《夾出一個她》: 第五十九集-過去（上）
楚翹：「死仔吖！無啦啦做咩抽我水。」
-
我：「條麵有啲污糟，幫你啜啖啫。」
-
楚翹：「夜媽媽玩埋啲咁嘅嘢，因住瞓唔著吖！」
-
［呢個阿媽feel，又好似關心你，又少少mean嗰樣真係正到冇人有。］
-
楚翹：「做咩你又係咁望住我呢？食麵啦！」
-
我：「冇，你靚咪望多你兩眼囉！驚之後冇得再望你呀嘛。」
-
楚翹：「放心啦，以後大把機會俾你望吖！慢慢望，望足一世，不過你唔好睇厭我個樣喎！」
-
我：「點會厭呢？望一世都唔會厭啦！」
-
楚翹：「第時老咗，我個樣可能冇咁靚，但你都唔可以拋棄我，要照顧我一生一世㗎。」
-
我：「無論點都好，我都會喺你身邊，不離不棄。」
-
楚翹：「你勾手指尾應承我先。」
-
我：「好好冇問題。我請在座各位見證，我-歐陽浚彥，願意與妳-顏楚翹為我合法妻子，我願對你承諾，從今日開始，無論順境定係逆境，富有或者貧窮，健康抑或疾病，我將永遠愛你，珍惜妳直到天荒地老。我承諾我將對妳永遠忠誠。」
-
我發現，原來對住鍾意嘅人講結婚誓言係會好想喊，但我知道如果我一喊，一定會傳染埋俾隔離眼淺嘅楚翹，所以都係啲趁啲眼淚就嚟流出嚟之前迅速收返入隻眼入面。
-
雖然自己好僥倖咁忍住唔喊，但楚翹已經「覆水難收」，任由啲眼淚飆出嚟，搞到我都忍唔住流出第一滴淚水。
-
楚翹：「我有話俾你做我老公咩？戒指都冇隻就學人求婚。」
-
我：「等我儲下錢先，戒指暫時就冇喇！雞子頂住先得唔得。」
-
楚翹：「得你條命啦衰鬼，突然講埋啲咁感動嘅嘢，原本我好靚㗎，而家又水腫喇！」
-
我：「腫腫哋咪幾可愛。」
-
楚翹：「不知幾樣衰，可能第時嘅老公見到咁嘅樣就唔要我喇！」
-
我：「冇可能，邊個老公咁睇樣吖！呢個老婆性格咁好都唔要，我幫你教訓佢啦！」
-
楚翹：「叫佢預備埋結婚戒指先好去求婚吖，求婚都冇隻戒指，點叫求婚。」
-
我：「到正式嘅時候會有㗎喇！」
-
楚翹：「邊有老婆咁好，俾你求兩次婚，你執到寶啦！」
-
我：「我成日都咁講，識到你係我三生有幸啦！」
-
楚翹：「吹水啦你。」
-
我：「我好認真㗎，無論點都好，我都會喺你身邊照顧住你。」
-
楚翹：「覆水難收，講咗出口就收唔返㗎喇！」
-
我：「我幸不得而家就照顧你啦！」
-
楚翹：「吹，繼續吹，吹大啲。」
-
我：「我一吹就濕㗎喇！」
-
楚翹：「核核突突，又講埋啲鹹濕嘢。」
-
我：「唔對住你鹹濕，咁對邊個鹹濕呢？」
-
楚翹：「你嘅希逸囉，你哋自己玩菊花啦！」
-
我：「菊花邊度好玩呢？我唔好呢味㗎。」
-
楚翹：「我覺得你同希逸一齊，你都幾享受吖！」
-
我：「享受你條命，我唔係gay嘅，我哋呢啲係叫兄弟情，bromance，不過睇嚟你都唔識㗎喇！」
-
楚翹：「喺我眼中咪都係gay。」
-
我：「都話唔係gay囉，係gay就唔會要你啦。」
-
楚翹：「講係咁講啫，你心裏面一定有希逸嘅。」
-
我：「冇希逸吖！我心入面都係得你一個咋。」
-
楚翹：「咁我未出現之前，你心入面又有邊個呢？」
-
去到呢度，我要同大家澄清返先，雖然我之前係A0，但曾經都追個女仔，不過最後都係失敗收場。至於追過幾多個，我就唔講啦，話晒每個人都有自己嘅過去嘅。
-
我：「同自己老婆講其他女仔會唔會冇咁好呢？」
-
楚翹：「喂喂喂，邊個俾你叫我老婆，我係你女朋友咋。」
-
我：「叫定先啦，之後都係咁叫啦！」
-
楚翹：「咁睇下你肯唔肯講你之前追嗰啲女仔係點喇！」
-
我：「嘩！你而家威脅我呀？」
-
楚翹：「擺明啦！唔使講。」
-
我：「咁不如一人講一個秘密，公平啲。」
-
楚翹：「好！一於咁話。」
-
我：「咁我開門見山咁問㗎喇！」
-
楚翹：「你問咩都得，我冇底線。」
-
我：「我想知道，你以前嘅生活究竟係點嘅？」
-
唔知係咪我嘅錯覺，楚翹好似閃咗一下眼神，好似有口難言咁，既然佢唔想講，就無謂逼佢。
-
我：「唔想講唔緊要㗎，我轉第二題吖！」
-
楚翹：「邊個話唔想講，不過你講咗你啲前度先啦。」
-
我：「我都未追到，又點算係前度呢？」
-
楚翹：「咁你就講咗你啲女女先。」
-
我：「佢哋亦都唔係我嘅女女。」
-
楚翹：「是但啦，都係咁叫啫。」
-
我：「咁嚟喇喎。」
------
小四嗰次相信大家大概都知咩事，不過之前嘅章節都係簡述，而家就喺度詳細啲講，還大家一個交代啦！至於初中戴綠帽嗰次亦都係我人生中嘅經典嚟，俾人笑足咁多年。
-
小四時候，我對愛情係一竅不通，但當時嘅我暗戀咗隔離位嘅女仔，因為我覺得佢好靚，佢當時仲係班上公認嘅班花嚟。好幸運，我有幸同佢一齊坐，我仲記得佢有次上堂突然攞咗張廢紙，寫咗啲字俾我，話想同我傾計，了解我嘅興趣。之後大家開始上堂傳紙仔，互相寫嘢俾對方。透過傳紙仔，我就知道佢好多秘密。
-
一個女仔咁肯同你講秘密，就肯定鍾意你！所以無知嘅我就覺得，佢係鍾意我嘅。被戀愛衝昏咗頭腦之後，我決定約佢表白。
-
就如之前提及嘅一樣，原來佢係對我冇感覺，純粹當我係上堂嘅玩伴，自此之後，我少咗一個上堂肯同我傾計，會互相傳紙仔嘅好朋友。
-
人生第一次表白都已經失敗到一個點，直情想搵窿捐，初中嗰次……死得仲癲，真係唔跳落馬利亞納海溝深潛都唔得。
-
（待續 To be continued）
IG：chingchingstory