《夾出一個她》: 第五十六集-惡夢前夕
我：「我啲廣東話咁標準，點會講錯。」
-
阿妹：「一個人聽錯就係嗰個人嘅問題，但而家兩個都聽到有問題，咁係咪講嗰個有問題先。」
-
楚翹：「有時講咗心底話出嚟，我唔介意嘅。」
-
我：「係錫吖！」
-
阿妹：「錫完之後食，明㗎喇！講完我都打晒冷震㖭。」
-
我：「真係唔夠你哋兩個女仔嗌。」
-
楚翹：「我哋講事實，你講歪理，梗係唔夠嗌啦！」
-
我：「咁今晚就食你囉！驚你吖。」
-
楚翹：「咦！鹹鹹濕濕。」
-
我：「喂！你哋話你哋講事實呀嘛，咁我咪聽你哋講囉！」
-
楚翹：「講咗要算數㗎！」
-
我：「咁我就唔客氣了！」
-
阿妹：「今晚都係自己行下海邊散散心先，我唔想睇到呢啲畫面。」
-
楚翹：「等我哋事後轉述俾你聽先。」
-
我：「黐線，你估而家踢足球吖？」
-
阿妹：「唔好意思，我要退出呢個群組，因為我覺得呢個群組好不健康。」
-
我：「好核突吖！唔該俾返啲矜持啦！」
-
楚翹：「矜持，矜持咩嚟㗎？食得㗎？」
-
我：「喂大佬，呢度係街嚟㗎。」
-
楚翹：「你嘅意思係咪即係叫我返屋企先講。」
-
阿妹：「喺屋企叫得幾大聲都無所謂啦，不過記得提我去迴避先喎。」
-
我：「我真係頂你哋兩個唔順，講嘢少少鹹濕都冇所謂，因為我講嘢都少少鹹濕吖！但你哋兩個，真係超級鹹濕。」
-
阿妹：「我都唔想，鬼叫我跟得你多。」
-
楚翹：「冇辦法，鬼叫你夾走我。」
-
我：「鬼叫你哋賴我？」
-
阿妹：「你講乜嘢吖？」
-
楚翹：「冇人明你講咩喎。」
-
我：「我嘅意思係：鬼，叫你哋賴我。」
-
楚翹：「真係唔明喎。」
-
我：「即係隻鬼係咪叫你哋去賴我。」
-
阿妹：「一早講得清楚啲咪好，係要懶搞笑嘅。」
-
我：「係你哋啲中文造詣太差，聽唔明。」
-
楚翹：「究竟我哋同彥B係咪有道鴻溝喺中間，唔係點會聽唔明佢講嘅嘢嘅。」
-
阿妹：「我都覺得有，冇理由聽唔明㗎嘛。」
-
我：「你哋蠢呀嘛。」
-
楚翹：「呀！你真係夠膽死㗎喎。」
-
我：「振夫綱萬歲。」
-
阿妹：「調校你男友啦！」
-
楚翹：「今晚慢慢調，調足一晚都冇問題。」
-
我：「調我！我唔易俾人調㗎喎。」
-
楚翹：「攞定條皮帶先。」
-
我：「今舖大檸樂！」
-
阿妹：「洗定八月十五啦你。」
-
楚翹：「早知今日，何必當初呢！」
-
阿妹：「要唔要人幫手接力，我可以幫手㗎。」
-
楚翹：「唔通你都有仇要報？」
-
阿妹：「大把仇要報啦，人又樣衰，條眉又唔對稱，食飯又唔俾錢。」
-
我：「又關我事！呢個係小薯茄嘅情人富嚟㗎喎。」
-
阿妹：「佢同你簡直係一模一樣……」
-
楚翹：「我知我知，得佢一個一隊，其他人都唔幫佢嘅。」
-
阿妹：「啱吖！」
-
我：「唔緊要，我吹雞叫希逸、孟治雞、魚蛋同歪仁過嚟吖喇！」
-
楚翹：「我哋都有一班姊妹過嚟幫拖，唔驚你哋。」
-
阿妹：「你唔好唔記得，佢哋啲女朋友都係我哋啲姊妹嚟，究竟你班兄弟聽我哋啲女朋友講，定係聽你條茂利講呢？」
-
我：「算算算，當我唔著。」
-
楚翹：「一早認衰仔就無事啦！」
-
我：「係嘅老闆。」
-
俾班女恰完之後，當然繼續做返煮飯佬嘅角色。唔知係咪成日照顧人，搞到自己好似有啲奴性，好鬼死鍾意服務人。
-
［唔通呢個就係做人男朋友、做人阿哥嘅責任？］
-
食完牛扒之後就梗係進行夜間活動。我知你班鹹濕仔諗緊啲咩，唔係喺營入面嘅，亦都唔係野外露出。
-
［喂大佬，而家先開始夜晚咋，咁多人未瞓，梗係玩到夜啲先做啦！哈哈！］
-
不過，夜晚活動都係要繼續進行嘅，就係黑夜遠足喇，我哋個個都唔開電筒，兜西貢灣仔一個圈，雖然條路沿途冇乜路燈，不過熄晒啲電筒仲可以睇星㖭，好靚㗎。
-
楚翹：「係呢，夜晚黑媽媽其實點睇路？」
-
我：「其實好簡單，記住『黑泥白石光水氹』就得㗎喇！」
-
阿妹：「咁牛屎呢？」
-
我：「仲簡單，踩落去先知。」
-
楚翹：「玩嘢吖？」
-
我：「其實真係睇唔到牛屎㗎，真係踩中先知。」
-
阿妹：「頂咩，咁開電筒咪知囉。」
-
我：「你開咗電筒就冇咗黑夜遠足嘅樂趣㗎喇！」
-
阿妹：「踩中屎就真係冇樂趣。」
-
我：「行咗夜行咁多次，都未試過踩屎，放心。」
-
楚翹：「有屎入你數，你幫我哋洗返對鞋佢吖！」
-
我：「冇問題，一於咁話。」
-
最後結果到底有冇踩屎呢？梗係冇啦！兜完個圈，返到營區梳洗，之後我就喺背囊攞出「真心話大冒險」必備嘅嘢-啤酒。
-
去camp必玩嘅「真心話大冒險」，我哋梗係都有玩啦，至於我哋講咗啲咩，梗係唔話俾你知啦。啲真心話咁激，費事嚇親你哋啦。不過我可以同大家講，唔係之前聖誕因為要溝楚翹所講嗰啲鍾意你嘅「真心話」，而係真真實實，大家失戀嘅故事。
-
呢個「真心話大冒險」喺充滿大家嘅淚水完結，之後就返入去營入面瞓覺，迎接第二朝嘅來臨……
-
（待續 To be continued）
IG：chingchingstory