《夾出一個她》: 第五十二集-一日狗奴
玩完game，劈完酒，再食埋個蛋糕之後，一月生日party都正式完結。而我同楚翹真係名副其實嘅邊玩邊返工，一路食串燒、一路玩game，不過係返緊工㗎，嘻嘻！
-
玩就玩完，食都食完，梗係繼續返工啦！散Band嘅時候都接近清晨，已經隱約見到清晨嘅第一線光。
-
迅速清理完樓面之後，已經係收工時間，我哋買埋早餐上去同阿妹一齊食，食完就重複返尋日嘅動作，逼巴士返學。
-
［雖然夜晚返工真係辛苦，但係望到佢哋開心係值得嘅。］
------
一月-呢個中學考試季節已經去到尾聲，阿妹同一班八婆已經考完試，而我哋啲中六嘅老屎忽，啱啱先開波考模擬試，不過都無阻呢班毒撚、毒婆去「獵食」另一半嘅。
-
之前我哋自己班都去過呢個狗場做義工幾次，所以同個狗場負責人都有些少熟落嘅。呢個狗場係由一個好愛狗仔嘅主人-駿軒負責嘅，平時就係由佢一個麻甩漢照顧狗場入面三十隻狗，當然仲有義工間唔中嚟幫手啦！
-
新年前嘅一個禮拜日，我哋一行八人，由我同楚翹做搞手，希逸同阿妹做架兩，而主角就係男方嘅孟治雞、魚蛋；女方就梗係阿妹啲八婆們-慧妍同安琪啦。
-
我哋喺元朗集合，當我哋兩對情侶到嘅同時，原來佢哋四個都已經到晒，仲有講有笑，聽聞已經趁我哋未到之前已經抄埋牌，證明呢個計劃嘅開頭好成功，同埋代表佢哋好缺愛情嘅滋陰，哈！
-
行去巴士站嘅同時，我哋兩對媒人梗係放下暗示，邊行邊拖手，同埋做下啲拍拖先會做嘅小動作，例如幫對方抹汗，搭扶手電梯就卿卿我我咁啦！
-
細眼之下，原來四位新人（啊！唔係，係四位準伴侶先啱）原來已經有咗呢個目標，魚蛋係同安琪一齊行，而孟治雞係同慧妍一齊。咁就唔使擔心會爭喇！
-
又越過高山又越過谷，終於去到狗場門口，門口都未入已經聽到好多狗仔歡迎我哋（可能係嫌棄緊我哋啦，始終我唔識聽狗話）。一開閘，成推狗湧埋嚟，幾位女女即刻母愛大發。
-
安琪：「嘩！好得意吖！」
-
慧妍：「正爆，今日可以摸夠本喇！」
-
面對母愛氾濫，啲狗（公）梗係食住個勢，攬埋一份，任班女摸唔嬲啦，都唔知啲狗係咪未絕育，個個都獸性大發，攬都算喇，仲要錫喎，而且係脷申嗰隻。真係火都嚟埋。我話俾你聽，如果佢哋係人類，我實同呢班狗公死過。
-
至於企喺度嘅真•狗公，連啲狗show都唔show佢哋，名副其實「冇狗理」。
-
喺我哋同啲狗打招呼嘅時候，駿軒已經準備好啲狗繩，帶我哋去放狗，由於呢度得我同希逸有放狗嘅經驗，所以駿軒都即場教咗啲基本技巧，唔好以為放狗好簡單，其實都唔容易㗎，要令到放狗嗰個同隻狗行得舒服都係一種學問嚟嘅。
-
同啲狗行咗陣山，玩咗一陣之後，我哋就按照之前嘅傾好嘅計劃分工，首先我哋拆開兩對人，我、楚翹、魚蛋同安琪就去清洗個場地；而其餘四位就同啲狗沖涼。
-
洗地嘅時候，理所當然淨係同楚翹傾計啦，留返啲位俾兩位慢慢發酵呢段感情。呢個流浪狗嘅狗場好大，所以我哋四個人拆開兩隊，截然係我同楚翹一隊啦。雖然距離太遠聽唔到佢哋兩個嘅竊竊私語，但我見到魚蛋講嘅嘢係可以氹到安琪笑，仲要係笑到見牙唔見眼嗰隻，所以放心佢哋兩個。
-
洗完地嘅時候，太陽都已經落山，突然廚房傳出一浸香味，原來駿軒預備咗晚餐招呼我哋幾個「狗奴」。正當我準備去廚房偷食之際……
-
駿軒：「喂！唔係俾你呢個為食鬼食㗎！」
-
仆街，一時眼攰手快，拎咗喺啲嘢食隔離嘅狗糧，好彩未放入口，唔係真係笑死人。
-
魚蛋：「你係咪嚟呢度搞笑㗎？」
-
楚翹：「浚彥，sit。」
-
安琪：「都唔肯坐嘅，衰仔嚟。」
-
我：「啲狗糧真係好香呀嘛。」
-
楚翹：「食啖囉！無事嘅。」
-
我：「咁我試食下先。」
-
駿軒：「可以㗎！」
-
我：「浸味有啲似豆豉鯪魚咁樣嘅，唔錯喎。」
-
駿軒：「係咩！我都唔知喎。」
-
我：「咁你又話食得嘅？」
-
駿軒：「我估食得㗎喳。」
-
魚蛋：「快啲餵吖！啲狗喺度狗視眈眈緊喇！」
-
阿妹：「幫緊你，幫緊你。」
-
我：「嚟喇嚟喇！粒嘢認真好回味，浸味喺個口入面揮之不去，充滿豆豉味。」
-
我哋等呢度嘅話事人，即係一班狗狗開咗飯之後，我哋呢啲卑微嘅「狗奴」終於可以開飯。駿軒煮咗啲小菜，請我哋食，當做答謝我哋幫佢照顧啲狗。
-
駿軒：「大家隨便食，唔使咁客氣。」
-
我：「我唔客氣喇！」
-
駿軒：「如果大家之後得閒都可以嚟幫手㗎。」
-
慧妍：「放心啦，我同雞仔之後都會嚟，係咪吖雞仔。」
-
孟治雞：「梗係啦！做義工不知幾好。」
-
阿妹：「乜你哋嘅關係咁快去到叫雞㗎喇！」
-
孟治雞：「係叫雞仔，唔係叫雞。」
-
阿妹：「係嘅阿雞。」
-
阿妹：「睇嚟孟治雞都掂咗，你哋嗰邊點？」
-
孟治雞：「掂啲咩？」
-
楚翹：「秘密，到時你咪知囉」
-
慧妍：「講啦！有咩唔講得先㗎。」
-
楚翹：「都係嗰啲咁嘅嘢啦！」
-
我：「我哋呢邊進度係非常之理想，簡直係完全按照計劃進行。」
-
魚蛋：「究竟你哋有咩計劃係做緊㗎？」
-
我：「哈！大家心照啦！」
-
今日呢個狗場溝仔溝女計劃，其實個個都知，不過雙方準情侶唔知對方其實係想溝自己啫，嘻嘻！
-
（待續 To be continued）
-
PS：請支持領養代替購買寵物，給被遺棄的寵物一個溫暖的家。
IG：chingchingstory