由O Camp組爸組媽變左做真正既夫妻: Chapter 28
「做咩啊傻妹？」我問Claudia。
「講，頭先去咗邊度嚟！」
「去試車咋嘛！唔係咁都嬲啊嘛！」
「去試車？做乜試咁耐嘅。同埋架車唔同咗喎！」
「架車整過呀嘛，你係咪想食雞粥啊？」
「係呀，快啲帶我去啦！」
由於沙皮狗要同琪琪返屋企食飯，為免阻住佢哋收工。我哋就將個頭盔放返落個私家車到再揸走，架電單車就擺低喺車房。
我就將架車停咗喺強記雞粥門口，然後兩個人走咗入去。
「呢到有咩好食呀？」Claudia。
「有雞粥、炒麵、同乳鴿。」
「咁不如叫雞粥同炒麵啦！我哋兩個人分！」
「好啊！」
我就叫個老細幫我哋落單，由於我係呢度嘅熟客，所以基本上佢哋會整大份少少俾我。唔知點解我覺得Claudia呢個女仔真係好隨和，正常一般嘅港女係唔會去呢啲地方食飯。
如果有一個真係肯陪你食雞粥嘅女人，你話幾好呢？
「係咪第一次嚟呢啲地方啊？」
「唔係呀！我幾鍾意呢到啊！」
「我仲以為你哋呢啲女仔唔會去呢啲地方食飯添！」
「有乜所謂啊，食得落肚咪得囉！食多咗咪跑步減肥囉！其實啊去高級餐廳食飯同去呢啲地方食飯，咪又係一樣，最緊要就係同邊個食飯！」
聽完佢咁講，我覺得Claudia呢種咁嘅女仔真係世間上已經絕種，呢個女仔好簡單、好直接。唔會好似其他港女咁喺到媽媽叉叉。你話如果同佢一齊，幾好呢！
因為你快樂，所以我也快樂。
轉個頭，個老細攞咗雞粥同炒麵俾我哋食。
「我唔客氣啦！」我同Claudia異口同聲咁講。
「啲雞粥好好食呀！你果然冇介紹錯。」Claudia同我講。
「最緊要林小姐鐘意食。」
「你都快啲食啦！使唔使喂埋你啊！」Claudia問。
「好啊！」
「你就想啦快啲食啊！」
我哋兩個一人一口，就解決左個雞粥同炒麵。食完之後我就埋單，再買多一碗俾妹妹食！你知啦做哥哥實會比妹妹恰架啦！陣間佢如果我偏心Claudia嘅話就會妒忌㗎啦！
呢個時候，妹妹就Wtsapp我：「哥哥！你喺邊呀？」
「我係大圍啊，買咗雞粥俾你食！你練完水未啊？」
「我練完啦！你陣間過嚟學校接我呀！」
「好啊！」
「邊個嚟㗎？」Claudia問。
「妹妹呀，佢啱啱練完水！諗住接埋佢返屋企！」
「咁快啲行啦！」
我哋兩個就上返架GDB到，今次就行青沙公路出返九龍，再行連翔道轉入佐敦道。
「喂衰人架車感覺好似唔同咗嘅？」
「有咩唔同呀？」
「架車好似實淨左、舒服左、快咗。」
睇來Claudia都幾鍾意呢架車嘅Setting，只要你舒服我就可以放心啦！
「你鍾意就得啦！」
「係喎你以前同Angela真係坐火車返學㗎？」
「坐兩個站咋嘛有幾遠姐！你以前係點返學㗎？」
「梗係坐地鐵啦！只係多你幾個站姐！或者坐110巴士！依家就坐地鐵啦！」
「咁都方便！」
「係喎架電單車你做咩擺係你朋友嘅車房嘅？」
「架車本身係我嘅，本來呢架車係我買黎車我以前嘅女朋友，但係買咗之後佢就發生交通意外過咗身！同埋之後我就去咗英國Exchange就好少揸電單車，咁啱佢嗰度有位咪放喺佢嗰度先囉，得閒佢又可以幫我睇吓車！」
「可唔可以唔好賣嗰㗎電單車呀？」
「做咩啊你想揸電單車呀？」
「我想某個人可以車我游車河咋嘛？就當係為咗我唔好賣嗰㗎電單車啦！」
唔通Claudia想我用電單車車佢？個衰妹人細鬼大啦！
「好！既然你話唔賣，就咁話啦！」
「Yeah！」
「不過你唔鍾意坐私家車咩？」我問Claudia。
「兩樣都鍾意，只不過有時可以交換下黎揸！」
「蠱惑啦你！」
「你仲講！就到啦！」
我哋兩個就停咗係拔萃女書院門口，呢間學校相信對好多家長來講係一間夢寐以求嘅學校。好多嘅女名人都係喺呢間學校畢業。但係無論係男拔還是女拔，出親嚟都會有一個社會通病，就係睇其他學校嘅學生唔起。
而自細爹哋媽咪就教識我同妹妹，就係從小到大都要保持着一份謙虛嘅心，努力去向其他人學習！唔可以因為自己係名校生嘅身份而歧視他人，因為畢咗業之後入咗大學，還是踏進社會。就會有好多出自唔同級別嘅學生與你平起平坐，甚至會高級過你。如果你自己仲係原地踏步嘅話，咁樣呢個世界都唔會為你作出任何嘅改變。
記得以前曾經聽過有一句說話叫「做人唔好太DBS」。以前就係因為好多師兄自以為係男拔仔就大撚晒，整臭左個朵。除咗女拔妹之外，基本上其他學校嘅人都唔會理你。當佢哋仍然沉醉於名校生既美名時，背後有好多人就會喺到頌唱「拔萃有個大仆街。。」。
「嘩好耐都無返過嚟呢度啦！」
「我都好耐冇過嚟啦！」
「喂乜你以前唔係成日好鍾意過嚟呢度急女咩！」
「邊有呀？唔好喺度老作！」
「咩啊！我仲記得唔知邊個男拔仔喺到俾人唱係大仆街！」
「你講大仆街大仆街？」
「唔會係你掛？」
「作大仆街嗰首歌咪係我同Steven囉！當年我哋幾個係學校見到有個同學喺到串串貢又話阿爸係邊個。跟住我哋咪作首歌喺度唱衰佢囉！之後呢條片就比人放左上網！」
「原來你咁衰嘅！你死啦！咁之後有冇俾人記過先！」
「有啊！諗返起嗰陣時都覺得好好笑！不過後尾嗰條友都移左民。」
「你曳曳啦！係呢你以前英國Exchange半年啊！」
「係啊！我Year2 第一個學期去左英國Exchange啊！做咩啊？」
「我都係啊！同你同一個學期囉！我係去左Manchester啊。你呢？」
「我係Warrick啊！不過大家都係英國生活過。」
「係啊！妹妹黎啦！」
妹妹出咗嚟，就上咗我架車到。佢喺車外見到Claudia喺度就笑盈盈，然後上咗後邊座位。