《夾出一個她》: 第五十八集-惡夢（下）
楚翹：「你走啦，我唔想見到你吖！」
-
顔太：「你點可以咁對你阿媽講嘢㗎，我話晒都係你親生阿媽嚟㗎。」
-
楚翹：「親生又點，唔親生又點？你根本都冇鍾意過我，你淨係諗住生我係為咗可以分daddy啲身家咋嘛。」
-
顔太：「咁究竟你想點啫，我都俾你自己玩咗幾個月啦！」
-
楚翹：「我唔係玩，我係好認真嘅。」
-
顔太：「你喺呢度都感受唔到愛啦！」
-
楚翹：「呢度先俾到我最多愛。」
-
顔太：「就憑呢班窮鬼？」
-
楚翹：「係！佢哋雖然係冇我哋咁有錢，但呢度俾到我好多温暖，佢哋會同我夜晚一齊傾計，一齊食飯，一齊做好多好多嘢，而且佢哋仲會尊重我嘅意見，同埋我真係好感激佢哋喺我最徬徨嘅時候收留我，我都唔知點報答佢哋好。」
-
顔太：「咁我之前真係忙住公司啲嘢，冇時間同你食飯、了解下你嘅心事呀嘛，之後會多返啲時間㗎喇，同埋我係你媽咪，佢哋係外人，我一定俾佢哋更清楚你嘅心事啦！」
-
楚翹：「你講大話，你根本就唔想了解我嘅心事，由細到大，我有事想同你講，你都同我講唔得閒，下次先傾。十八年嚟，一次都冇認真聽過我講嘢，甚至我哋傾計每年加埋十句都冇，所以你唔使再喺浚彥同蕊心面前講你會對我點好。」
-
阿妹：「係囉！人哋唔鍾意就唔好逼人啦！自己又唔知自己做得差。」
-
顔太：「𡃁妹關你Q事。」
-
阿妹：「佢係我嘅朋友，我嘅朋友有事即係我有事，我唔會唔理我朋友嘅。」
-
楚翹：「你見到啦！佢哋唔講錢，都肯講義氣，自從我識到佢哋之後先知道，有時錢唔係大晒㗎。」
-
顔太：「你估佢哋識你唔係為咗你啲錢，唔好玩啦，有咩人係唔鍾意錢先得㗎？」
-
我：「冇錯，有錢係大晒，但係你哋買唔買到親情同愛情，人哋都咁唔鍾意跟你走，你仲逼咩人啫。」
-
楚翹：「你呢啲獨裁者點會有人真心服從你吖！咪都係錢行先。」
-
顔太：「你竟然同我呢個親生阿媽咁樣講嘢，我大大話話都照顧咗你都差唔多18年，我咁辛苦養大你，你多謝都唔講，而家走嚟奚落我！你咁講嘢呀嘛！得，我當我冇生過呢個女。」
-
楚翹：「你走啦，我都唔再認你係我阿媽。」
-
［楚翹一次大攤牌，令我完全相信佢係極知討厭佢屋企人。］
-
顔太：「你係要走到呢步，咁你最好唔好後悔，以後連顏家門口半步都唔俾入，你銀行啲零用錢由而家開始即時凍結。我睇下你冇錢仲可唔可以咁招積。」
-
楚翹：「就算我要捱窮，每日都冇好餸食都唔緊要，最緊要係同鍾意嘅人一齊。」
-
顔太：「俾多次機會你，你好拿拿淋執晒啲嘢跟我走，如果唔係，你真係再唔係我個女。」
-
「3……2……1」
-
顔太：「你而家做嘅行為你以後都唔好後悔，你要怪嘅就係怪當初你要跟個窮鬼而唔跟我。」
-
楚翹：「係走就快啦！好行夾唔送。」
-
從背影睇到楚翹媽應該係喊住走，話晒作為一個母親，睇住親生女咁樣奚落自己，自然會傷心。雖然我未試過做人阿媽，但我都完全明白咁樣係好唔尊重，不過或許喺獨裁生活嘅楚翹卻係一個如釋重負嘅機會，一次過釋放對楚翹媽嘅怨恨。
-
［這個世界，沒有無緣無故的恨，亦都沒有無緣無故的愛。］
-
楚翹媽走咗之後，屋企頓時失去熱鬧的氣氛，大家都沉默咁坐喺梳化撳自己嘅電話，一言不發。最後大家都返到各自嘅房休息，楚翹冇去我間房瞓，亦都冇去阿妹間房。而我都冇去搵楚翹傾計，大家都知道要俾個空間楚翹冷靜下先。
-
由於啱先嘅情節實在意想唔到咁激動，原本疲累不堪嘅我，而家攤喺張床上面恰埋隻眼都瞓唔到，所以打開書枱上嘅電腦，打陣機先瞓。
-
［唔知大家係咪都透過打機去減壓呢？我就係喇！］
-
唔經唔覺，電腦嘅應用程式提示彈出，原來都有三個月冇打開電腦，最後一次打機嘅日期正正就係楚翹嚟之前嗰一晚。
-
打開遊戲畫面，感覺好熟悉，亦都好陌生，呢隻game曾經係陪我解決無數壓力嘅戰友，現家我卻懶理不理，就好似被打入冷宮一樣。
-
今晚，我左手放喺鍵盤上隨時準備出擊，右手放喺滑鼠上敏捷咁移動，重拾之前打機打通宵的熱血。
-
正所謂快樂不知時日過，打打下都已經打到凌晨三點，但我毫無睡意，仲係好精神，打到聽朝都完全冇問題，正當我中場休息嘅時候，突然房門俾人輕輕一敲。房門徐徐開啟，我開頭仲以為係阿妹間房有昆蟲要搵我求救，原來係眼腫嘅楚翹。
-
楚翹：「咁夜都唔瞓嘅？」
-
我：「我瞓唔著。」
-
楚翹：「係咪因為我？」
-
我：「少少啦！反正又瞓唔著，就打下機囉。」
-
楚翹：「其實我有啲嘢想同你講。」
-
我：「你講啦！我內心好強大㗎。」
-
楚翹：「其實我……好肚餓。」
-
楚翹講完之後，個肚都好識做咁「咕嚕」咗一下，跟住佢用一個好可憐嘅眼神望住我。望住佢咁可憐嘅眼神，我都唔忍心叫佢餓到第二朝，所以我就熄電腦，出去為佢煮宵夜。
-
［利申：楚翹呢個楚楚可憐個樣真係好可愛！］
-
熱辣辣嘅公仔麵話咁快就喺飯廳呈現喺楚翹面前，楚翹大大啖咁吞噬個麵。明明佢都係有錢人家，但而家食嘢嘅儀態完全盡失，真係好矛盾。不過我知道，因為佢放心喺度住先咁做啫，其實係人都要食飯，甚至靚女都要屙屎啦，使乜咁著緊啲禮儀啫。不過佢咁樣食嘢真係好得意！
-
楚翹：「我塊面污糟咗咩？做咩係咁望住我。」
-
呆呆哋嘅佢叼住條麵，然後我沿住條條揈嘅麵一路啜上去，條麵嘅終點就梗係佢個嘴啦！
-
（待續 To be continued）
IG：chingchingstory