由O Camp組爸組媽變左做真正既夫妻: Chapter 25

過咗幾日，我同妹妹仲未開學，但係要喺Firm返工既我都要按返Office Hour返工架啦。

而沙皮狗通知我架GDB已經整好曬，叫我可以隨時過嚟攞車。但因為我要返工嘅關係，要等我放工之後去攞。

於是我就揸返架NSR去返工，我就攞返我個Arai頭盔落停車攞車。


一落停車場，就見到Claudia既爹哋。

「早晨啊世伯！」



「早晨啊阿勇！你返工啊？做乜拎住個頭盔嘅！」

「係呀！我嘅私家車壞咗，咪揸電單車返工囉！Claudia呢？」我問世伯。

「等世伯睇吓你架電單車先！佢陣間先落嚟啊！要車佢同佢媽咪返工！」

我就帶世伯去睇吓我架NSR，佢都嚇咗一驚。

「嘩你呢架車好嘢嚟㗎喎！你喺邊到搵返嚟㗎？」



「我早幾年二手買返嚟嘅，不過買咗冇幾耐就去咗英國Exchange左半年，咪俾咗我個兄弟囉！只係而家私家車拎咗俾佢整，所以佢就叫我攞返架電單車用住先！」

「你自己攞返黎用啦架車！我以為你會買最新嗰款CBR添！」

「因為我以前個女朋友好鍾意呢款電單車，所以我考到車牌之後買呢架車黎車佢囉！但係當我攞咗呢架車之後，佢就係英國發生左交通意外過咗身。」

「原來係咁，所以你就之後決定放棄電單車！講真見到你呢架車就諗返起我當年架哈利！」

「世伯你有㗎哈利咩？」



「有啊！我記得以前雅晴細個嗰陣好鍾意坐我電單車去游車河。佢仲話大個咗仲要考番電單車車返我！不過太危險啦，佢考左牌之後我都冇比佢揸。」

「原來係咁，同埋阻住你返工啊世伯？」

「係喎都差唔多啦喎！你怕唔怕趕啊？而家等緊個女同佢媽咪落嚟咋嘛！」

「唔怕啊！好啦唔阻住你哋，拜拜世伯！」

我就帶返個頭盔，用匙卡同腳撻去著車，依條喉依然都係咁嘈。臨走前我就同世伯道別，就上返東區走廊落左金鐘到返工。

好彩今日早出門口，條東區走廊、維園道同告士打道都唔算多車。但係陣間過咗八點幾呢到一定會塞到仆街，所以早出門口係非常重要。

一去到上到東區走廊，見到有五、六架法拉利F350、波子GT3 RS同林寶堅尼Aventador當呢度係賽道。原來又係一班二世祖喺到比賽。



我就當然冇理到佢哋啦，始終大家唔同級數。我就按返正常速度行駛。

有時諗極都唔明，喺香港其實真係唔啱揸超級跑車，覺得除咗攞嚟威之外，係真係冇乜意義㗎！因為我覺得超級跑車又坐得唔舒服、比稅又貴、又難泊位、維修同保養都好貴。如果俾我揀嘅話，我寧願買部JDM，然後再慢慢去保養。起碼JDM比較適合香港嘅路面行駛。

返到去公司樓下，趁時間仲早就走去統一中心嗰邊食個早餐，就見到Steven排緊隊。

「咁早啊！會計師！」

「你又咁早啊！大律師！」

「唔介意我搭枱呀嘛？」

「何止搭枱呀！俾埋你食都得啊！」

「好兄弟！」



我哋兩條友坐低左，都係叫一樣嘅早晨套餐。你地知啦男人老狗食嘢都係好隨便㗎啦！唔似女仔咁左諗右諗都未諗到。

「喂老老實實你架掃把佬改好未啊？」

「今晚去攞車！頭先揸電單車返嚟！」

「係咪你以前嗰部NSR啊？架車唔係比左沙皮狗咩？」

「係呀！沙皮狗話叫我攞返架車用住先！仲話架車咁多年都係我個名！不過揸返電單車真係好撚爽！早排仲行咗上大山入左元朗！」

「屌你啦！你真係唔驚死㗎喎！」

「大山我真係唔敢亂來，好撚危險！」



「連你都話危險？話時話你可以用電單車車返Claudia。那你諗下佢到時攞對波貼落你到，佢對手放喺你條腰到，扯撚晒旗啦！話時話你兩個去到咩關係先？」

「你咁八卦做咩先？快啲食早餐啦如果唔係遲到啦！」

我哋兩個就用左20分鐘就清理左個早餐，然後我就請埋Steven嗰份早餐錢，費事佢咁多嘢講。然後我哋兩個趁時間尚早就早啲返去力寶中心嗰到，你知啦一到八點幾九點鐘就要排隊坐𨋢架啦。同埋早啲返去可以慢慢係公司嘆咖啡。

一返到公司，原來Fred仲早過我返。

「喂Aaron！有嘢想請教你！你係咪有買車啊？」

「係呀做咩啊！」

「冇見之前考左大牌（即係大律師資格），想買部車獎勵下自己，我睇岩咗㗎MX-5，想睇下呢架車有咩要留意。」

「係咪新車呀？」



「唔係呀，我係想買廿幾年前既跳燈版啊！你知唔知邊隻呀！」

「咁我知邊隻啦！好嘢嚟㗎喎！溝女戰車！不過你諗住買二手定係日本Bid車返黎啊？」

「買住二手先啦，如果冇先再Bid車，不過呢架車Bid咗返嚟可以當古董車即刻出牌！始終都有20年吖嘛！之前上網睇啱左架白色！就係呢架啦！」Fred就開左張相比我睇。見到有架91年出廠既白色MX-5，車牌仲要同當年TVB嗰部係一模一樣。



「買到記得車我啊！」

「咁你呢買咗咩車啊？」

「我買咗部掃把佬呀，不過拎咗去車房到檢查，所以今日都係揸電單車返工！好啦老細返嚟啦我哋要做野啦！」