男神呢個稱號令我食左唔少女(有甜）: 皇帝
我同佢講左一陣野之後，我就行返去班房，宜家已經係上緊第二堂嘅中文堂，我一打開門就好似啲明星咁，成班望哂過黎。
MissLee：「蔡煒燕！！！頭先去左邊黎？！！做咩咁遲先入黎上堂？！！」
我：「我頭先個肚好痛呀，屙到七彩咁，一屙完又想繼續屙，好似屙極都屙唔完咁，我都唔想架。」
MissLee：「又係肚痛，你知唔知呢個藉口我聽左三年啦？你覺得我仲會信你咩？」
「噠！」MissLee由原本好嬲嘅表情變到好溫柔，好似一個媽媽咁樣。
MissLee：「不過如果真係有事嘅話記住一定要睇醫生呀，好啦快啲返埋位坐低聽書啦。」
我一面呆滯咁慢慢行去自己個位到，係到諗緊點解佢可以一下子就變到咁溫柔，直至我見到個嗰女仔係到笑，我相信應該係佢做。
順帶一題我終於知道佢真正嘅名，唔係黑眼女仔，而係好似佛地魔呢啲唔講得出黎嘅名，講左就會觸發禁忌。
佢同我講，只要我唔小心講左佢個名，我就會比人咀咒，所有人都會以為我係佢嘅同黨，然後想殺死我。
梓恩：「你去左邊呀？啱啱集隊果陣都已經唔見你，係咪有啲咩事？」佢捉住我隻手再同我講。
我：「我無事呀，唔洗擔心我，頭先我去左廁所到Hea姐，天氣咁熱我先唔想集隊，放心啦BB。」我咀一咀佢隻手。
但係呢一個舉動，激嬲左一個唔應該激嬲嘅人，佢開啟返黑色五芒星嘅眼，個樣變到好似黑化左嘅殺老師一樣，不過除左我之外無人見到佢。
女仔：「佢係...邊個黎...？你地兩個...有啲咩關係...？點解...點解你會錫佢...？」佢哄埋落我到想一啖食左我個頭。
我：「佢係我女朋友，你唔可以搞佢，你夠膽搞佢嘅話我宜家就由天台到跳落去。」表面上嘅我好同自言自語無分別，但實際上我同佢講緊野。
梓恩：「你同緊我講野？做咩要由天台跳落去呀？你唔可以死架！！！我唔會比你咁做！！！」梓恩好激動咁攬住我。
女仔：「嘖...算數，既然我鍾意左你，我就要接受你嘅一切，同埋...「你死左嘅話，我都會死」」。
無錯，大家都無聽錯，佢同我講，宜家只要我一死，佢就會跟住我一齊死，佢將我地連命連埋左一齊，又或者只要佢一死，我都會死。
我：「咁就乖啦，遲啲我會好好咁補償返比你架，宜家你就忍一忍先啦。」
梓恩：「好啦好啦，你唔準再係我面前講自殺呢啲咁嘅野架！！」佢鬆開我再認真聽書，但其實我係同緊黑眼女仔講野。
女仔：「你講架，咁我宜家去出去睇下風景先啦，你要掛住我呀。」然後我就看到佢飛左出去，我先可以鬆一口氣。
好快就黎到小息，我覺得我一定要搵一個人講哂所有野比佢聽，最好就比到啲意見我，不過其實只係純粹聽我講野都夠。
於是我當然就搵返我最好嘅朋友，亦即係阿彥呢條柒頭皮，我知如果我講左比人聽嘅話，就會跟據規則訂立者所講「若然有任何資訊流出於外界，規則就會比打破，呢間中學嘅秘密就會比人發現」。
但係我諗講比一個人聽應該無乜所謂掛，同埋我相信阿彥唔會講出去，識左佢咁耐我知佢為人係點，係100%嘅On9黎，個腦永遠都係裝住中二病嘅野。
我：「喂阿彥，我有野重要野想同你講，你聽完可能會覺得我癡撚左線，但我講嘅野全部都係事實。」
阿彥：「快啲講啦咁，反正你本身就癡癡地線，我都習慣左架啦，今次又邊條女比你屌到有左BB呀？」
我：「唔撚係呀柒頭，你最好有定心理準備聽呢個說話...你記唔記得我地中二個陣咪聽過一個係呢間中學發生嘅傳說事件嘅。」
阿彥：「我記得，死亡事件呀嘛，我仲記得係一個高中嘅人爆左出黎嘅，不過大家都只係覺得佢無野好做，想整個惡作劇玩鳩我地。」
我：「我想同你講嘅野....就係呢一個傳說...係真嘅...而個嗰女仔...仲係呢間學校到...」
阿彥：「你唔好玩我啦大佬，你係咪睇戲睇上腦呀？呢啲野日劇就話有得做比你睇姐，返黎現實世界啦。」
我：「我無講大話，我朝早無去集隊係因為我上左八樓一間課室，入面有本筆記薄，交代哂成件事嘅背景同埋起因。」
阿彥：「咁...咁到底係發生左咩事...？如果係真嘅話...點解政府無講出黎...？呢間中學點解仲可以存在咁耐...？」佢吞一吞口水再講。
然後我就講哂所有我知嘅野比佢聽，佢收起左平時嘻嘻哈哈個樣，面色變到好沉重。
我：「同埋宜家最重要嘅係...個嗰女仔鍾意左我...佢將我同佢條命連埋一齊...只要我一死，佢就會死，反之亦然。」
阿彥：「咁姐係話...我地消滅佢嘅話....連你都會一齊死...」佢攬住我，唔係Gay嘅表現，而係兄弟之間互相安慰嘅擁抱。
我：「嗯，不過我相信總會有其他方法解決到嘅，我地慢慢黎就會諗到架啦，同埋你放心啦我唔會咁易死。」
阿彥：「我會同你一齊作戰到底架，既然佢宜家咁鍾意你，咁姐係你可以慢慢咁Chok到佢料。」
我：「唔係咁易架，佢雖然係好霖我，但係佢對住我都會出現黑眼模式，想食左我一樣。」
阿彥：「咁都好彩係得你見到架姐，聽你描述到佢咁樣，我驚我一見到佢就會即刻嚇到瀨尿。」
我：「其實呢...佢金白色頭髮，粉紅色眼睛個陣都幾撚靚女，唔係講笑，仲靚過雯雯。」
阿彥：「唉理撚得佢靚唔靚咩，宜家要做嘅話諗點樣先可以對付到佢，係你唔會死嘅情況消滅佢。」
我：「我地暫時只可以抑制佢嘅成長，只要我地不斷咁令到人受傷，佢嘅能力就唔會提升，呢方面我已經搵到繼承人啦。」
阿彥：「叻仔，如果連志霖都唔知要點做嘅話，咁我地仲有咩辦法喎...」就係呢個時候，有一道黑色光由課室個窗到照住我同阿彥。
我地比呢束光照到睇唔到野，成個畫面都係黑色，伸手不見五指咁款，但慢慢...我地就睇返野，不過我地已經唔係課室到。
「噠！」我同阿彥不由自主咁跪左係地下，個頭比人抬起，前面有一個人坐左係張黑色沙發到，周圍一個人都無。
男人：「唷，你地幾好嗎？講聲唔好意思先，咩都無講就帶左你地黎呢到添。」
我唔知阿彥宜家有咩感覺，我就好撚驚，因為...呢個男人隻眼都係黑色...佢個頭戴住金白色皇冠，著住黑色長袍，成個國王一樣。
男人：「呢個地方係我頭先創造出黎嘅空間，所以無乜特別，因為我好快就會走。」
我：「你係邊個...？你帶我地黎呢到嘅目的係咩...？你係咪同個嗰女仔有咩關係...？」
男人：「乜你咁無禮貌嘅？連招呼都唔識打，咁你都係唔好講野啦。」我個嘴突然比人封住左一樣，只可以發出「唔唔」嘅聲。
阿彥就一直驚到唔夠膽講任何野，連眼都唔夠膽打開，個身一直係到震緊。
男人：「我...就係你地所講嘅，黑眼女仔個老豆，亦姐係話...丘以男...就係我個女。」我聽到之後即刻擘大左隻眼。
男人：「其實我只係諗住帶你，蔡煒燕一個人黎架姐，點知唔小心帶埋呢個男仔黎。」佢企左起身，行近阿彥面前。
男人：「既然你聽到知道左咁多唔應該知道嘅野...咁我要點做好呢...？惟有...殺死你啦...從來只有死人先最守到秘密...」
阿彥：「唔好呀！！求下你求下你！！！最多...最多你打爛我個聲帶！！令我以後都講唔到野！！！唔好殺我！！唔好殺我！！！」
男人：「NoNoNo，一切都太遲啦，雖然係我做錯，不過勉為其難都要犧牲一下你嘅。」
阿彥：「唔好呀！！！！！！！」
個嗰男人噠左一下手指，阿彥個頭即刻爆開，鮮血四濺，彈哂落個嗰男人塊面到。
我：「唔！！！唔唔！！！唔！！！！！」我望住個嗰男人，我望住阿彥個頭爆開，我望住阿彥就咁死左...
我一直係到掙扎，但係我點樣都郁唔到，我眼白白就咁望住阿彥比佢殺死左...我咩都做唔到...
我隻眼一直係到流緊眼淚，我唔敢相信頭先發生嘅一切，有無人可以同我講所有野只係一場夢，我一訓醒就可以變返正常。
男人：「要怪就怪佢唔好彩，嘻嘻。」佢拎轉過黎望住我，個笑容極度詭異。
男人：「不過你放心啦，我唔會殺死你嘅，難得我個女咁鍾意你，如果你唔好好照顧佢嘅話，你嘅下場就同佢一樣。」