男神呢個稱號令我食左唔少女(有甜）: 永別了
佢講完之後就拎轉後面，慢慢行返去佢個皇位到，而我...就一直dup低頭不斷咁喊，我抬起頭望住佢嘅背影，憤怒湧上腦到。
我衝過去推趺佢，一拳一拳咁打落佢塊面到，我已經無理會點解我郁得返，只係一直係咁用盡最大力打落佢到。
「佢話過結婚嘅時候要搵我做伴郎」「佢話過佢想同樂怡未來可以生兩個小朋友」「佢話過佢想同我一齊考入中文大學」
當我打到佢塊面流哂血個陣，我就比人推開左，成身都郁唔到，但係我係咁掙扎，嘗試突破佢對我嘅控制，可惜都係唔得。
「佢話過佢想第時可以搵好多好多錢」「佢話過佢想見到光復香港個一日」「佢話過佢想同堅持左咁耐嘅手足一齊係煲底到相見」
個嗰男人捉左我個頭，用隻手一巴車落我塊面到，一拳打落我個肚到，仲用力扯我啲頭髮，宜家嘅我完全唔覺得痛，只係好想打死佢。
我：「夠膽你就放開我！！似返個真男人咁堂堂正正同我打一場！！！」我擘大隻眼望住佢，成個劉馬車一樣。
「佢話過佢想可以係人生入面見到一次明星」「佢話過佢想打一場熱血到不得了嘅籃球」「佢話過佢想係呢間中學到畢業」
男人：「我同你講，我勸你就唔好激嬲我，如果唔係我個女鍾意你，我一早就可以將你殺死。」
我：「黎呀！！！宜家嘅我一啲都唔怕死！！！你殺左我朋友！！！你最好就殺死我！！！唔係嘅話！！！我一定將你五馬分屍！！！」
男人：「好！！既然你咁想死！！！我宜家就黎成全你！！！！」佢伸出兩隻手指，準備將我爆頭，我合起雙開，心入面只係諗住一句說話。
「我好快就會過黎搵你架啦，你放心啦，我話過落地獄嘅時候會同你一齊，等我呀阿彥。」
就係呢個時候，埲牆出現左一個好似Doctor Strange整出黎嘅傳送門一樣，不過呢個傳送門係黑色。
丘以男：「你同我停手！！！你夠膽殺死嘅話我就同你斷絕父女關係！！！」個男人聽完之後先打算鬆開我，丘以男一下子將我飛過去佢到。
男人：「你男朋友頭先打我喎，見到未來岳父都咁唔禮貌，我只係輕輕咁罰一罰佢姐。」佢伸出兩隻手好似扮到自己好無辜咁樣。
我：「你唔好係到扮哂野！！明明就係你殺死我朋友先嘅！！！我朋友根本就咩都無做過就比你殺死！！！」
男人：「你朋友知道左咁多野，我點知佢會唔會爆出去喎，處決佢都係防患於未然姐。」
丘以男：「阿爸你太過份啦，既然你傷害我愛嘅人，咁你就唔好怪我傷害返你。」
男人：「你宜家作反咁話啦喎？要男朋友都唔要自己老豆，你實在令我太失望啦，無諗過自己個女都要反我。」
丘以男望住個天花板然後打開佢兩隻眼，個天花板出現左一個黑色五芒星嘅圖案，個嗰男人看到只係笑左一笑，然後係佢下面出現左一道白光，就好似五芒星一樣圍住佢個人。
跟住我見到上面有一道黑色嘅閃電一下子擊中左個嗰男人，佢係白光入面痛到不斷咁大叫，而係我隔離嘅以男隻眼一直係到發光。
宜家嘅我就好似睇緊科幻電影一樣，一方面好驚會唔會打到我，一方面又覺得個畫面好震撼。
丘以男再拍一拍手，個天就出現左比黑色暴雨更大嘅雨係咁射落個男人到，我睇清楚啲發現唔係雨水黎，而係一支又一支嘅箭。
個嗰男人成身都插滿左箭，身體不斷流血，佢好似已經奄奄一息，但係個人仲可以企係到，無訓底係地下。
因為係地下嘅....係一隻擘大左個口嘅鯊魚，如果佢趺左係地下嘅話，就會直接送入鯊魚個胃到，變成鯊魚嘅食物。
丘以男：「最後一擊啦...如果都係殺佢唔死嘅話....咁樣我都無辦法...」佢講完之後深呼吸左一下，然後個人慢慢飛左係天上面。
佢攤開兩隻手，左右兩埲牆出現左兩隻手，佢合起雙手，個兩隻手亦都跟住佢合埋，我諗佢應該係想將佢老豆壓死。
佢壓左幾下之後就好似無哂力，一下子由個天趺落地下，我即刻衝過去將佢接住，佢兩隻眼變成粉紅色咁望住我。
我：「點解...？點解要為左我連自己老豆都想殺死...？好唔值得...一切都好唔值得...」我講講下忍唔住流左眼淚。
丘以男：「因為...我愛你...我已經好耐都無愛過人...已經唔記得左愛係咩感覺...呢一切都好值得...」
我哄埋落佢到咀左佢一啖，呢一次唔係佢控制我，而係出於我自發，因為呢樣野...令到我愛上左佢。
丘以男：「我都話你鍾意我架啦...唔好睇我好似好恐怖咁...其實我都好靚女架...」
我：「嗯！！我地要快啲離開呢到啦，快啲返去現實世界到。」我將佢抱起諗住由傳送門出返去，佢應該用左太多能量而無哂力氣。
當我已經係到去傳送門前面，差一步就出到去，結果個傳送門消失左，搞到我一衝過去就撞到個頭。
男人：「你地...唔洗旨意離開到呢到...我係...絕對唔會放過你地！！！！」乜原來...佢仲未死...？
佢一下子就將五芒星陣打破，「噠！」係下面嘅鯊魚即刻就死左，周圍嘅白光變成黑光，佢慢慢行近我地。
佢除佢頭上個皇冠除左係地下，向住天花板大叫，「吼！」佢背脊出現左六隻白色嘅翼，同傳說中嘅路西法一模一樣。
佢兩隻眼由黑色變成白色，就好似由一隻魔鬼變成一隻天使一樣，只不過呢隻係一隻邪惡嘅天使。
我知係呢個時候我地兩個應該準備死亡，因為以男宜家已經無哂力氣對抗，同埋傳送門已經唔係到，而我只係用公主抱咁抱住以男。
男人：「估唔到最後我都係要殺死自己個女，就當係一個終結，然後就開展一個新嘅世界。」
佢用隻右手整左一粒黑色波出黎，好似螺旋丸咁愈整愈大，大到佔左呢個空間嘅一半，但係我唔驚，我已經預左要同以男一齊死。
丘以男：「係時候要講再見啦，蔡煒燕。」佢咀一咀我個嘴再講。
我：「嗯，我諗我地會係地獄入面再相見，到時我地再拍拖啦。」我瞇埋眼準備迎接佢比我地嘅最後一擊。
丘以男：「落地獄嘅...只有我...唔會係你...」佢流哂眼淚再同我講。
我：「我地兩個係會一齊死，你講架，我地兩條命已經連埋左一齊，你死嘅話，我都會死。」
丘以男：「其實只不過係我呃你咋...我根本就無咁做...我只係想呃你，等你可以一直陪住我...」
我：「你講咩話...一切只係一個大話...？」呢個時候個男人將個黑色波扔落我地面前。
丘以男：「嗯，我好開心自己係臨死之前搵到一個自己最愛嘅人，我已經....我已經死而無憾啦...」
佢伸左兩隻手指，我見到就知佢想做啲咩，即刻捉住佢兩隻手唔比佢咁做。
我：「唔得！！要死就一齊死！！！我係唔會比你一個人面對！！！」
丘以男：「好好好...我放手我放手...」聽到佢咁講我先鬆開佢，黑色波同我地只係相差唔到30cm。
我再一次我瞇埋對眼，不斷回想自己嘅人生，雖然我仲有好多野想做，但宜家嘅我...更加想同以男一齊接受死亡。
Tracy、桐桐、梓恩...同埋一直都係我最愛嘅珮恩...好遺憾我無辦法再見到你地，希望你地會原諒我...
丘以男：「唔會架...你仲可以見到佢地...」我即刻打開返隻眼，見到佢已經做好準備動作。
我：「唔好呀！！！」
丘以男：「永別啦...希望我地下一世仲可以再見...同埋...我愛你...」
我：「丘以男！！！！！！！！」
「噠！」
就係黑色波掂到我地嘅前一秒，我返左去現實世界入面，但係佢唔係到。