《夾出一個她》: 第五十集-彥仔與澄叔的鬥爭
入到lift之後，楚翹開口講咗句。
-
楚翹：「作死你咩！我啱啱幾驚你爆我身份。」
-
我：「點會呢！我個口密實過密實袋㗎嘛，如果我一爆，大家都賴嘢啦！」
-
楚翹：「你知道你一爆出去就會幾大鑊㗎啦！」
-
我：「放心，我點都唔會講出去嘅。」
-
原來楚翹係驚我唔小心爆佢係香港首富個女。
-
［不過我梗係唔會爆啦！一爆出嚟，我肯定仆硬街，到時真係冇人唔識我。哈！我連連登個標題都諗到，可想而知，我都擔心有其他人知啦！］
-
「奇景！？一個住太安樓嘅窮撚竟然可以識香港首富個女？」
-
不過，呢個秘密暫時都係得我哋四個知，應該係，除非唔係。
------
老闆：「彥仔，你嚟喇！」
-
我：「係吖！今日有冇啲咩特別嘢要幫手？」
-
老闆娘：「唉！啱啱收到最新消息，做埋呢個上半年就冇得做嚕。」
-
我：「係咪今朝新聞講，話有地產商收購晒呢度啲鋪頭。」
-
老闆：「係吖！所以我哋都開始要諗下究竟另外租間鋪頭，定係早啲退休。」
-
我：「如果就咁執笠，啲食客就少咗間夜晚聚腳嘅地方。」
-
老闆：「鋪頭最重要嘅就係一班食咗好多年嘅食客，而且喺呢度做咗咁多年，附近嘅朋友都唔捨得。」
-
老闆娘：「出面地下啲鋪租太貴，我哋呢啲細餐廳完全俾唔起，樓上鋪又難做門面宣傳，好難吸引街客。」
-
楚翹：「冇辦法啦！啲有錢人就係鍾意為所欲為，咁你哋之後會諗住點？」
-
老闆：「都係繼續做好呢半年佢，帶埋一個最好嘅回憶俾大家。」
-
老闆娘：「你哋放心，就算我哋執笠，我哋都會幫你哋搵工嘅。」
-
我：「工呢啲嘢，你哋可以放心嘅，我喺你哋呢度偷咁多師，燒串燒簡直瞭如指掌啦！」
-
楚翹：「你哋第時開間串燒鋪頭，我哋喺你對面開多間。同你哋鬥過。」
-
老闆：「人哋荃灣三蚊一碗豆腐花、銅鑼灣五蚊十粒燒賣，我哋就搞八蚊一串串燒。」
-
我：「嚟咪嚟，驚你有牙咩！鬥平都得呀！」
-
老闆娘：「你哋係咪傻咗呀！八蚊都cover唔到個成本啦！真係賣得多，蝕得仲多。」
-
老闆：「我哋啲串燒有咁大粒有咁大粒，有咁好食得咁好食。」
-
我：「我哋啲串燒啲肉要幾靚有幾靚，要幾燶有幾燶。」
-
老闆：「我哋啲服務有咁好得咁好，買串燒送埋按腳。」
-
我：「我哋包埋揼骨，問你死未？」
-
楚翹：「唉！呢度有兩個男人傻咗呀！」
-
我：「如果之後我赢咗嘅，你唔準喺我附近開餐廳。」
-
老闆：「如果我輸咗，送埋間鋪頭你又點話呀！」
-
我：「嗱！你講㗎，咁我多謝定你先喇！」
-
老闆：「唔好咁驕傲住，可能你輸呢！」
-
我：「我對我燒串燒嘅技巧好有信心，唔會差得去邊。古語有云：『青出於藍勝於藍』。」
-
老闆：「世侄，薑都係老嘅辣。」
-
老闆娘：「兩位無聊佬，發完夢未？發完就埋位做嘢啦！」
-
楚翹：「得個講字，又唔去實行，冇鬼用。」
-
我：「埋位啦澄叔，你老婆鬧你喇！」
-
老闆：「挑！你條女都話你喇！拿拿淋set場啦！」
-
我：「係喇澄叔。」
-
呢一晚入嚟食嘅客人唔算多，不過入得嚟食嘅客人就嗌好多，因為，今日係我哋6C班嘅生日party。話說我哋班每個月都有個傳統習俗，就係喺每個月第一日返學日都會慶祝嗰個月嘅生日之星，而今個月嘅生日之星，就係孟治雞同埋歪人喇。
-
啊！我都未同大家介紹歪仁㖭！歪仁係一個好風趣幽默嘅男同學嚟，如果要我用個詞語形容佢，我會用「仆街」呢個字形容佢，佢真係一個好撚仆街嘅人嚟。
-
點解我會話佢係仆街，睇埋先。
-
除咗去廁所之外，佢平時出入都有一大班女女跟住佢。咁點解會話佢係仆街呢？唉！講起佢都火爆，話晒識咗佢咁多年，都唔介紹女女俾我識。呢個小西灣嶺怡中學世界入面，有人係飽死嘅（女多），而亦都有唔少單身嘅可憐蟲（即係之前嘅我）係餓死嘅。
-
雖然嚟「燒夜店」開party嘅同學唔多，始終聽日要返學，不過「燒夜店」嘅場面可以話係十分墟冚嘅，話晒嚟得嘅都唔係讀書嘅人才，讀書嗰啲人，一早返咗屋企瞓覺，點會同我哋啲玩得起嘅人一齊呢！至於我哋玩啲咩？當然都係例牌大牌檔嘢，啤牌、十五二十呢啲當然走唔甩啦。
-
魚蛋：「喂！屌你飲啦！嘈嘈閉。」
-
至於呢位咁撚飲得嘅同學呢，就係酒場刑警，專門捉人找數嘅魚蛋喇！咁點解佢叫魚蛋呢？因為佢真係好撚似一粒魚蛋，相信每間學校都一定有人叫魚蛋，但呢粒「魚蛋」，真係一粒魚蛋嚟㗎。
-
我：「希逸，乜你終於都走到喇！」
-
希逸：「安琪同慧妍食埋生果就走，佢哋話費事阻住我哋兩個喎。」
-
我：「啱呀！佢哋做得冇錯呀！」
-
希逸：「但蕊心要我氹埋佢上床……」
-
我：「咩話，你夠膽講多次？攞刀劈你吖喇！」
-
希逸：「唔使擔心，係上床瞓覺啫，要我陪佢傾到瞓著。」
-
我：「嚇死人咩！我唔想咁快做人舅父啊！」
-
希逸：「咁我都係一個負責任嘅男人嚟嘅，同埋拍拖唔係淨係為呢啲敦倫之樂㗎嘛！」
-
我：「你今日做咩賢者mode上身，通常男仔完事之後都會變咗聖人mode㗎喎，唔通你……」
-
希逸：「你可以放心，我哋真係冇嘢嘅。」
-
我：「你今日突然變聖人mode好奇怪，平時你係一個衝動派嘅人嚟㗎喎。」
-
希逸：「咁唔係下下都要衝動嘅，做人要理性啲㗎嘛！」
-
我：「希逸，你變咗喇！」
-
（待續 To be continued）
IG：chingchingstory