《夾出一個她》: 第六十集-過去（下）
［Last Christmas我一蚊都冇，上Facebook搵我，追緊個女仔傾訴。］
-
升到中學，班上有個女仔好靚，完全吸引到我。話說當時正值聖誕，就約佢睇戲，順便聖誕節兩個行下街，增進下感情再表白啦！話晒聖誕節一個人過咁孤單，而身邊個個都有另一半，單身嘅佢梗係會應承啦！
-
［點知佢話no no no；我約咗個靚仔睇戲。］
-
我問佢睇邊套？係咪蒼井空嗰套？佢話佢不知道，只知道不需找數，我心諗，冇咁橋啩！
-
［請我嗰個係你老友阿Joe。］
-
啊啊啊！
-------
大家唔好認真，其實我講笑啫，現實世界冇阿Joe問我借錢約女睇戲，亦都冇攞埋我啲錢去婚禮，當然佢哋嘅小朋友都冇搵我呃雪糕食。
-
睇緊嘅你或許唔知我講緊啲咩？而家去Youtube睇ToNick嘅《Last Christmas》同《This Christmas》咁你就會明白㗎喇！呢兩首歌係香港聖誕歌嘅經典嚟㗎！當然仲有陳奕迅嘅《Lonely Christmas》啦！
-
入返正題先。嗱！今次認真嘅，件事係咁嘅。
------
升到中學，踏入人生另一個學習階段。同時隨住青春期嘅發育，心理上亦會漸漸對異性產生興趣。
-
班上有個女仔就好似黑暗中嘅明燈一樣，十分耀目，去到邊都有人跟住，因為又靚又好人，真係好搶眼，行過都好似有spot light射住咁。連唔敢再溝女嘅我都開始有啲心動。
-
完全唔識溝女嘅我開始主動出擊，不過話明唔識溝女，啲招式梗係唔掂啦！點唔掂法，睇埋落去就會明白㗎喇。唉！講起都覺得幼稚。
-
是咁的，當時正值中二，同呢個女仔同班咗一年多啲，可能日久生情嘅關係就鍾意咗佢。我仲記得，佢住喺觀塘嗰邊，而大家都知我住喺西灣河太安樓㗎啦。當佢一個人返屋企嘅時候，我都會作個解釋話要去觀塘，順便同佢一齊搭地鐵返屋企。我哋每日搭地鐵都有講有笑，呢段時間就係我哋兩個唯一獨處嘅時間，因為佢平時喺學校實在太搶眼，我根本連同佢私底下傾計都難。但大家要知道，我同佢係同班嘅，你可想而知佢係有幾咁出名。
-
除咗每日一齊返屋企之外，我哋每晚都會WhatsApp對方，就好似一對小情侶咁甜蜜，所以我決定去表白。
-
結果大家都知啦！咪又係失敗收場囉！佢話嫌我太肥，同埋而家太細，所以唔太適合拍拖而拒絕咗我。幾日後，佢開始拍拖喎。自此我就俾人話戴綠帽，但實質上，我都冇同佢拍拖，又點算戴綠帽呢？最多都係做兵仔啫。
-
經過呢件事之後，我就好努力咁去減肥。我係成功……減肥，而女女，都係冇嘅。
-
好多人講過，表白係一場賭博，成功會有女朋友，失敗係少一個朋友。但我哋兩個就正正相反，我哋係表完白後更加熟落，而家去到中六都仲係好friend㖭。你話係咪好奇妙呢？不過係冇女嘅奇妙囉！
------
楚翹：「你冇次溝女係成功嘅，冇鬼用。」
-
我：「唔緊要啦，而家都成功咗啦！」
-
楚翹：「好似係我主動溝你先㗎喎。」
-
我：「都係咁啫，我而家有女就得。」
-
楚翹：「咁幾時由女變老婆先。」
-
我：「咁你講埋你屋企啲事先啦！」
-
楚翹：「你真係咁想知？」
-
我：「接受一個人，首先係接受佢嘅過去。」
-
楚翹：「咁你洗耳恭聽喇！」
------
有錢人嘅生活大家係咪好嚮往呢？係吖！呢種生活望落就好寫意，但實質係「啞巴食黃連，有苦自己知」。
-
物質生活固之然開心，但換取嘅代價就係捨棄一生嘅自由。
-
總之除咗返學或者同屋企人一齊之外，踏出顏家門口半步都要同屋企人或者管家申請。申請步驟仲難過申請排隊抽公屋。首先要交低同邊個去，去邊度同做啲咩。而且出到街之後，佢哋又會派保鏢暗中監視我，就算撇開保鏢，我身上仲有追蹤程式，所以去到天涯海角都會搵到我。
-
當你好好彩，出到街，你都要小心言行舉止，首先唔可以喺企喺街食嘢，跟住又唔可以講粗口啦，仲要唔可以拍拖喎。因為我喺街嘅一舉一動都俾人監視緊。試過有一次喺街篤魚蛋，然後俾原定返屋企嘅時間遲咗少少，都俾屋企人罰一個月唔俾出街。
-
所以有錢人嘅生活唔好受㗎！封閉式嘅生活肯定悶，喺屋企嘅情況更加悶，想傾計都冇人可以同你傾。應該係話，都唔知點傾好。
-
我作為獨生女，冇得同兄弟姊妹傾計。有時有心事想同父母傾，佢哋永遠都話唔得閒，下次先。有年我認真數過，我哋一年除咗因為家事而要傾嘅句子之外，其他閒談係十句都冇。我喺屋企，唯一同我傾計就係我嘅保母，佢嘅出現就係為咗陪我傾心事，所以我好鍾意我保母。
-
就算幾鍾意保母都好，但佢始終都唔係我嘅屋企人，都係有層隔膜。每年嘅生日願望都係想有個真正嘅屋企人可以同我傾心事，知道我諗緊啲咩，咁多年嚟，一次都冇吖！乜身為屋企人唔係要喺有需要嘅時候幫手咩？
-
問心，住喺豪宅真係好幸福，出入入專車接送，衣食無憂。唯獨係「愛」得唔到，我都係想同自己嘅父母分享下自己返學遇到嘅趣事，自己嘅心事都唔得。一次啫，俾下我得唔得吖？
------
楚翹一路分享自己嘅故事，情緒亦都慢慢跌入谷底。我知道，我咁樣揭人哋嘅瘡疤係唔好，但我真係好想令佢放低以前屋企人對佢做過嘅衰嘢，一次過放低一路而嚟嘅包袱-一個令佢感受唔到「愛」嘅缺陷。
-
聽完楚翹嘅自白，我決定：「守護楚翹，俾佢最幸福嘅愛。」
-
（待續 To be continued）
IG：chingchingstory