由O Camp組爸組媽變左做真正既夫妻: Chapter 27

落左大圍，我哋去左沙皮狗間車房到。

「傻妹，你肚唔肚餓啊？」我問Claudia。

「我唔係好肚餓咋！不過你做咩會帶我黎呢到既？」

「換返架私家車咋！」

「原來係咁。不過陣間可唔可以帶我食雞粥啊？我想試吓啊！」



「陣間帶你去啦。」

我哋入到去，沙皮狗就叫：「勇哥，做咩帶埋女朋友嚟啊？」

「鬼係佢個女朋友！」Claudia話。

「係喎！琪琪呢？」琪琪即係沙皮狗個女，同妹妹讀同一間中學，都係女拔妹，同妹妹係同一屆。

「佢係入邊睇緊日本Bid網，幫我睇下有咩零件可以返！」



「你可以唔使做啦！間車房你自己買既！」

「好彩當年沙士嗰陣買左呢個舖位咋，如果唔係俾租都比死我呀！你睇吓架車先！」

呢個時候琪琪就行左出黎，見到我就問：「勇哥！Angela呢？」

「佢要練田徑呀嘛，你今日唔使練游水咩？」

「啱啱練完咋！呢個姐姐咁熟口面嘅？我知啦，呢個姐姐以前係排球隊同田徑隊架！」



「係呀！果然好記性啊！」Claudia同琪琪好似一見如故，大家都係女拔妹出身，自然會有共鳴嘅。我見佢哋咁好傾，就叫Claudia入去冷氣房同琪琪玩一陣。而我就同沙皮狗傾下部車。

「睇吓你架掃把佬先！」

「好啊！」

我睇架車外型基本上冇咩特別，只係換咗CE28古銅色18吋鈴，S202款既STI尾翼。話時話CE28鈴真係好百搭。而原裝包圍基本上已經好型，所以都唔使點樣換。而今次整嘅主要圍繞係改良佢個操控。冇錯啦，今次既Design都係參考S202。





「幫你改完架車啦，之前將架車上Dyno機，大約420匹左右！」

420匹，雖然打灣岸就會覺得馬力好細，但係如果用返係香港咁塞車嘅路面其實已經好夠用。因為始終我都唔係攞嚟飛，係用嚟代步之用。



「夠做啦，如果唔係車會惡過人！控制唔到就會好大件事嫁啦！同埋我就將你架車設定為行街標準，如果唔係你爹哋同你女朋友會投訴㗎！」

「佢唔係我女朋友嚟㗎！」

「好快就係㗎啦！你去試吓車先！」

我爬咗入司機位，見到架車已經裝好晒STi油溫、水溫、油壓同Turbo錶，同時隔離已經有晒ECU。睇上去係充滿咗辣味。

一著車匙，條Sti喉出嚟嘅聲俾以前好聽好多，但因為噪音限制，所以就加咗個催化器，而家嘅聲唔係嘈，只係低沉，呢種係我最鍾意嘅類型。

我就喺大圍同沙田之間既大埔公路行左幾個圈，發現架車嘅油門反應係真係快咗好多，最大分別就係由5000轉到8000轉嗰啲為升得好快，類似啲Civic Type R咁由頭扯到落尾。而係低、高扭個反應亦都非常好。無論係低速起步還是高速起步都有咗好大嘅進步。換左Spec N既Mount令到架車嘅接觸點好準確，唔使估下估下。最後就係要講嘅避震，絕對適合係香港日常道路行駛。

而家我就知道，呢架係好車，越嚟越鍾意！



行完之後，我就揸返架車去車房。見到Claudia鼓起泡腮，我就知道大事不妙。