由O Camp組爸組媽變左做真正既夫妻: Chapter 21
一入到屋，就見到爺爺嫲嫲同姑丈姑媽喺度游緊乾嘅泳，而爺爺就不斷喺到食嫲嫲啲牌，搞到我笑到眼淚水都標埋出嚟。
順帶一提，我爺爺嫲嫲幾十年來都恩愛如昔，就好似真情既梁友同阿家咁，我爺爺就風流倜儻、玉樹臨風，見到女人就好似搽咗蜜糖咁。我嫲嫲就係呢條村嘅陀地，係屋企嘅皇太后！
我姑媽同爹哋媽咪一樣都係政府嘅高級公務員，不過佢九七回歸之前調咗去英國做嘢，後來就同左當地任職大學教授嘅姑丈結咗婚，兩個人都冇小朋友。
「打緊牌啊？」我就喺度問佢哋
「阿勇你返嚟啦？大個咗好多喎！」
「哈哈係咩！」
「話時話你爹哋呢？」
「佢同媽咪有嘢做嚟唔到！」
「咁呀！我哋都夠鐘煮飯啊！阿勇一齊食啦！爺爺嫲嫲想同你地食飯！」
「好啊！」
然後我哋一家人就喺度一齊食飯，如是者都係三餸一湯。話時話姑媽姑丈整啲飯餸都幾好食！
而我哋食飯嘅話題主要都係離唔開大家最近嘅近況，原來姑丈同姑媽都申請左調返嚟香港做嘢，最估唔到嘅係姑丈就入咗中大到教中國文學，仲講笑咁同我講叫我過去幫佢手做佢嘅教學助理，可惜我已經有Firm呢份兼職。
食完飯之後，我就入返以前間房，呢度基本上除咗有張床，其餘嘅嘢都搬咗去新屋嗰度。
入到去，就見到個Notice Board，塊板裏面係掛住我以前啲考DSE放榜既訪問，講真你依家要我再行多一次都未必考到。
我離遠再望一望張報紙下面，嗰個女仔咁熟口面嘅？嗚啊！原來個傻妹同我一齊上咗報紙。大家都係該屆既DSE考生。話時話個傻妹基本上都冇咩點變，依然都係一個可愛嘅美人兒！
呢個時候Claudia就wtsapp我：「喂衰人呢個人係咪你嚟㗎？」同時佢仲Send返同一張相俾我
「你又知嘅？估唔到你讀書都幾叻個喎！」
「使乜講！都話你唔好Harsh我哋呢啲女人㗎啦！你個頭好Gap啊！仲學人剪埋晒啲六四分界頭！」
「以前柒呀嗎！依家靚仔咪得囉！點解你個樣都係咁靚嘅？」
「你抵得我命好啊？可能我做得好事多啦！你記得幫我買嘢啊！今晚約定你啦！」
「Yes Madam！」
「我做嘢先啦唔同你講！」Claudia就Off左。
同時姑媽就入左黎。就問：「阿勇可以入嚟嗎？」
「好啊！」
「你之前咪話叫我係英國買件英格蘭波衫既？我買咗返嚟啦你睇下啱唔啱着！不過我冇印字啊！」姑媽就比左件英格蘭波衫比我
「唔緊要呀！都係心意姐！」我好謙虛咁講
「哈哈哈！你爺爺話出黎睇電視喎！」姑媽莞爾一笑
我哋兩個又走返落廳到，爺爺又比嫲嫲當係工人咁使。
「喂老嘢卒大力啲啦！」嫲嫲話
「得得。。。阿家話點樣就點樣！」爺爺喺度講
「老竇、阿家出唔出去啊？叫阿勇揸車出去啦不如？」姑丈喺度叫。
「留返係屋企咪仲好！乖孫你今日有冇揸車呀！」嫲嫲話
「有啊不過拎咗去沙皮狗到整！陣間仲要入元朗幫爹地買野！」我就回應返佢哋。
「咁你仲唔快啲去！總之你今晚返嚟搵我地食飯啦！你姑媽買定餸㗎啦！如果係嘅話我同你爹地講啦！」嫲嫲喺度講。
「好嘅好嘅今晚見啦！」我同爺爺嫲嫲佢哋道別完之後，就出咗去。
本來諗住唔揸車搭269D既，但係用電話開KMB既app嗰陣，仆你個街要等成20幾30分鐘。當然我呢啲窮人係唔會搭的士咁浪費架啦！
趁等車既時候，我就行返去沙皮狗間車房到睇下我部GDB改成點。一入到去我架車已經俾佢同幾個師傅做緊手術。
「勇哥你要用車啊？」
「唔係呀想八卦下架車改成點咋嘛！陣間要入一入元朗！而家等緊架269D。」
「使乜啫！你攞返架PGM去咪得囉！反正你已經甩左電單車P牌！頭盔同鎖匙掛咗係架電單車度！記得唔好撞爛就得啦！」
「多謝你呀兄弟！轉頭揸返嚟俾你啊！」
「你攞去用啦！整好咗先返嚟呢度換車啦！」
「好既！」
我就帶咗嗰個我熟悉嘅Arai頭盔，用咗佢獨一無二嘅匙卡去插匙。再用隻右腳撻一撻，同時用右手向前扭一扭，成架車即刻上到兩萬轉，嘈到拆天。而沙皮狗同我講架車買咗返嚟都冇改過，基本上個設定係同我揸嗰陣時係差唔多。揸返上去就可以搵得返當年嘅感覺。如果着牛仔褸，牛仔褲，白色波鞋既話就會好似天若有情嘅華Dee。
如是者，我就行返城門隧道落荃灣，只係到咗荃錦交匯處之後轉上荃錦公路落返錦田。由於呢條公路同新娘潭係一個交通黑點，好多人喺呢度發生交通意外而喪命。所以我無論揸電單車或者揸私家車我都唔敢係呢條路亂飛。
果然不出我所料，去到石崗軍營個灣位，有一架R1同另一架川崎Z1000攬炒，而嗰兩個司機流左好多血，昏迷不醒，睇嚟佢哋兩個都係凶多吉少。而隔離就有好多警車同兩架救護車停咗係到。當然我係反方向就繼續向前行。
結果就用咗20分鐘先到錦田，然後再行錦田公路出返元朗市中心。
去完元朗廣場泊好架車，就去咗恆香餅家同榮華到幫媽咪同Claudia買臘腸。好彩佢哋只係叫我買少少，所以一個背囊都裝得晒。咁就唔怕俾人鬧我係一個水貨客啦。
拎完之後見有啲肚餓，就去咗佳記到食碗B仔涼粉先返去攞車。不過可能今日係假期，所以有好多人排隊。
突然間，有個女仔答我膊頭，我回頭一望，原來係Winnie既家姐同佢個小朋友。不過佢個小朋友應該都係得三四歲。由於我同Winnie生前同佢屋企人關係都算幾好，所以我都係同返Winnie一樣叫返做家姐。
「Aaron乜咁啱嘅！」家姐問。
「係呀幫我媽咪嚟呢度買嘢吖嘛！呢個係你個女啊？」我問。
「係呀！麗瑤叫Aaron哥哥啦！」
「哥哥！」麗瑤叫道。
「好乖喎！你哋又咁啱喺度嘅？」我問家姐。
「係呀！咁啱小朋友放暑假，咪一家三口返嚟囉，我老公陣間都黎。不如一齊坐呀！」
「好啊！」
就係呢個時候家姐嘅老公嚟咗，我哋四個就揀咗張四人枱度坐低。估唔到家姐都幾長情，佢個老公就係我之前成日見到嗰個。原來家姐同佢老公就係Winnie過咗身冇耐就奉子成婚。今次係因為放假先返嚟香港。
「老公！」
「老婆！係呢呢個男仔係？」
「你唔記得咗啦咩！嘉穎個男朋友Aaron啊！」
「估唔到咁岩係度見到你呀！個傻妹都走左成兩年啦！」
「係呀時間過得真係快呀！」
「喂Aaron你變咗好多呀！」
「有咩？」我不禁偷笑左一下。
「你個人開朗左好多就真，我記得個傻妹走嗰陣你日日就喺度借酒消愁，又日日喺度喊！搞到我哋都好擔心你！而家見到你咁我諗個傻妹都可以安息啦！」家姐對住我講。
「咁做人都要向前望嘅，如果比個傻妹知道我依家喺度自暴自棄！咁我又點可以對住佢呢？因為我知道雖然佢出事嗰陣我唔喺佢身邊，但係我知道佢就算到咗生命嘅盡頭，佢都想堅持到最後！」
「你識咁諗最好啦，我同你個家姐都好放心！不過你宜家有冇同第二個女仔喺埋一齊呀？」家姐個老公問。
「冇啊！」
「做咩唔試吓同第二個女仔喺埋一齊喎？我知其實你係驚我哋點樣睇你咋嘛！無論我、爹哋媽咪都好想你尊重返個傻妹嘅遺願，希望你得到幸福嘅愛情。」家姐喺度講。
「我知啫。。。但係我好驚下一個女仔會離我而去！」
「傻仔，你唔試過又點知喎！最緊要機會嚟到嗰陣就要好好把握！我哋幾個睇好你啊！」
「知道啦！家姐！」
呢個時候無啦啦又有電話打嚟，原來係Claudia。睇黎呢個傻妹都幾鍾意痴住我，真係當我廿四小時可以聽電話！
「點啊林小姐？」
「喂衰人幫我買咗野未？」
「林小姐叫到我點敢唔買啊？」
「你係至好講啊！你喺邊呀？」
「啱啱撞返個朋友，而家同佢食緊B仔涼粉！」
「係仔定女先？」Claudia好奸既語氣咁問我。
「你咁八卦做咩先！」
「咩喎人哋都係關心你咋嘛？記得今晚拎野比我呀！如果唔係嘅話你就知味道！」
「係嘅拜拜啦！」
「拜拜！」Claudia就收咗線。
我一收線，家姐同佢老公望住我係到奸笑。
「喂估唔到有女仔打電話俾你喎！」家姐講。
「你又知嗰個係女仔？」我反問返佢。
「傻仔一聽到咩小姐就知係女仔嚟㗎啦！鍾意人就好快啲同人表白啦！」
「家姐你又玩我啦！」
「好啦嘢食到啦！呢一餐飯就當係慶祝你重獲新生！唔好同我爭啊！」
「既然你咁講就咁做啦！」
呢個Tea，我哋都食得好開心，估唔到Winnie家姐同父母都睇得好開，鼓勵我追第二個女仔。而臨走前我仲同可愛既麗瑤、家姐同佢老公一家三口影咗相，因為今日一別，唔知道何時再聚。