《夾出一個她》: 第五十七集-惡夢（上）
露營嘅第二朝，大家都瞓到下午茶時間，所以我哋決定，夜啲直接煮埋晚餐。係吖！我哋呢個camp就係咁hea㗎喇。唔知可唔可以叫campcation呢？
-
一個禮拜嘅露營眨下眼就完結，其實七日嘅節目嚟嚟去去都係坐喺出面睇書、撳下電話、播住歌hea下又一日，所以就唔太盡錄，費事悶親大家。
-
話晒去camp嘅環節都睇到悶，不如同大家分享下一個希臘神話故事啦：
-
喺希臘神話故事裏面，有個人叫西西弗斯。西西弗斯因為犯咗錯，結果被判要將大石推上陡峭嘅高山，每當佢用盡全力，大石就嚟要上到頂嘅時候，石頭就會喺佢嘅手中滑脫，又要重新推返上山，佢每日都要做呢種無止境嘅勞動。
-
人生，本來就係好似希臘神話裏面嘅西西弗斯受到嘅懲罰咁，重複而乏味，但係偏偏冇人可以逃避咁樣嘅命運。
-
［年青人，生活好苦，但你要甜。］
-
點知輕鬆過後，原來係惡夢嘅開始。
------
阿妹：「啊！好攰吖！」
-
我：「有幾攰，今次純粹去hea咋喎。」
-
阿妹：「都好似唔夠瞓咁。」
-
楚翹：「講開又講，我都有少少攰。」
-
我：「不如我哋洗完衫就早啲休息，聽朝起身再食。」
-
阿妹：「就咁話，真係好眼瞓。」
-
去完camp，兩位美人就好似做完苦力，成個人虛脫晒，不過我要澄清返先，我哋喺營地無做曳曳事㗎，我哋乖寶寶嚟㗎嘛！
-
正當我哋坐喺梳化睇緊每年新年都播嗰啲笑到碌地嘅賀歲片等晾衫嘅時候，突然有人撳鐘。
-
阿妹：「我去開吖！可能係希逸嚟。」
-
攰到冇電嘅阿妹即刻彈咗起身，突然有晒力。
-
阿妹：「太太，請問你係咪撳錯門鐘？」
-
門出面嘅，唔係阿妹期待嘅希逸，係一個高貴嘅闊太，身邊仲有個大隻嘅保鏢跟班。雖然我一睇樣已經知道呢個闊太係邊個，但我完全唔想呢刻來臨，亦都唔想佢會喺呢度出現。佢就係香港首富個老婆-顔楚翹個老母。
-
［今翅仆街了！］睇嚟我都要整返張高登神獸卡坐鎮先。
-
顏太：「相信我嚟呢度大家都知咩事，我係嚟接走楚翹嘅。」
-
楚翹個樣突然崩潰咗，匿埋喺我後面喊，就好似辛苦過後徒勞無功咁。但我知道，我而家首要任務，亦都係唯一一個任務，就係直接打終極大佬：趕走楚翹媽，守護楚翹。
-
我：「你想接佢走，有冇問過佢想唔想？」
-
顏太：「我唔係問你哋啲窮鬼想唔想，我係叫佢跟我走。」
-
我：「總之我係唔會俾楚翹離開我屋企門口半步嘅。」
-
顏太：「就憑你，你知唔知你係邊個吖？你叫歐陽浚彥，喺小西灣嶺怡中學讀呀嘛。」
-
我：「點解你會知㗎？」
-
顏太：「要起你哋底有幾難啫，你哋平時喺樓下嗰間爛鬼『燒夜店』返工。就係因為你，搞到我個女都要掂埋啲污糟嘢。」
-
楚翹：「仆街，你搵私家偵探跟蹤我哋？」
-
顏太：「係又點，唔係又點？我都係為你好咋，你跟我返屋企就唔使再受呢啲苦啦！」
-
楚翹：「乜你覺得呢啲係苦嚟咩？」
-
顏太：「我哋開聲叫人做咪得囉！上等人係唔做下欄嘢㗎。」
-
楚翹：「點解你要分上等人同下等人？」
-
顏太：「好簡單，因為佢哋窮。你諗下，你以前要咩有咩；喺呢度，買貴少少都要計住驚冇錢。」
-
楚翹：「有啲嘢係有錢都解決唔到嘅。」
-
顏太：「我唔信，我唔相信呢個世界係有錢解決唔到嘅，總之你而家就跟我返屋企。」
-
楚翹媽突然衝入嚟，捉走攬住我嘅楚翹，楚翹一下鬆開咗楚翹媽，更加攬實我。
-
顏太：「好喇喎，我嘅容忍有限度。」
-
楚翹：「我係唔走㗎喇，打死都唔走㗎喇！」
-
顏太：「住喺呢度有咩好，你要男朋友，我可以搵大把俾你，有錢嘅有，靚仔嘅都有。」
-
楚翹：「唔係有錢冇錢、靚仔唔靚仔嘅問題，而係『愛』吖！」
-
顏太：「我有咩愛係俾唔到你？你要最好嘅，我都俾晒你啦！」
-
楚翹：「原來你呢啲叫愛，你呢啲叫獨裁。又要喺我身體插入追蹤程式，又派人全天候監視我，我連食咩、同邊個食、甚至去邊度食你都要管住晒。」
-
顏太：「我都係為你好，想你之後接管daddy啲事務可以禮貌啲。食嘢有禮貌啲，先可以討好啲uncle。」
-
楚翹：「咁你有冇諗過我想唔想管理呢啲濕鳩嘢？」
-
我識咗楚翹咁耐，都未見個佢係驚到嬲嘅樣，睇嚟佢真係好憎佢屋企，同埋佢嘅屋企人。
-
楚翹：「我由細到大，放學又唔可以同同學去玩，連參加課外活動都唔得，要我即刻放學去補習，補完又要參加啲乜嘢垃圾禮儀班。」
-
顏太：「去玩影響學業，我都係為你成績著想啫。」
-
楚翹：「我讀小學係一個朋友都冇，就係因為你，成日洗我腦，話啲同學質素差，同佢哋玩會影響我。甚至咁多年嘅家長日都係派人扮家長，其實根本就係唔想影響顏家嘅聲譽。」
-
顏太：「阿女，顏家嘅名聲好重要㗎，反正家長日都係每年一次啫，我都有其他日子對住你同陪你啦！」
-
楚翹媽講到自己對楚翹幾好，好似對佢係寶貝咁，但我知道，呢啲全部都係謊言嚟，全部都係客套說話，冇句真嘅。
-
［如果呢刻我仲唔保護楚翹，我仲算得係男人咩？］
-
我：「其實你想接佢走，咁你有冇問過佢，亦都有冇問過呢度嘅一家之主吖？」
-
顔太：「我接我個女走，唔關你呢啲窮撚事。」
-
我：「我而家就話俾你聽，總之入得嚟呢間屋，所有嘢就係我話事，人哋唔想跟你走吖！」
-
（待續 To be continued）
IG：chingchingstory