《夾出一個她》: 第六十四集-求婚（上）
顔太：「使乜咁見外，叫我auntie得啦！同埋袋咗啲錢佢，當係我俾你哋結婚嘅禮金。」
-
我：「你都俾我叫得你做auntie，我梗係要靠自己嘅努力去令到楚翹幸福啦！」
-
顔太：「唉！逼你都冇用，當你需要嘅時候就問我啦！」
-
點解我會拒絕楚翹媽嘅好意？如果我攞咗咪暗示自己唔得囉！
-
究竟楚翹媽點解會接受我呢個完全唔合佢心意嘅人做佢女婿呢？睇嚟呢個問題得楚翹先知喇！
------
見完楚翹媽之後返到屋企，原本今日話有嘢做唔同我哋食晚飯嘅希逸都上咗嚟，我就知道佢應該見到我啱先放學就俾人帶咗上車，驚我有事就上嚟關心下我。所以我幾時都話，希逸永遠都係咁錫我嘅。
-
楚翹：「我阿媽又同你講咗啲咩？冇洗你腦呀嘛？」
-
我：「佢啱先想俾十萬蚊生活費你，想你有個好生活，但我拒絕咗，因為我覺得呢啲錢應該由你去攞會好啲。」
-
楚翹：「不過我都唔會去攞，我覺得而家生活都幾好吖！有時候有錢都唔一定會開心。同埋我一定唔可以向佢哋應低威，要問佢哋攞錢咪好冇面。」
-
我：「所以我就拒絕咗，但係有樣嘢好緊要，就係佢叫咗我做女婿。」
-
楚翹：「無可能嘅，我阿媽點會接受你呢？」
-
我：「我開頭都以為自己聽錯，但原來唔係，可能你屋企人突然茅塞頓開，覺得我可以照顧你呢！現實就係有啲嘢估你唔到，就好似而家咁。」
-
楚翹：「你條茂利又想講啲咩呢？」
-
我：「喺我講嘢之前，等我播首歌先。」
-
［贈你一吻或許容易。唯獨你是那麼特殊。令我鞭策自己，反省幾多次，艱苦也要為你堅持。］
-
將時間回到去拒絕完楚翹媽之後，搭車返屋企嘅時候自己諗起之前同楚翹行街，睇中一隻有粒大鑽石喺面戒指，我記得楚翹嗰陣時放暗示，就話如果第時有男仔求婚，揸住呢隻大鑽石戒指求婚，肯定接受。
-
如是者，我就落咗車，買咗隻鑽石大戒指……隔離嗰隻細戒指返嚟。大佬，哪有錢買價值連城嘅鑽石大戒指呀！
-
［沒有給你甚麼奇遇，還是慶幸有種自然，無論未來日子，翻起幾多風雨，緊握這個愛字，貧富生死也好，亦是極其願意。］
-
再次將時間跳動，回到而家先。
-
我：「之前你話我冇戒指，唔算求婚，咁我而家拎住隻戒指正式向你求婚。」
-
感性嘅我都開始認真，變成單膝跪嘅動作準備求婚，電話嘅音樂亦都好適時咁轉做副歌。
-
［只知道是時候拿著鮮花，將心愛預留在盟誓之下，共你漫遊在天邊，看著低窪。想起我倆在某天白頭，無窮犧牲也不怕。］
-
我：「我雖然唔係好有錢，手上呢隻戒指亦都唔係你之前渴望嘅鑽石大戒指，但我承諾一定會照顧你一生一世，令到你幸福。你願唔願意嫁俾我？」
-
「嫁俾佢，嫁俾佢。」
-
呢兩個「架兩」完全唔知今日我係會著住校服嚟求婚，利申我事前係冇通知佢哋，我相信兩位亦都諗唔到喺一個冇特別活動嘅日子求婚嘅，不過好彩佢哋都識做，冇搞衰件事。
-
楚翹：「嘩！我真係估你唔到，你哋三個夾埋㗎？」
-
阿妹：「我同希逸真係唔知，如果我哋知道就會準備個場地啦！。」
-
我：「我知你等咗呢個moment好耐，原本諗住等大家考完DSE先去求婚，我今日見到你阿媽都接受我哋一齊嘅事實之後，連最大嘅boss都搞掂咗之後，我就知道唔好再耽誤你寶貴嘅青春。」
-
「嫁俾佢，嫁俾佢。」
-
楚翹：「你真係好衰，又嚟整喊我。」
-
楚翹講嘅同時，伸出佢嘅左手，默默點頭，我都將戒指套落佢隻手上，曾經有人話結婚係步入戀愛嘅墳墓，但對我嚟講，結婚係步入幸福嘅大門。
-
我：「喊咪喊囉！又唔係失禮人。」
-
阿妹：「但係你哋搞到我都眼濕濕呀嘛，見住楚翹終於有人要。」
-
楚翹：「咩叫終於有人要，係不溜都有人要，係咪呀老公。」
-
我：「梗係啦老婆大人，得我要你咋嘛。」
-
楚翹：「不過呢，我都未見到隻大戒指，好似唔係好收貨喎。」
-
我：「Sorry，貨物出門，恕不退換。你而家係我㗎喇，冇得返轉頭。」
-
阿妹：「如果第時有人咁樣求婚，我估我自己都會喊到七彩。」
-
希逸：「有人要你條粉腸先算啦！」
-
阿妹：「大把人爭住要我，你唔需要擔心。」
-
我：「喂老婆，話說我哋係時候要落去返工喇喎。」
-
楚翹：「嘩你真係破壞晒咁甜蜜嘅氣氛，好唔掂囉。」
-
我：「冇錢又點有氣氛呢？」
-
楚翹：「係喇係喇，我哋都係拿拿淋走啦，留返啲時間俾啲小情侶。」
-
我：「不過我想問下希逸，你點解會上咗嚟嘅，係唔係見我俾人帶咗上車而上嚟？」
-
希逸：「吓！你俾人帶咗上車關我咩事？」
-
我：「咁你上嚟做咩？你唔係話今日唔得閒嘅咩？」
-
希逸：「咁我掛住我女朋友呀嘛，咪上嚟睇下佢囉！我話唔同你哋食晚飯啫，又唔係唔見佢。」
-
我：「我仲以為你緊張我㖭……」
-
希逸：「咪傻啦！緊張都唔緊張你啦！」
-
阿妹：「阿哥你柒咗喇！呢度冇人關心你吖！」
-
楚翹：「浚彥俾人冷落，咁大件事冇人講嘅。」
-
阿妹：「冇人講咪你講囉！」
-
希逸：「別把自己看得太高啦！」
-
我：「我哋咁多年嘅友誼……俾你一下子摧毀咗嚕。想當年，我哋一條底褲兩個人著，一個車仔麵兩個人食，你竟然……我對你好失望吖！」
-
（待續 To be continued）
IG：chingchingstory