《夾出一個她》: 第六十三集-承諾（下）
楚翹：「你鍾意啦，總之你返咩工，我都會跟住你，我聽日就自己去壽司鋪搵經理見工。」
-
我：「唉！怕咗你，不過喺壽司鋪做嘢真係悶㗎。」
-
楚翹：「我都喺屋企悶咗咁多年，呢啲濕濕碎啦！」
-
我：「咁我問下經理仲要唔要人啦！」
-
楚翹：「我咁靚女，點會唔要我吖？」
-
我：「你咁靚，啲食客淨係望住你而唔食壽司啦！」
-
楚翹：「望靚人，食壽司都食得好味啲㗎嘛。」
-
問咗經理，經理知道係我介紹嘅即刻話冇問題，乜呢啲著名連鎖壽司鋪都咁缺人手嘅咩？
------
楚翹：「經理好！我係楚翹……」
-
我：「澄叔？」
-
企喺經理後面嘅，係一位好熟悉嘅面孔，就係「燒夜店」嘅澄叔。
-
澄叔：「乜你哋兩個好唔想見到我咩？」
-
我：「唔係，突然見到你有啲唐突啫。」
-
澄叔：「我同呢度嘅經理係中學同學嚟，佢見我冇工開咪介紹我嚟呢度囉！」
-
楚翹：「咁大家都係熟人，合作愉快啦！」
-
澄叔：「大家咁話啦！」
-
我：「估唔到喺度都會撞到你。」
-
澄叔：「我一早估到你哋會嚟啦，之前經理同我講話有後生仔會嚟返part time，都估到係你哋。」
-
我：「唔怪得返咗第一日就過試用期啦！」
-
澄叔：「梗係我幫手打友情牌啦，咁之前你哋喺『燒夜店』都真係做到嘢嘅，我都係同經理講事實啫。」
-
楚翹：「真係唔該晒喎，澄叔。」
-
澄叔：「小意思啦！你幫我我幫你嘅啫，反正呢度缺人，我咪幫下口，話呢兩個後生仔做到嘢囉！」
-
我：「真係多謝晒你，第時你開返『燒夜店』一定要預返我哋兩個幫手。」
-
澄叔：「一定會啦！冇你哋幫手，我哋兩公婆自己都搞唔掂啦！唔講住，大家做嘢先。」
-
喺壽司鋪同澄叔一齊返工，感覺有啲難言，明明佢之前係一個老闆，喺自己嘅鋪頭個個都會尊敬佢，而家就要淪落到做返個打工仔，唔通呢啲就係所謂「大丈夫能屈能伸」、定係「馬死落地行」呢？
------
呢個新年假，除咗去露營嗰幾日係俾自己休息之外，其他日子都係朝早返學校考模擬試，晏晝就同楚翹去壽司鋪返工到夜晚，好似之前咁，不過唯一唔同嘅就係而家唔使返通宵，大家都多啲休息時間，同埋包壽司真係好輕鬆，簡直可以用舒服嚟形容。
-
不過，大家都知到「出得嚟行，預咗要還」，唔係差人錢嗰隻還債，而係，楚翹媽嘅還債。
-
新年假期之後第一日正式返全日學，返學嘅同時，亦都代表last day越嚟越近。今日返去就係對返早幾日考嗰啲卷，老師都係一於既往咁同我哋講一啲答題技巧，點樣攞高分之類，雖然係聽咗千千萬萬次，但呢啲語重心長嘅道理，對即將考DSE嘅我哋係好有用。
-
呆下呆下，就到放學時間。當我行出學校門口，有個身穿西裝嘅魁梧大漢攔截我嘅去路，並指住隔離架私家車，喺私家車上面，有個女人揮手叫我上車，而呢個女人，正正就係楚翹媽。
-
我：「你搵我有咩事？楚翹係唔會跟你走㗎喇！你都唔使向我打感情牌。」
-
顔太：「幫我同佢講聲對唔住，係我虧欠咗佢，好對唔住。」
-
我：「同我講都冇意思，你不如直接搵佢啦！」
-
顔太：「我冇面再見佢，自從佢上次咁話我之後，我知道自己唔適合做人阿媽。」
-
我：「每個阿媽都唔係一開始就識做嘅，慢慢學、慢慢摸索就會做到一個好阿媽。」
-
顔太：「點都好，楚翹都應該唔想再見到我㗎喇！」
-
我：「我相信你肯改善，肯俾啲時間同空間楚翹，楚翹都應該會重新接受返你嘅。」
-
顔太：「楚翹呢個硬頸性格，我作為阿媽一定最清楚，肯定唔會再接受我。不過都多謝你，因為你同楚翹之前鬧醒我，我而家先知楚翹以前喺屋企嘅生活係咁唔開心。」
-
我：「唔好客氣，冇咩事我都走先。」
-
顔太：「今日搵得你就梗係有事，呢度有十萬，係俾楚翹嘅生活費嚟。」
-
我：「咁貴重嘅嘢，我唔可以收㗎！」
-
顔太：「我個女住你食你嘅，啲使費唔多唔少都多咗，啲錢俾你哋生活得好啲，同埋……對楚翹好啲，俾返我哋冇俾嘅愛佢。」
-
我：「啲錢我真係唔可以攞，我會靠自己嘅雙手俾楚翹一個最幸福嘅生活佢，呢層你可以放心。」
-
顔太：「你真係唔攞？呢度嘅錢你可以點用都得，我相信你咁大個人都冇掂過咁多錢啦！」
-
我：「就算有定冇，我都唔稀罕呢啲錢，憑自己努力賺取嘅錢先用得開心。」
-
顔太：「咁你當係俾楚翹嘅生活費呢？」
-
我：「你自己用你嘅方法俾佢，我唔會干預你哋兩母女嘅事。」
-
顔太：「咁你都係我嘅未來女婿，冇所謂啦！」
-
我冇聽錯呀嘛，佢話我係未來女婿？如果咁樣都真係水星逆行喎！定係我前世打救咗世界，今世有運行呢？
-
我：「你真係唔係介意我冇學歷、冇錢、冇家庭咩？」
-
顔太：「只要阿女鍾意嘅，我冇所謂啦！」
-
我：「我應承你，我一定會好好照顧楚翹，唔會令你哋失望。」
-
顔太：「我相信你可以好好照顧楚翹嘅。我之前派人跟蹤咗你一陣，我喺到講聲好唔好意思先，因為我驚楚翹跟咗個壞人走，但睇到你返工做嘢嘅態度，都令我好放心。」
-
我：「多謝你咁欣賞我，不過楚翹真係好唔鍾意你派人跟蹤佢，乜都管理住佢，令佢冇晒自由。」
-
顔太：「楚翹嘅事以後交由你呢位老公負責，我做阿媽嘅責任都可以光榮退場，女大女世界。唉！唔阻你咁多，快啲返屋企睇住我嘅楚翹啦！」
-
我：「係嘅，顔太。」
-
（待續 To be continued）
IG：chingchingstory