia實習既幼稚園係灣仔地鐵站附近，而且時間仲早，所以我決定唔行東區走廊，行英皇道出返去時間都係差唔多。

「OK未啊！」

「咳。應該OK啦！行啦我哋！」

「一唔一齊食早餐啊？」

「 sorry呀我今日帶咗早餐，因為今日第日開學所以我想早啲返去準備一下！」



「都啱嘅！第一日開學，啲家長係緊張啲嘅！我覺得你將來會係一個好好嘅老師黎！」

「多謝你先！」

唔知係咪我哋早出門口嘅關係，朝早嘅英皇道同高士威道竟然冇乜車，平時呢條街一定會有好多家長送班皇仁仔返學。

去到呢兩條街嘅交界處，就見到有架白色既蘆筍8，睇改裝一定係Steven，於是我就走上佢隔離線開車窗Hi鳩佢。屌佢老尾原來同我一樣，車住Kary。

我哋互相見到大家之後都話咗一聲。

「少有喎勇哥，咁早起身飲早茶！」Steven問。

「勇哥做乜同Claudia咁煙韌啊？」Kary問。

「我哋再煙韌啲、再親密啲都得啊！想睇嗎？」我就串番佢哋。



「好啊！」Kary話。

「Steven哥，Kary想學野啊！」Claudia話。

「佢使跟你學？唔同你講啦！你兩個慢慢開心啲啦！」

之後我哋兩個就分開行，話咁快就行到去灣仔。由於Claudia間幼稚園係灣仔道嗰邊，所以我就揸架車車落去門口。

「好啦今晚見啦！」

「俾啲心機啊！」

Claudia就落左車，好彩佢今日條裙都唔算太短，如果唔係就會俾人影晒走光相。或者會俾家長投訴着得太暴露。



見到佢入咗去幼稚園門口，我就開車走人。如是者我就揸車返統一中心到泊車。

泊好車，就見到隔離有部白色嘅舊版MX-5泊咗埋黎，見到揸車嗰個人同埋車牌號碼好熟口面，原來係啊Fred！

「點啊買咗車啦？」

「係呀！5萬蚊即走！你個掃把佬都唔錯呀！」

「其實我都係貪佢四門先買咋！早排拎咗去改！」

「唔怪得知啲聲唔同呀！咁你之前嗰架100仔點啊？」

「同拓海架86一樣冇得整！」

「換廿嘩佬咪得囉！」

「唔搞呢啲嘢啦！你知啦香港法例換引擎好多手續，唔係不如換架車好過啦！」

「都啱！我哋兩個返公司先再講！」