《夾出一個她》: 第五十五集-新年露營（下）
我：「唔會，我哋有帶簾做屏風嘅。」
-
楚翹：「咁聽落好正喎。」
-
我：「係好正㗎，嗰度乜都冇，所有嘢都要自己預備㗎，有時執漏咗就bye bye㗎喇！」
-
阿妹：「咁點解我哋唔瞓山邊呢？」
-
我：「呢度起碼有廁所同埋水源，等你哋習慣咗先呀嘛。」
-
阿妹：「完全冇問題吖！我話晒都係露營高手嚟。」
-
我：「去呢度咁簡單，係人都可以係高手啦！」
-
阿妹：「咁你都唔俾機會我去表現。」
-
我：「咁你而家起自己嗰個營啦！」
-
阿妹：「哎吔，我隻手突然有啲痛，起唔到吖！」
-
楚翹：「喂！你啲戲有啲屎喎。」
-
阿妹：「屎你條命，我隻手真係痛㗎。」
-
我：「都係我幫你起啦！」
-
阿妹：「真係嘅！咁辛苦你喇！」
-
我：「突然精神咁多嘅。」
-
阿妹：「話晒有個偉大嘅阿哥幫我起營喎，梗係表現得激動雀躍啲啦！」
-
我：「都唔知你係咪咋病嘅。」
-
阿妹：「真痛㗎。」
-
楚翹：「你唔去玩Drama Club真係嘥晒。」
-
阿妹：「我呢啲係發自內心嘅痛嚟㗎！」
-
我：「咁你休息下啦！今晚沖沖下啲水等佢冇咁痛。」
-
阿妹：「而家沖咪得囉！」
-
我：「等今晚洗碗既時候先沖啦，洗碗之餘，順便可以冇咁痛，一舉兩得。」
-
阿妹：「我而家又唔痛嚕喎。」
-
我：「咁仲好，你自己可以埋起營㖭。」
-
阿妹：「哎吔！而家又突然痛返，好痛好痛！」
-
我：「睇嚟你係唔識起營喎。」
-
阿妹：「我唔係唔識，我係隻手痛咋嘛。」
-
楚翹：「乜起營要拉繩嘅咩？將啲營骨插入個營入面，扣實佢，然後加個shelter喺頂，再扣埋佢，最後落埋營釘就搞掂，完全唔使力㗎喎。」
-
阿妹：「呢隻手真係唔聽話，而家又唔痛喇！又可以起營。」
-
我：「放水！作死你咩？」
-
阿妹：「我識㗎，放咩水啫。」
-
楚翹：「我唔講點起，你就要起多個㗎喇。」
-
我：「無所謂啦！反正有人洗碗呀嘛。」
-
兩個營起好之後，太陽都開始落山，我哋都急急腳起埋張枱，set好啲燈去煮晚餐。
-
「滋滋滋」平底鑊上彈油嘅聲音不斷發出。冇錯，去camp就梗係煎牛扒啦，呢個係享受嚟㗎嘛。
-
楚翹：「我真係估唔到去camp竟然有牛扒食。」
-
我：「咁而家係去度假呀嘛，梗係食好啲啦！」
-
楚翹：「完全超出我預算，我仲以為去露營要好玩技能性嘅嘢。」
-
我：「err……其實煎牛扒都係好高技能嘅嘢嚟。塊扒靚唔靚唔係最重要，最重要係睇個廚師嘅技術。」
-
楚翹：「咁呢個大廚嘅技術係點呢？」
-
我：「簡直一流，豬扒都可以煎到變牛扒咁香。」
-
楚翹：「係咪㗎，咁就真係試過先知喇！」
-
我：「我敢寫包單，食過包你返尋味吖！」
-
楚翹：「期待下啦！」
-
阿妹：「聽聞希逸煎啲牛扒仲好食。」
-
我：「希逸之前同我去camp食嗰塊牛扒，真係到而家都記得返浸味。」
-
楚翹：「究竟希逸係唔係你二奶嚟㗎？」
-
阿妹：「咪係，同女朋友去camp嘅時候，回味返同朋友去嘅時候。」
-
我：「好似係你開呢個話題先喎。」
-
阿妹：「係咩，咁唔好意思囉！」
-
楚翹：「你嘅手勢同希逸應該都差唔多啫。」
-
阿妹：「人哋就係識煎牛扒，你咩都識喎，點比吖！」
-
我：「你哋做咩突然變咗做大陸嗰啲『誇誇群』？係咁讚我。」
-
楚翹：「我哋真心讚你㗎。」
-
我：「嘩！呢句真心好唔真心下喎。」
-
阿妹：「唔讚你，陣間點會有晚餐食呢？」
-
我：「你哋班女人，真係夠晒現實。」
-
楚翹：「做人唔現實啲，唔係又點做人呢？」
-
阿妹：「呢句係咪語帶雙關嚟㗎？」
-
楚翹：「你又諗咗去邊度呢？」
-
阿妹：「冇！都係嗰啲『做人』定『造人』啫。」
-
楚翹：「Why not both？」
-
我：「咩事？我跟唔到你哋講到邊度。」
-
阿妹：「聽唔到就由佢，總之今晚跟到就得啦！」
-
我：「你哋唔講，我又點跟到呢？」
-
楚翹：「有時唔使做主動嗰個嘅，做一次被動都得嘅。」
-
阿妹：「咦！『霸王硬上弓』，好招喎。」
-
我：「究竟你哋講緊啲咩㗎。」
-
阿妹：「都唔知你係真唔知定係扮嘅。」
-
我：「啱啱專心煎牛扒，真係聽唔到㗎。」
-
阿妹：「咁你今晚咪知囉，叫你聽嗰陣時你又聽唔清楚。」
-
我：「講多次使死咩？」
-
楚翹：「都要㗎，驚你嚇親吖嘛。」
-
我：「神神秘秘，睇嚟唔係好嘢。」
-
阿妹：「我敢用人頭擔保，你肯定好鍾意嘅。」
-
我：「我嘅要求好高㗎喎。」
-
阿妹：「唔使驚，呢樣肯定滿足到你嘅要求。」
-
我：「拭目以待下先。」
-
阿妹：「幫下你手準備開飯先，費事你哋今晚攰得濟。」
-
楚翹：「點解你幫手講到好似皇恩浩蕩咁嘅。」
-
阿妹：「我公主嚟，點使做嘢呢。」
-
我：「唉！寵壞晒佢喇！」
-
楚翹：「你終於都知道咧！」
-
我：「不過唔緊要啦，阿妹俾阿哥寵係天經地義嘅。」
-
楚翹：「咁我呢？」
-
我：「你……你就攞嚟錫嘅。」
-
阿妹：「食嘅？」
-
我：「錫嘅，你係咪撞壟㗎？」
-
楚翹：「定係你特登講衰啲咋。」
-
（待續 To be continued）
IG：chingchingstory