《夾出一個她》: 第六十二集-承諾（中）
我：「即係咁，『呃蝦條』呢個字唔係應用喺呢個情況嘅，況且我又使乜呃啫。」
-
楚翹：「咪係，你識唔識中文㗎？係對唔係情侶嘅『拍檔』進行『床上活動』先可以話係呃㗎嘛，佢要搞又使乜呃呢？而且我哋好正經㗎，唔會亂嚟。」
-
阿妹：「一定係咁啦！褲鏈開埋都叫正經。」
-
楚翹：「係喇，知你妒忌喇！」
-
阿妹：「我冇妒忌吖！」
-
楚翹：「蕊心，我明白嘅，唔鍾意嘅話就quit咗佢啦！」
-
阿妹：「我唔想睇你哋啲歡樂情節，教壞我呢啲純潔嘅小朋友。」
-
楚翹：「一定係好純潔啦。」
-
阿妹：「我既pure又true㗎。」
-
我：「唔該兩位女士唔好再鬥，我就嚟俾你哋啲口水淹沒喇！」
-
楚翹：「我哋繼續，整濕你先。」
-
我：「我一濕，你都好麻煩喎。」
-
阿妹：「你哋兩個調情就行開一邊啦！」
-
我：「你唔使擔心，以後大把機會俾你見到。」
-
阿妹：「放過我啦！我好慘㗎！」
-
楚翹：「我要日日放閃，閃盲你先。」
-
阿妹：「人性何在？」
-
楚翹：「有異性，冇人性。」
------
［留一輩子給你，承諾認真與你活一世］
-
同兩位大小姐玩完，我就借啲意話約咗希逸食晚飯兼行街，夜晚就唔理佢哋兩個，因為我決定實行一個計劃名為「公主育成計劃」，故名思議，就係要楚翹做一個公主，兌現返對楚翹嘅承諾，咁我呢啲奴才，就梗係返工養公主，當然仲有個跟班阿妹啦！
-
「21314！」
-
係！我去咗著名嘅港式壽司店返part time，因為「燒夜店」關門大吉，失去咗唯一嘅經濟來源，而且我冇理由坐食山崩，用自己儲落啲錢過活，雖然計過都可以勉強頂到一、兩個月，但之後嘅日子又點呢？所以尋晚就唯有上求工網搵工，咁啱就睇到招募壽司技工，仲要唔使任何包壽司經驗，同埋最緊要亦都係喺屋企樓下，簡直完全中晒我嘅要求。
-
尋晚交完份CV後，餐廳經理今日晏晝就已經打俾我做電話面試，唔使一分鐘，就已經請咗我，睇嚟都真係好缺人手。
-
去到餐廳，我仲以為我淨係要負責送餐，但原來係直接落場整壽司。雖然我就冇包壽司嘅經驗，但原來我今日先知，啲飯擺喺部壽司機，啲飯就已經自動搞掂，再加塊魚生就完工，仲要而家唔使行出去送餐，擺啲碟喺條輸送帶，撳個掣就自動出餐，認真方便。
-
老實講，返壽司鋪又真係幾舒服，完全冇體力勞動，比「燒夜店」舒服好多，又唔使對住爐火，環境亦都乾淨勁多，但真係好悶，冇咗同客人、澄叔吹水嘅時間，而家全程就係對住啲飯同魚生。
-
［做人有時就係要同現實低頭㗎啦！鬼叫我窮吖！頂硬上。］
-
唔經唔覺，就已經捱到收工時間，經理見到我「優良」嘅表現已經話試用期過咗，得閒就可以返嚟幫手，當然我都即刻答好，因為再唔返工就冇錢開飯㗎喇！
-
由壽司鋪行返屋企，五分鐘嘅路程都冇，當我打開大門嘅時候，見到三個人坐咗喺梳化迎接我，有兩個大家都知道係楚翹同阿妹啦，而第三個係估你唔到嘅希逸。我呢個時候先醒起，原來我返part time冇通知希逸㗎喎，今劑穿煲了。
-
楚翹：「呃我約希逸食飯！究竟你啱先去咗邊？」
-
希逸心知不妙，佢用口形同我講Sorry bro，但已經挽救唔到件事，正所謂醜婦終須見家翁。
-
楚翹：「唔好口啞啞，你係咪去咗偷食？」
-
呢個時候，我都百辭莫辯，唯有攞出返工嘅證據-啱先經理出糧嘅信封。
-
我：「我……我去咗返工，咁見而家『燒夜店』冇工開咪去返下part time搵下外快囉！我仲攞咗啲壽司返嚟㖭。」
-
唉！楚翹又喊喇！點解女人咁易喊㗎？安慰喊緊嘅女人嘅難度係比打機打final boss更加難。
-
楚翹：「對唔住，啱啱仲咁話你。」
-
楚翹攬住我嚟喊，而我都放低手上嘅壽司，攬返楚翹，然後打眼色，叫希逸雪住啲壽司先。
-
我：「唔緊要，我知你都係擔心我啫。」
-
楚翹：「做咩返工都唔同我講，我哋一齊返呀嘛。」
-
我：「咁你而家係我老婆，就費事要你辛苦啦！」
-
楚翹：「一家人就係有需要時幫手，一齊解決難關，聽日我一齊嚟幫手啦！」
-
我：「唔使啦，我一個人頂得住吖！」
-
楚翹：「我冇你頂唔住呀嘛。」
-
我：「放心，而家唔使返通宵，淨係晏晝同晚市要返去，夜晚就可以陪你喇。」
-
楚翹：「晏晝一齊返去唔好咩？定係嗰度有靚女一齊返工，我喺度你唔方便昅女吖？」
-
我：「那有女，我費事你之後唔敢再食壽司啦！」
-
楚翹：「乜好污糟嘅咩？」
-
我：「好乾淨，超級乾淨，但你日日對住啲壽司都會厭啦！」
-
楚翹：「咁你日日都對住我啦，又唔見你厭？」
-
我：「你又點同壽司比呢，兩樣嘢嚟㗎嘛，唔通我話你一嚿飯咩！」
-
楚翹：「妖！你去食屎啦！」
-
我：「咁咪係囉！點比較啫。」
-
楚翹：「聽日一齊返工啦，多一個人，多一份收入，大家咪可以食得好啲囉！」
-
我：「都係費事你辛苦，做返個大小姐呀嘛。一份糧，如果慳啲都夠食嘅。」
-
楚翹：「不過你嘅大小姐好大食，所以我同你一齊返工。」
-
我：「錢嘅方面真係唔使擔心，唔夠錢我可以搵多幾份工做，你可以放心，一定唔會餓親你。」
-
（待續 To be continued）
IG：chingchingstory